Read Tshiluba 2 Kulondolola 28 Bible Online

2 Kulondolola 28 - Tshiluba bible

2 Kulondolola 28

¹Akaze uvua ne bidimu makumi abidi, pawaye mubuele mu bukalenga bua bena Yuda. Uvua mushale mu bukalenga bidimu dikumi ne bisambombu mu Yerushalayime. Kavua muenze malu avua Maweja-Nangila musue, bu avua nkambua wende Davide muenze.

²Uvua mulonde amu buenzayi bua bakalenga ba bena Izrayele. Akaze uvua muengulule mene mpingu ya tshiamu mu kapia bua kutendelela mvidie Baale.

³Uvua ulambula milambu ya manananshi mu tshibandabanda tshia Inome. Uvua mulambule bana bende ba balume bu mulambu,[164] bilondeshile bilele bibi bia bisamba bivua Maweja-Nangila muipate bua kushila bena Izrayele ditunga.

⁴Akaze uvua ulambula kabidi milambu ya nyama ne ya manananshi miaba ya kutendelela mvidie ya bisamba bikuabu, pa mikuna muinshi mua mitshi mibishi ya dileji.

⁵Maweja-Nangila Mvidi Mukulu wende, kufila Akaze mu bianza bia mukalenga wa bena Arame. Bena Arame kumuluisha, kukuata bantu ba bungi mu lukanu, kuya nabu mu tshimenga tshia Damase. Akaze uvua mubuele kabidi mu bianza bia Peka, mukalenga wa bena Izrayele,[165] muana wa Remaliya. Awu kumutshimuna, kumukengesha bikole.

⁶Dituku dimue, Peka kushipesha bena mvita ba bukitu ba bena Yuda binunu lukama ne makumi abidi. Bivua bienzeka nanku bualu bena Yuda abu, bavua babenga Maweja-Nangila Mvidi Mukulu wa bankambua babu.

⁷Kadi Zikri, muena mvita wa bena Efrayime, kushipa Masheya, muana wa mukalenga Azirikame, mulombodi wa nzubu wa bukalenga, ne Elkana muntu uvua mukalenga wenda nende miaba yonsu.

⁸Pashishe, bena mvita ba bukalenga bua ku mutu mu ditunga, kukuata bakaji ne bana ba bena Yuda binunu nkama ibidi mu lukanu. Kuangatabu bintu bia bungi bia mu ditunga amu, kuya nabi mu tshimenga tshia Samariya.

⁹Mu Samariya amu, muvua muambi wa Maweja-Nangila, dina diende Obede. Kuyaye kuakidila bena mvita ba bena Izrayele, bavua bafike mu tshimenga amu. Kubambilaye ne: — Maweja-Nangila Mvidi Mukulu wa bankambua benu, uvua mufikile bena Yuda munda. Ke padiye mubafile mu bianza bienu. Kadi nuvua bashipe bena mvita ba bena Yuda bapite bungi ne tshikisu tshipite. Tshikisu tshienu kumvuika ne mu diulu.

¹⁰Kabidi nudi ne dijinga dia kubueja bantu balume ne bantu bakaji aba, banudi bakuate mu Yerushalayime ne mu ditunga dia Yuda, mu bupika. Nuenu kanuena mua kupeta tshilumbu kudi Maweja-Nangila Mvidi Mukulu wenu anyi?[166]

¹¹Ntelejayi, lekelayi bena lukanu ba bena Yuda, banudi bakuate, baye. Bualu, nuenu ke badi Maweja-Nangila mufikile munda mpindiewu.

¹²Nanku, bamfumu bakuabu ba bena Efrayime, kufikila kabidi bantu bavua bapingane ku mvita munda: ke Azariya, muana wa Yowanane, Berekiya, muana wa Meshilemote, Izkiya, muana wa Shalume, ne Amasha, muana wa Adlayi.

¹³Kukandikabu bena mvita abu ne: — Kanufiki ne bena lukanu abu munemu to. Nenutupeteshe tshilumbu tshinene kudi Maweja-Nangila. Tukadi bena tshibawu tshinene. Nulekele kutukebela tshibawu tshikuabu. Kanuena bamanye ne: Maweja-Nangila mmufikile bena Izrayele munda bikole anyi?

