Read Tshiluba 2 Kulondolola 34 Bible Online

2 Kulondolola 34 - Tshiluba bible

2 Kulondolola 34

¹Yoshiya kubuela mu bukalenga muikale ne bidimu muanda mukulu. Kushalaye mu bukalenga bidimu makumi asatu ne tshimue mu Yerushalayime.[196]

²Yoshiya uvua wenza malu adi Maweja-Nangila musue, anu bu muvua nkambua wende Davide muenze. Uvua ulonda bibidilu bionsu bia nkambua wende awu, kayi usesuka to.

³Tshidimu tshia muanda mukulu tshia bukalenga bua Yoshiya, yeye mutshikale nsongalume, kukebaye mua kumanya tshidi Mvidi Mukulu wa nkambua wende Davide musue. Pashishe bidimu binayi bimane kupita, kutuadjaye kumusha miaba ya kutendelela mvidie ya bantu benyiivua mu Yerushalayime, ne mu bukalenga bua Yuda. Kumushaye kabidi makunji ne mpingu bia kutendelela mvidie bia mishindu yonsu.

⁴Kupulabu bilambuilu bionsu bia mvidie Baale, Yoshiya mutangile. Kutshibulabu musangu umue mbabula ya kuosha manananshi ivuabu bimanyike pa bilambuilu abi. Kupulabu makunji a kutendelela mvidie, kunyangakajabu mpingu ya mishindu mishilangane.[197] Kuoshabu bionsu abi kubutula. Butu buabi kubutangalajabu muaba uvua nkita ya bantu bavua batendelela mvidie ya tshianana ayi.

⁵Pashishe, kuoshabu mifuba ya batuangaji ba bisamba bikuabu pa bilambuilu bivuabu balambuila milambu.[198] Ke muvua Yoshiya mumushe mikiyaivua mu Yerushalayime ne mu bukalenga bua Yuda nanku.

⁶Pashishe, kuyaye mu bimenga bia bena Menashe, bia bena Efrayime, bia bena Shimeyone ne bia bena Naftali too ne mu maloba avuabu nawu mutumba.[199]

⁷Yoshiya kupula bilambuilu, kuzaza makunji ne mpingu bia kutendelela mvidie. Kutshibulaye ne mbabula ya kuosha manananshi mu bisamba bionsu bivua ku mutu mu ditunga. Pashishe, Yoshiya kupingana mu Yerushalayime.

⁸Yoshiya mumane kulala mu bukalenga bidimu dikumi ne muanda mukulu, dituku dikuabu uvua umusha mikiya mu ditunga ne mu nzubu wa Mvidi Mukulu. Yoshiya kutuma Shafane, muana wa Ashaliya kudi Masheya, mulombodi wa tshimenga, ne kudi Yowa, muana wa Yowakaze, mufikishi wa malu a mukalenga kudi bantu, bua baye kulongolola nzubu wa Maweja-Nangila Mvidi Mukulu wende.

⁹Bantu abu kuya kudi Ilkiya, mutuangaji munene. Bavua baye ne makuta avuabu bapete kudi bena Levi bavua balame ku tshiibi tshia nzubu wa Mvidi Mukulu. Ke makuta avuabu bafile kudi bena Menashe, bena Efrayime, ne bena bisamba bikuabu bia ku mutu mu ditunga, too ne kudi bena Yuda, kudi bena Binyamine ne bena Yerushalayime.

¹⁰Makuta awu, kuapeshabu balombodi ba bena mudimu badi balongoluesha, bakolesha kabidi nzubu wa Mvidi Mukulu, bua bafute bena mudimu wa mabaya, bibaki ne bena mudimu bakuabu, bua basumbe kabidi mabue masonga ne mitshi ya mikamba, bua kulongolola nzubu mikuabu ivua bakalenga ba bena Yuda balekela inyanguke.

¹²Bena mudimu kulongolola midimu yabu yonsu anu bimpe bu muvuabu babaleja kudi bena Levi aba: Yakate ne Obadya, ba mu diku dia Merari; kabidi ne Zekarya ne Meshulame, ba mu diku dia Kekate. Bena Levi bakuabu, bavua bamanye mua kuimba bisanji,[200]

¹³bavua bambuluisha bena mudimu bavua bambula majitu, ne bena mudimu bakuabu bonsu. Bena Levi bavua bakuate kabidi midimu mikuabu ya bafundi, ya batangidi ba malu, ya balami ba biibi.

¹⁴Pavuabu bumusha makuta mu mushete, avua bantu balambule bua midimu ya mu nzubu wa Mvidi Mukulu, mutuangaji Ilkiya kuangula mukanda wa mikenji ya Maweja-Nangilaivua Moshe[201] muambile bantu.

¹⁵Ilkiya kuambila Shafane mufundi ne: “Ndi muangule mukanda wa mikenji mu nzubu wa Maweja-Nangila.” Pashishe, Ilkiya kupesha mufundi mukanda awu.

¹⁶Shafane kuya kupesha mukalenga Yoshiya mukanda, kumuambila ne: — Bena mudimu bebe badi benza midimu yonsu iuvua mubafundile.

