Read Tshiluba 2 Kulondolola 35 Bible Online

2 Kulondolola 35 - Tshiluba bible

2 Kulondolola 35

¹Yoshiya kuenza mu Yerushalayime tshibilu tshia Dipita dia Maweja-Nangila bua kutendelela Mvidi Mukulu. Matuku dikumi ne anayi a ngondu wa kumpala wa tshidimu, kukosabu mikoku mitu bua tshibilu atshi.

²Yoshiya kulongolola malu bua batuangaji bakumbaje tshiakabidi midimu yabu yonsu. Kubakoleshaye kabidi ku muoyi, bua benze midimu ya mu nzubu wa Mvidi Mukulu anu bimpe.

³Bena Levi bavuabu bajidile bua benzele Maweja-Nangila mudimu ne bua balongeshe bantu, Yoshiya kubambila ne: — Nuteke mushete wa tshijila wa Maweja-Nangila mu nzubu wa Mvidi Mukulu, uvuabu base kudi Shelomu, muana wa Davide, mukalenga wa bena Izrayele. Kanuena mua kuambula kabidi mushete ewu pa makaya enu to. Mpindiewu nuenzele Maweja-Nangila Mvidi Mukulu wenu ne bantu bende bena Izrayele mudimu.

⁴Nuenze midimu yenu, mishilangane muaba bilondeshile meku enu ne bisumbu bienu bia mudimu, anu mudibu bafunde kudi Davide mukalenga wa bena Izrayele ne kudi muanende Shelomu.[203]

⁵Diku dionsu dia bena Levi nedikuate mudimu muaba wa tshijila, bua kuambuluisha bena Izrayele, bilondeshile meku abu.

⁶Nudi ne bua kulambula milambu ya Dipita dia Maweja-Nangila. Nanku, umbushayi mikiya yenu, nuambuluishe bana benu bena Izrayele, bua tshibilu tshienzeke anu bilondeshile mikenjiivua Maweja-Nangila muambile Moshe.

⁷Yoshiya kuangata ku bimuna biende, bana ba mikoku ne ba mbuji binunu makumi asatu, ne ngombe binunu bisatu. Kupeshabu bena Izrayele bavua muaba awu nyama ayi, bua benze tshibilu tshia Dipita dia Maweja-Nangila.

⁸Balombodi ba mu bukalenga bua Yoshiya, kufila kabidi ku budisuile buabu, bimuna bu muvuabu basue, bua kuambuluisha bena Izrayele, batuangaji ne bena Levi. Ilkiya, Zekarya ne Yekiyele, batangidi ba mu nzubu wa Mvidi Mukulu, kupeshabu batuangaji bimuna ebi: bana ba mikoku ne ba mbuji binunu bibidi ne nkama isambombu, ne ngombe nkama isatu, bua milambu ya Dipita dia Maweja-Nangila.

⁹Balombodi ba bena Levi: Konaniya ne bana babu Shemaya, Netaneyele, kabidi ne Ashabiya, Yeyele, Yozabade, bavua bapesha bena Levi bana ba mikoku ne ba mbuji binunu bitanu, ne ngombe nkama itanu.

¹⁰Tshibilu atshi bavua batshienza mushindu ewu: batuangaji bavua bimane miaba yabu ya midimu, bena Levi bimane mu bisumbu biabu bu muvua mukalenga Yoshiya muambe.

¹¹Bantu kukosa mitu ya bana ba mikoku ne ya bana ba mbuji. Bavua bapesha batuangaji mashi a nyama eyi. Batuangaji bavua bamiamina mashi awu ku tshilambuilu. Bena Levi kusaya nyama ayi kumusha biseba.

¹²Kusungulabu nyama mikuabu, nangananga ngombe milume idi bena Izrayele ne bua kulambula Maweja-Nangila bu mulambu wa kuosha, bilondeshile meku abu, anu bu mudibu bafunde mu mukanda wa mikenji ya Moshe.

¹³Kuoshabu mukapia[204] munyinyi wa muana wa mukoku wa tshibilu tshia Dipita dia Maweja-Nangila, bu mvua tshibidilu tshiabu. Kadi minyinyi mikuabu ya tshijila bavua bayilambila mu ngesu, mu bipanza ne mu bintu bikuabu bia kulambila. Pashishe, bavua bakadila bena Izrayele bonsu munyinyi awu lukasa.