¹⁴Diakamue bena mvita kulekela bena lukanu. Kupingajabu ne bintu mene bivuabu banyenge, bamfumu ne bantu bonsu batangile.

¹⁵Bantu ba wabu bateke bua kuenza mudimu awu, kusamba bena lukanu. Kuangatabu bilamba ne bisabata bivuabu bapete mu mvita, kutapeshabu bena lukanu bavua kabayi nabi. Kubapeshabu biakudia ne mayi a kunua. Bavua bondapa mputa ya bavua batapike. Bantu bonsu bavua bapete njiwu mu mvita kabayi ne mushindu wa kuenda, bavua babambula pa nyama ya mpunde. Kuyabu ne bantu bonsu abu muaba uvua bana babu mu Yeriko, tshimenga tshia Mabue a ngaji. Pashishe, kupinganabu mu Samariya.

¹⁶Tshikondu atshi, mukalenga Akaze kubikidisha mukalenga wa bena Ashure bua amuambuluishe.

¹⁷Bualu, bena Edome bavua baluisha tshiakabidi bena Yuda, bakuate bantu, baye nabu mu bupika.

¹⁸Bena Peleshete kabidi bavua babuele ne mvita mu bimenga bivua mu mpata ya ku muelelu wa Mayi manene, ne mu buloba bua bena Yuda buvua kuinshi mu ditunga. Bavua bakuate bimenga ebi: Bete-Shemeshe, Ayalone, Ngederote, Soko, Timna, Ngimzo, ne misoku ivuabu nayi mutumba. Bena Peleshete kuasamu.

¹⁹Maweja-Nangila kukuatshisha bena bukalenga bua Yuda bundu, bualu mukalenga Akaze uvua mufikishe bantu ku dilengulula Maweja-Nangila. Yeye mene kavua muitabe Mvidi Mukulu.

²⁰Mukalenga Tiglate-Pilesere wa bena Ashure, kufika bua kuluisha Akaze. Kumukengeshaye bikole pa mutu pa kumuambuluisha.[167]

²¹Akaze kuangata bintu bikuabu bia bubanji bia mu nzubu wa Mvidi Mukulu, bia mu nzubu wa bukalenga, ne bia kudi bakulu. Kubifilaye bionsu kudi mukalenga wa bena Ashure. Kadi, nansha Akaze muenze nanku, kavua mupete diambuluisha to.

²²Nansha Akaze mu dikenga dikole nanku, uvua anu utombokela Maweja-Nangila.

²³Uvua ulambula mvidie ya mu Damase milambu. Mvidie ayi, keivua mimupangishe mua kutshimuna baluishi. Uvua wamba ne: “Mvidie ya bena Arame ke idi miambuluishe bakalenga ba bena Arame. Nanku, ndi musue kulambula mvidie ayi milambu bua imone mua kungambuluisha meme kabidi.” Kadi mvidie ayi, keivua mimukebele, yeye ne bantu bende, kabutu.

²⁴Akaze kusangisha bintu bionsu bia tshijila bivua mu nzubu wa Mvidi Mukulu, kubiboza. Kukangaye biibi bia nzubu wa Mvidi Mukulu ne milonda. Pashishe, kuenza bilambuilu mu masangu a njila onsu a mu Yerushalayime.

²⁵Mu tshimenga tshionsu tshia mu ditunga diende, uvua muenze miaba ya kulambuila mvidie ya bantu benyi milambu ya manananshi. Ke muvuaye mufikishe Maweja-Nangila Mvidi Mukulu wa bankambua bende munda nanku.

²⁶Malu makuabu a Akaze onsu, biangatshile ku ntuadijilu wa bukalenga buende too ne ku ndekelu wabu, mbaafunde mu mukanda wa bakalenga ba bena Yuda ne ba bena Izrayele.[168] Badi bafundemu malu onsu avuaye muenze.

²⁷Akaze mumane kufua,[169] kumujikabu mu Yerushalayime. Kadi, kabavua bamujike mu nkita ya bena diku dia bukalenga to. Muanende wa balume Izkiya kumupingana mu bukalenga.