Read Tshiluba 2 Kulondolola 30 Bible Online

2 Kulondolola 30 - Tshiluba bible

2 Kulondolola 30

¹Mukalenga Izkiya kuyukila ne bakulu ba mu ditunga diende, pamue ne bena tshipangu tshia mu Yerushalayime bonsu, bua kumanya ne: mudi mushindu wa kuenza tshibilu tshia Dipita dia Maweja-Nangila mu ngondu muibidi wa tshidimu[172] anyi? Bualu kabavua mua kuenza tshibilu atshi mu matuku a tshibidilu to,[173] batuangaji bavua bajikije kumusha mikiya yabu kabayi bakumbane. Kabidi bena Izrayele kabavua badisangishe lukasa mu Yerushalayime to. Nanku mukalenga Izkiya ne bakulu bonsu bavua muaba awu, kuitaba lungenyi alu. Kujadikabu mua kubikila bena Izrayele bonsu: ba kuinshi mu ditunga, ne ba ku mutu, bua bafike mu Yerushalayime, bua kuenza tshibilu tshia Dipita dia Maweja-Nangila. Bualu anu bantu bakese batshivua benza tshibilu etshi, bilondeshile mudibu bafunde. Mukalenga Izkiya kutuma bantu mu buloba bonsu bua Izrayele ne bua Yuda, bua kuambila bantu ne: nufike mu nzubu wa Mvidi Mukulu, nuenze tshibilu, bua kutumbisha Maweja-Nangila Mvidi Mukulu wa bena Izrayele. Izkiya uvua mufundile kabidi bis(...)

⁶Bantu bava Izkiya mutume abu, kuendakanabu mu buloba bua bena Izrayele ne bua bena Yuda. Mikanda ivuabu nayi ayi, bavua bayitua tshiala kudi mukalenga Izkiya ne bakulu ba mu ditunga diende. Bilondeshile bulongolodi bua mukalenga Izkiya, bantu abu bavua bamba ne: — Nuenu bena Izrayele bavua bapanduke ku mvita ya bena Ashure, pinganayi kudi Maweja-Nangila Mvidi Mukulu wa Abrahame, wa Izake ne wa Yakobe. Diba adi, Yeye neapingane kunudi.

⁷Kanulondi buenzayi bua batatuenu, nansha bua bana benu bavua batombokela Maweja-Nangila, Mvidi Mukulu wa bankambua babu. Maweja-Nangila uvua mubabutule bu munudi bamanye bajadike.

⁸Kanuenji buenzayi bua bankambua benu to. Itabayi Maweja-Nangila, pinganayi muaba wende wa tshijila uvuaye mujidile bua kashidi. Nushale bantu ba Maweja-Nangila Mvidi Mukulu wenu. Nanku bu muvuaye munufikile munda bikole, tshiji tshiende netshituye.

⁹Nuenu bapingane kudi Maweja-Nangila, bantu bonsu bavua bakuate bana benu, ne bena meku enu, nebabafuile luse. Nebabalekele bua bapingane mu ditunga edi. Nanku, nuenu bapingane kudiye, Maweja-Nangila Mvidi Mukulu kakunulekela to, bualu udi muena luse ne dinanga.

¹⁰Bantu bavua Izkiya mutume abu, kuendakanabu mu buloba bua Efrayime ne bua Menashe. Kupitshilabu mu bimenga bionsu. Pashishe kuyabu mu tshisamba tshia Zebulone. Kadi muaba awu bantu bavua babaseka, babalembakaja.

¹¹Kadi bantu bakuabu ba mu tshisamba tshia Ashere, tshia Menashe, ne tshia Zebulone, kuvuluka muvuabu benze bibi. Nenku kuyabu mu Yerushalayime.

¹²Mu bukalenga bua Yuda, Maweja-Nangila kuambuluisha bantu, bua bitabe bonsu ne muoyi umue mua kukumbaja bionsu bivua mukalenga Izkiya ne bakulu babambile mu dina dia Maweja-Nangila.

¹³Ngondu muibidi, musumba wa bantu kudisangisha mu Yerushalayime, bua kuenza tshibilu tshia Mampa kaayi mela buanga. Bantu abu bavua bapite bungi.

