Read Tshiluba 2 Kulondolola 26 Bible Online

2 Kulondolola 26 - Tshiluba bible

2 Kulondolola 26

¹Pavua Uziya,[150] muana wa Amashiya, ne bidimu dikumi ne bisambombu, bena Yuda kumusungula bua apingane tatuende mu bukalenga.

²Nanku tatuende mumane kufua, Uziya kupingaja kabidi tshimenga tshia Elate[151] ku bumfumu buende, kutshibakulula.

³Uziya kubuela mu bukalenga bua bena Yuda ne bidimu dikumi ne bisambombu. Kushalaye mu bukalenga bidimu makumi atanu ne bibidi mu Yerushalayime. Mamuende Yekoliya uvua wa mu Yerushalayime.

⁴Uziya uvua muenze malu adi Maweja-Nangila musue, anu bu muvua tatuende Amashiya muenze.

⁵Patshivua Zekarya, uvua mulongeshe Uziya mua kunemeka Mvidi Mukulu, ne muoyi,[152] Uziya kuenza muende muonsu bua kumanya tshidi Maweja-Nangila Mvidi Mukulu musue. Mvidi Mukulu kumusankisha.

⁶Uziya kuya kuluisha bena Peleshete. Kunyangaye bimana bia mu tshimenga tshia Ngate, tshia Yabane, ne tshia Asdode. Pashishe, kukoleshaye bimenga ne bimana,[153] pabuipi ne tshimenga tshia Asdode, ne mu buloba bukuabu bua bena Peleshete.

⁷Mvidi Mukulu uvua muambuluishe Uziya, bua atshimune bena Peleshete, bena Arabe bavua basombe ku Ngure-Baale, ne bena Meyuni.[154]

⁸Bavua balambula Uziya milambu too ne kudi bena Amone. Bumfumu bua Uziya kukolabu, lumu luende kuya miaba yonsu too ne ku mikalu ya ku Ejipitu.

⁹Uvua muibake tuleya tukole mu Yerushalayime pa mutu pa tshiibi tshia ku Ditumba, ne pa tshiibi tshia ku Tshibandabanda,[155] too ne ku muaba uvua tshimana tshipite kumpala.

¹⁰Uvua muibake kabidi ne bibumba bia batentekedi mu buloba bua mu tshipela. Uvua mumbule bina bia mayi bia bungi, bualu uvua ne bimuna bivule ku muelelu wa Mayi manene, ne mu mpata. Uvua kabidi ne babidime, ne bena mudimu ba mitshi ya mvinyo pa mikuna, ne mu madimi a mvinyo, bualu uvua mupite kunanga didima.

¹¹Uziya uvua ne bena mvita, bavua bamanye mua kuluangana. Bena mvita abu, bavua batapulula mu bisumbu, bilondeshile dibadika dia bantu divuabu benze kudi Yeyele mufundi, ne kudi Masheya mulombodi wa bukalenga, babaludika mu dibadika adi kudi Ananiya, umue wa ku balombodi ba bena mvita ba mukalenga.

¹²Bena mvita ba bukitu aba bavua babalombola kudi bamfumu ba meku binunu bibidi ne nkama isambombu.

¹³Bena mvita aba, bavua binunu nkama isatu ne muanda mutekete ne nkama itanu. Bavua ne bukole bua bungi, bamane kudilongolola bua kuluangana ne baluishi ba mukalenga.

¹⁴Pavua mukalenga utuma bantu ku mvita, uvua ubapesha ngabu, mafuma, bifulu bia tshiamu, tuzaku tua tshiamu, ne mabue a kuela mu ndundu.

¹⁵Uziya uvua muenzeje mu Yerushalayime, biamu bia mvita bia mushindu mukuabu, kudi muntu uvua mupete meji a kubienza. Bavua bateke biamu abi ku tuleya ne ku matumba a bimana. Bavua mua kuela mikete ne mabue manene ne biamu abi. Bavua bambuluisha Uziya bikole kudi Mvidi Mukulu.[156] Bumfumu buende kudiunda bikole, lumu luende kuya kule.

¹⁶Kadi, lumu luende luvua lumupeshe ditambisha dia bungi. Ditambisha edi kumufikisha ku kabutu. Kavua kabidi muitabe Mvidi Mukulu wende to. Dituku dikuabu, Uziya kubuela mu nzubu wa Mvidi Mukulu, bua kulambula musenga wa kamonya pa tshilambuilu tshia manananshi.

¹⁷Azariya, mutuangaji munene, kubuela panyima pende mu nzubu wa Maweja-Nangila. Bavua bamushindikije kudi batuangaji makumi muanda mukulu ba Maweja-Nangila. Bonsu bawa bantu ba muoyi mukole.

¹⁸Kuimanabu kumpala kua mukalenga Uziya, bamuambila ne: — Mukalenga, kuena mua kulambula Maweja-Nangila milambu ya manananshi to. Mudimu ewu ngwa batuangaji ba ku ndelanganyi ya Arone, badibu bamane kujidila bua mudimu ewu.[157] Patuka muaba wa tshijila ewu, bualu udi wenza bidi Maweja-Nangila ubenga. Biudi wenza kabiena mua kukupesha lumu ku mesu kua Maweja-Nangila Mvidi Mukulu to.

¹⁹Uziya ukavua mumane kudilongolola bua kuosha musenga wa kamonya. Umvua nanku, kufikilaye batuangaji munda. Diakamue disama dia nsudi kumueneka mu mpala muende, patshivuaye mu nzubu wa Mvidi Mukulu, pabuipi ne tshilambuilu tshia manananshi, muaba uvua batuangaji.

²⁰Mutuangaji munene, ne batuangaji bakuabu bavua bamutangile. Kumonabu disama dia nsudi mu mpala muende. Kumupatulabu lukasa. Yeye nkayende kamvua ne: Maweja-Nangila mmunnyoke. Nanku kupatukaye lubilu muaba wa tshijila.

²¹Mukalenga Uziya kushala ne disama dia nsudi too ne ku lufu luende. Bualu bua disama adi, uvua musombe anu pa nkayende,[158] kayi mua kumonangana ne bantu bakuabu, kayi kabidi ne mushindu wa kupingana mu nzubu wa Maweja-Nangila. Muanende wa balume Yotame uvua mulombodi mu nzubu wa bukalenga, ke uvuabu bapesha mudimu wa kulombola ditunga.

²²Malu onsu makuabu a Uziya a ku ntuadijilu ne a ku ndekelu, mbaafunde kudi muambi Yeshaya, muana wa Amosa.[159]

²³Uziya mumane kufua,[160] kumujikabu mu nkita ya bena diku dia bukalenga, kadi ki mu nkita ya bena diku diabu to, bualu uvua ne disama dia nsudi. Muanende wa balume Yotame kumupingana mu bukalenga.