Read Tshiluba 2 Kulondolola 27 Bible Online

2 Kulondolola 27 - Tshiluba bible

2 Kulondolola 27

¹Yotame uvua anu ne bidimu makumi abidi ne bitanu, pawaye mubuele mu bukalenga bua bena Yuda. Kushalaye mu bukalenga bidimu dikumi ne bisambombu mu Yerushalayime. Mamuende wa Yotame uvua Yerusha, muana wa Sadoke.

²Yotame uvua muenze malu adi Maweja-Nangila musue. Uvua muenze malu mimpe anu bu tatuende Uziya, kadi kavua muenze tshilema tshia kubuela mu nzubu wa Maweja-Nangila. Kadi bena Yuda bavua bashale anu ne buenzayi buabu bua kale.[161]

³Yotame ke uvua muenze tshiibi tshia kulu tshia nzubu wa Mvidi Mukulu. Uvua mukoleshe bimana bia tshimenga miaba mishilangane mu tshitupa tshia Ofele.[162]

⁴Uvua muase kabidi bimenga mu buloba bua mikuna ya bena Yuda. Uvua muibake kabidi nzubu mikole ne tuleya mu metu.

⁵Yotame uvua muye kuluisha mukalenga wa bena Amone, kumutshimunaye. Tshidimu atshi, bena Amone kulambula Yotame biamu bitoke bia mushinga mukole kilo binunu bisatu, ntete ya kuenza bukula kilo bitoto bisatu ne kilo bitoto bisatu bia ntete ya oije. Bidimu bikuabu bibidi, kumulambulabu bintu bia mushindu umue.

⁶Nanku bukole bua Yotame buvua anu butungunuka, bualu uvua muitabe Maweja-Nangila Mvidi Mukulu wende.

⁷Malu makuabu a Yotame, mbaafunde mu mukanda udibu binyika ne: mukanda wa bakalenga ba bena Izrayele ne ba bena Yuda.[163] Badi bafundamu mvita iwaye muluangane ne malu avuaye muenze.

⁸Yotame uvua mubuele mu bukalenga bua bena Yuda muikale ne bidimu makumi abidi ne bitanu. Uvua mushale mu bukalenga bidimu dikumi ne bisambombu mu Yerushalayime.

⁹Yotame mumane kufua, kumujikabu mu Tshimenga tshia Davide. Muanende wa balume Akaze kumupingana mu bukalenga.