¹⁴Kudianjilabu kumusha bilambuilu bivua mu tshimenga, too ne bia kulambuila manananshi. Kubimanshabu mu tshibandabanda tshia Sedrone.

¹⁵Dituku dia dikumi ne dinayi dia ngondu awu, kushipabu nyama ya tshibilu tshia Dipita dia Maweja-Nangila. Batuangaji ne bena Levi bavua bumvue bundu, bualu bavua ne mikiya. Nanku kumushabu mikiya ayi, bua bamone mua kubuela ne milambu ya kuosha mu nzubu wa Mvidi Mukulu.

¹⁶Bavua baye kusomba pa miaba yabu ya tshibidilu, bilondeshile muvua mikenji ivua Moshe, muntu wa Mvidi Mukulu, mubafundile. Bena Levi bavua bapesha batuangaji mashi a nyama ivua bantu balambula. Batuangaji bavua bamiamina mashi awu ku tshilambuilu.

¹⁷Bu muvua bantu bavule bavua basangile bikale ne mikiya, kabayi mua kulambula Mvidi Mukulu milambu, bena Levi bavua bashipa nyama pa mutu pa bantu abu.

¹⁸Bantu ba bungi, nangananga ba mu tshisamba tshia bena Efrayime, tshia bena Menashe, tshia bena Isakare, ne tshia bena Zebulone, kaba-vua bumushe mikiya yabu to. Kadi bavua amu badia biakudia bia tshibilu tshia Dipita dia Maweja-Nangila, kabayi banemeka meyi adibu bafunde mu mukanda wa mikenji. Kadi Izkiya kulombela bantu abu kudi Maweja-Nangila, wamba ne:

¹⁹“Maweja-Nangila, Mvidi Mukulu wa bankambua betu, ufuile bantu aba luse, nansha bobu kabayi banji kumusha mikiya, kabayi lelu bantu ba tshijila. Kadi badi amu baditatshisha ne muoyi wabu mujima bua kumanya tshiudi musue.”

²⁰Maweja-Nangila kuitaba dilomba dia Izkiya. Kavua munyoke bantu abu to.

²¹Bena Izrayele bavua mu Yerushalayime kuenza tshibilu matuku muanda mutekete tshia Mampa kaayi mela buanga. Dituku dionsu bena Levi ne batuangaji bavua batumbisha Maweja-Nangila ne biombelu bia muadi mukole. Biombelu abi bavua babilongolola anu bua kutumbisha nabi Maweja-Nangila.

²²Izkiya kukolesha bena Levi ku muoyi, bualu bavua bakuatshila Maweja-Nangila mudimu muabu muonsu. Lumingu lujima bantu bavua badia pamue biakudia bia tshibilu, balambula milambu ya bobumue, batumbisha Maweja-Nangila, Mvidi Mukulu wa bankambua babu.

²³Bantu bonsu bavua bumvuangana bua kutungunuka ne tshibilu matuku makuabu muanda mutekete. Lumingu luibidi alu bantu bavua amu ne disanka,

²⁴bualu mukalenga Izkiya uvua mupeshe bantu ngombe milume tshinunu, ne mikoku binunu muanda mutekete. Bakulu ba mu bukalenga bavua bafila kabidi ngombe milume tshinunu, ne mikoku binunu dikumi. Kabidi batuangaji bavua bamane kumusha mikiya, bavua ba bungi.

²⁵Bantu bonsu ba-vua ne disanka: bena Yuda, batuangaji ne bena Levi, kabidi bantu bonsu bavua bafume ku bukalenga bua ku mutu wa ditunga, nansha bavua bamane kusomba mu bena Yuda kuonsu eku, nansha bavua bafika anu bua tshibilu.

²⁶Disanka dia tshibilu edi divua dipite bunene. Nangananga bena mu Yerushalayime, ke bavua basanka bikole. Bualu biangatshile mu tshikondu tshia Shelomu, muana wa Davide, mukalenga wa Izrayele, kabavua banji kuenza kabidi tshibilu tshia mushindu ewu mu tshimenga to.

²⁷Ku ndekelu batuangaji ba bena Levi[174] kuimana kulu, kulomba Mvidi Mukulu bua ele bantu lupemba. Dilomba diabu kufika mu diulu, muaba wa tshijila wa Mvidi Mukulu. Ke Mvidi Mukulu kudikumbaja.