¹⁷Batuangaji mbangate makuta onsu avua mu mushete, baapesha balombodi ba bena mudimu, baapesha kabidi bena midimu mishilangane.

¹⁸Shafane kuamba kabidi ne: — Ilkiya, mutuangaji munene, mmumpeshe mukanda ewu. Nanku, kubadilaye mukalenga Yoshiya mukanda awu.

¹⁹Anu mukalenga Yoshiya umvue malu avua mu mukanda wa mikenji, kunyingalalaye bikole. Kupandaye bilamba biende.

²⁰Kubikidishaye Ilkiya, Akikame, muana wa Shafane, Abdone, muana wa Mika, Shafane mufundi, ne Ashaya umue a ku balombodi ba mu bukalenga, kubambilaye ne:

²¹— Nuye kukonka Maweja-Nangila buanyi meme, bua bena Izrayele, ne bua bena Yuda bonsu badi bashale ne muoyi, bua tumanye tshitudi mua kuenza, bua malu onsu adibu bafunde mu mukanda udibu bangule ewu. Bualu, bankambua betu kabavua bakumbaja mikenji ivuabu bafundamu to. Ke padi Maweja-Nangila mutufikile munda bikole.

²²Ilkiya ne bantu bakuabu bavua mukalenga Yoshiya mutume, kuya kudi muambi mukaji Ulda uvua musombe mu Yerushalayime. Bayende wa Ulda uvua Shalume, muana wa Tokekate, muikulu wa Asra. Shalume ke uvua ulama bilamba bia tshijila bivua mu nzubu wa Mvidi Mukulu.[202] Bantu abu, kuambila muambi mukaji Ulda malu onsu awu.

²³Ulda kubatuma bua baye kuambila mukalenga Yoshiya ne:

²⁴“Maweja-Nangila Mvidi Mukulu wa bena Izrayele udi wamba ne: ‘Nennyoke bikole Yerushalayime ne bantu bonsu badimu, anu bu mudibu bafunde mu mukanda udibu babale kumpala kua Yoshiya, mukalenga wa bena Yuda.

²⁵Bena Yerushalayime mbambenge, mbalambule mvidie mikuabu milambu. Bionsu bidibu benze mbimfikishe munda. Ke pandi mufikile tshimenga etshi munda bikole. Tshiji tshianyi katshiena tshijika mpindiewu to.

²⁶Mukalenga Yoshiya uvua munutume kundi bua kunkonka, meme Maweja-Nangila Mvidi Mukulu wa bena Izrayele, ndi lunuambila ne: Uvua muteleje malu onsu avua mu mukanda ewu.

²⁷Uvua muteleje bimpe tshindi muambe bua Yerushalayime ne bua bantu bonsu badimu. Wewe uvua unyingalala, uvuluka bubi buebe kumpala kuanyi, upanda bilamba biebe, udila muadi. Nanku, ndi nkujadikila ne: ndi mumvue dilomba diebe.

²⁸Neufue mu ditalala. Nebakujike mu lukita, kuyi mumone makenga onsu andi musue kukengesha nawu Yeryshalayime ne bantu bonsu badi basamu.’ ” Ilkiya, mutuangaji munene ne bantu bavuaye nabu, kuya kuambila mukalenga Yoshiya bionsu abi.

²⁹Diakamue, mukalenga Yoshiya kubikidisha bakulu bonsu ba mu Yerushalayime, ne ba mu ditunga dia bena Yuda.

³⁰Kuyabu bonsu mu nzubu wa Mvidi Mukulu. Bavua baye ne bantu ba mu Yerushalayime ne ba mu ditunga dia Yuda, batuangaji, bena Levi ne bantu bakuabu bonsu. Pashishe, mukalenga Yoshiya kubabadila bonsu mukanda wa ndondu uvuabu bangule mu nzubu wa Mvidi Mukulu.

³¹Uvua muimane pa muaba uvuabu bamulongoluele. Kutuaye tshiakabidi ndondu ne Maweja-Nangila. Muntu yonsu uvua ne bua kuitaba ne: ndi musue kuitaba Maweja-Nangila, kukumbaja ne muoyi wanyi mujima, ne bukole buanyi buonsu, meyi ende, mikenji yende ne mikandu yende. Ndi musue kukumbaja kabidi bionsu bidibu bafunde mu mukanda wa ndondu.

³²Mukalenga Yoshiya kuela diyi ne: “Bena Yerushalayime ne bena Binyamine bonsu bitabe ndondu ewu.” Biangatshile musangu ewu, bena Yerushalayime kukumbaja ndondu uvuabu batue ne Maweja-Nangila Mvidi Mukulu wa bankambua babu.

³³Yoshiya kujikija buenzayi buvua butampakana mu buloba bua bena Izrayele. Kuambilaye bantu bonsu, bua batendelele Maweja-Nangila Mvidi Mukulu wabu. Nanku, patshivua mukalenga Yoshiya ne muoyi, muntu nansha umue kavua mubenge Maweja-Nangila Mvidi Mukulu wa bankambua babu to.