¹⁴Pashishe, bena Levi bavua balongolola bintu bivua batuangaji ne bua kupeta, ne bivuabu bobu mene ne bua kudia. Bualu batuangaji, ndelanganyi ya Arone, bavua benza mudimu wa kulambula milambu ya kuosha, ne mafuta a milambu mikuabu too ne ku dilolu. Ke muvua bena Levi balambe biakudia.

¹⁵Bimbi ba misambu, ba ku ndelanganyi ya Ashafe, bavua bashala pa miaba yabu ya mudimu, bilondeshile diyi dia Davide ne dia Ashafe, Emane ne Yedutune, bafidi ba ngenyi[205] ba mukalenga. Balami ba tshiibi, bavua bashala kabidi anu pa miaba yabu. Muntu nansha umue kavua ne bua kumuka pa mudimu wende, bualu bena Levi bakuabu bavua babalambila biakudia biabu.

¹⁶Nanku, dituku adi, bavua balongolola bionsu anu bua kutumbisha Maweja-Nangila. Bavua badia didia dia tshibilu tshia Dipita dia Maweja-Nangila, balambula kabidi milambu pa tshilambuilu tshia Maweja-Nangila, amu bilondeshile muvua mukalenga Yoshiya mulongolole amu.

¹⁷Bamane kujikija tshibilu tshia Dipita dia Maweja-Nangila, bena Izrayele bavua muaba awu, kuenzabu tshibilu matuku muanda mutekete tshia Mampa kaayi mela buanga.[206]

¹⁸Bena Izrayele kabavua banji kuenza kabidi tshibilu tshia Dipita dia Maweja-Nangila tshia mushindu ewu, katshia biangatshile ku tshikondu tshia muambi Samuwele. Mukalenga wa bena Izrayele nansha umue kavua muanji kulongolola tshibilu tshia mushindu ewu, bu muvuabu balongolole kudi Yoshiya, bamuambuluishe kudi bena Levi, bena Yerushalayime, bena Yuda ne bena Izrayele bakuabu bavua muaba awu.

¹⁹Tshibilu tshia Dipita dia Maweja-Nangila atshi, bavua batshienze pavua mukalenga Yoshiya mumane kulala mu bukalenga bidimu dikumi ne muanda mukulu.[207]

²⁰Dituku dikuabu, Yoshiya mumane kulongolola nzubu wa Mvidi Mukulu, Neko, mukalenga wa bena Ejipitu, kuya ne bena mvita bende ku Karkemishe, ku musulu wa Perate, bua kuluangenaku mvita. Yoshiya kavua musue ne: bena Ejipitu bapitshile mu ditunga diende to.

²¹Kadi Neko kutuma bantu bua kumukonka ne: “Mukalenga wa bena Yuda, udi ubenga bua meme kupitshila mu njila ewu bua tshinyi? Tshiena mfika lelu bua kuluangana nebe to. Ndi nduangana ne muluishi mukuabu.[208] Mvidi Mukulu mmuntumine diyi dia kuya lukasa. Mvidi Mukulu udi nanyi. Lekela kubenga diyi diende, bualu udi mua kukushipesha.”

²²Kadi Yoshiya uvua anu musue kuluisha Neko. Kavuamuteleje miaku ivuabu bamutumine kudi Mvidi Mukulu mene. Yoshiya kuvuala bilamba bia muntu mukuabu bua kabamumanyi. Kuyaye mu mpata wa Megido[209] bua kuluangana mvita.

²³Pavuabu baluangana mvita, kumuasabu mukete. Kuambilaye bena mudimu bende ne: — Ngambulayi, bualu tshiena mumvue bimpe.

²⁴Bena mudimu bende kumumusha mu ditempu diende dia mvita, kumuteka mu ditempu diende dikuabu. Kuyabu nende mu Yerushalayime. Kutuilaye mu tshimenga atshi. Kumujikabu mu lukita lua bankambua bende. Bena Yerushalayime ne bena Yuda bonsu kumudila.

²⁵Muambi Yirmeya kuenza kasala ka madilu a lulu lua Yoshiya. Biangatshile musangu awu, too ne ku lelu, bimbi ba misambu, balume ne bakaji, bonsu badi bimba, batela dina dia Yoshiya mu miadi yabu. Bikadi bishale tshibidilu mu Izrayele. Badi bafunde Miaku ya Misambu eyi mu mukanda wa Miadi.[210]

²⁶Malu makuabu a mukalenga Yoshiya mbaafunde mu mukanda wa bakalenga ba bena Izrayele ne ba bena Yuda.[211] Mbafundemu muvua mukalenga Yoshiya mukumbaje malu avuabu bafunde mu mikenji ya Maweja-Nangila.