Read Tshiluba 2 Kulondolola 36 Bible Online

2 Kulondolola 36 - Tshiluba bible

2 Kulondolola 36

¹Mu Yerushalayime, bena Yuda kusungula Yowakaze, muana wa Yoshiya, bua apingane tatuende mu bukalenga.

²Yowakaze kubuela mu bukalenga muikale ne bidimu makumi abidi ne bisatu. Kushalaye mu bukalenga anu ngondu isatu mu Yerushalayime.

³Neko, mukalenga wa bena Ejipitu, kumusha Yowakaze mu bukalenga mu Yerushalayime. Neko kututshisha bena ditunga dia Yuda tshibawu tshia biamu bitoke bia mushinga mukole kilo binunu bisatu, ne tshia tshiamu tshia mpawungi kilo makumi asatu.

⁴Pashishe, Neko kusungula Eliyakime, muanabu ne Yowakaze, bua kushalaye mukalenga mu Yerushalayime, ne mu ditunga dia Yuda. Nekokushintulula dina dia Eliyakime, kumuinyika Yowakime. Neko kuya ne muanabu Yowakaze mu Ejipitu.[212]

⁵Yowakime[213] kubuela mu bukalenga muikale ne bidimu makumi abidi ne bitanu. Kushalaye mu bukalenga bidimu dikumi ne tshimue mu Yerushalayime. Yowakime uvua wenza malu adi Maweja-Nangila Mvidi Mukulu wende mubenge.

⁶Nebukadnesare, mukalenga wa Babilone, kubuela ne mvita mu ditunga dia Yowakime. Kuelaye Yowakime mu lukanu, kuya nende ku Babilone.[214]

⁷Kuangataye kabidi bintu bishilangane bia mu nzubu wa Mvidi Mukulu, kuya nabi mu Babilone mu nzubu wende wa bukalenga.[215]

⁸Malu makuabu a Yowakime mbaafunde mu mukanda udibu binyike ne: Malu adi bakalenga ba bena Izrayele ne ba bena Yuda benze.[216] Badi bafundamu buenzayi buvuaye muenze, buvua bufikisha Maweja-Nangila munda, ne malu onsu avua mamuenzekele. Muanende wa balume Yowakine kupingana tatuende Yowakime mu bukalenga.

⁹Yowakine kubuela mu bukalenga muikale ne bidimu muanda mukulu.[217] Kushalaye mu bukalenga mu Yerushalayime anu ngondu isatu ne matuku dikumi. Uvua wenza malu adi Maweja-Nangila mubenge.

¹⁰Ku ntuadijilu wa tshidimu, Nebukadnesare kutuma bena mvita bua bakuate Yowakine, bamufite ku Babilone ne bintu bia mushinga mukole bia mu nzubu wa Maweja-Nangila. Nebukadnesare kusungula Sedekiya muanabu ne Yowakine, bua kushalaye mukalenga wa bena Yerushalayime ne wa bena Yuda.[218]

¹¹Sedekiya[219] kubuela mu bukalenga muikale ne bidimu makumi abidi ne tshimue. Kushalaye mu bukalenga bidimu dikumi ne tshimue mu Yerushalayime.

¹²Uvua wenza malu adi Maweja-Nangila Mvidi Mukulu wende mubenge. Uvua mubenge kutonda bubi buende kumpala kua muambi Yirmeya, uvua umumanyisha malu avua Maweja-Nangila muambe.

¹³Mukalenga Nebukadnesare uvua mulombe mukalenga Sedekiya bua amuitabe, aditshipe, atele dina dia Maweja-Nangila. Kadi, nansha Nebukadnesare muenze nanku, Sedekiya uvua amu mumutombokele.[220] Uvua ne tshitunu, mubenge mushidishe, kayi musue kupingana kudi Maweja-Nangila Mvidi Mukulu wa bena Izrayele.

¹⁴Kabidi balombodi ba batuangaji ba bena Izrayele bonsu, bavua anu batombokela Mvidi Mukulu. Bavua balonda bibidilu bibi bia bantu ba bisamba bikuabu bia kutendelela mvidie. Bavua banyanga nzubu wa tshijila, uvua Maweja-Nangila mudijidile mu Yerushalayime.

¹⁵Maweja-Nangila Mvidi Mukulu wa bankambua ba bena Izrayele, uvua munange bikole bantu bende bena Izrayele, munange kabidi ne nzubu wende wa tshijila. Kutumaye bantu misangu ya bungi bua kumanyisha bena Izrayele majinga ende.

¹⁶Kadi bena Izrayele kuseka bambi ba Mvidi Mukulu, kubalembakaja, kulengulula meyi a Mvidi Mukulu. Nanku, Maweja-Nangila kubafikila munda, kubanyoka bikole kabayi mua kupanda to.

¹⁷Maweja-Nangila kutuma mukalenga wa Babilone[221] bua kukuata ditunga. Bantu bonsu kushala ku bumfumu bua mukalenga awu. Mukalenga awu kushipa bena mvita bonsu too ne bavua muaba wa tshijila. Kavua mushiye muntu nansha umue ne muoyi! Bansongalume, bansongakaji, bantu bakole ne bakulakaje, kufuabu bonsu.

¹⁸Kuangataye bintu bionsu binene ne bikese bivua mu nzubu wa Mvidi Mukulu, ne mu tshibutshilu tshia nzubu wa Mvidi Mukulu, ne tshia mukalenga Sedekiya ne tshia balombodi ba mu bukalenga buende. Kuyaye ne bintu bionsu abi ku Babilone.

¹⁹Bena Babilone kuosha nzubuvua Mvidi Mukulu. Kupulabu tshimana tshia Yerushalayime. Kuoshabu nzubu ya bukalenga. Kunyangabu bintu bionsu bia mushinga mukole biamu tshimenga.[222]

²⁰Mukalenga Nebukadnesare kuangata bantu bavua kabayi bafue mu mvita, kuya nabu muende mu Babilone. Kushalabu bapika bende ne ba ndelanganyi yende, too ne ku dibuela dia bena Persa mu bukalenga.

²¹Nanku, miaku ya Maweja-Nangila kukumbana, ivua muambi Yirmeya muambe ne: “Ditunga nedishale munda mutupu bidimu makumi muanda mutekete, too ne pajika matuku a Dikisha, avua bena Izrayele babenge kuikisha.[223]”

²²Mu tshidimu tshia kumpala[224] tshia bukalenga bua Koreshe, mukalenga munene wa bena Persa, Maweja-Nangila kukumbaja miaku yende ivua muambi Yirmeya muambe. Maweja-Nangila kupesha Koreshe meji a kuela diyi mu bukalenga buende buonsu, kabidi a kufundisha miaku eyi ne:

²³“Koreshe, mukalengamunene wa bena Persa, udi wamba ne: Maweja-Nangila Mvidi Mukulu wa mu diulu, mmuteke makalenga onsu a pa buloba ku bumfumu buanyi. Mmungambile bua kuibakulula nzubu wa Mvidi Mukulu mu Yerushalayime, mu ditunga dia Yuda. Bantu bonsu bena tshisamba tshia Maweja-Nangila, badi munkatshi muenu bapingane mu Yerushalayime. Maweja-Nangila Mvidi Mukulu ikale nabu, abalame!”