Read Tshiluba 2 Kulondolola 6 Bible Online

2 Kulondolola 6 - Tshiluba bible

2 Kulondolola 6

¹Ke Shelomu kuela diyi ne: “Maweja-Nangila, wewe uvua musue kusomba muaba wa midima!

²Kadi, meme ndi mukuibakile nzubu muimpe ewu, muaba wa wewe kusomba kashidi!”

³Bena Izrayele bonsu bamane kudisangisha, kuimanabu kulu. Mukalenga Shelomu ubatangila, kubelaye muoyi.[42]

⁴Pashishe kuambaye ne: — Ndi ngela Maweja-Nangila Mvidi Mukulu wa Izrayele tuasakidila! Yeye nkayende mmukumbaje bionsu bivuaye mulaye tatu wanyi Davide. Uvua mumuambile ne:

⁵“Biangatshile ku dituku dimvua mupatule bantu banyi mu Ejipitu, tshiena musungule tshimenga nansha tshimue munkatshi mua bimenga bia bena Izrayele,[43] bua nuenu kungibakilamu nzubu, muaba udibu mua kuntendelela. Tshiena musungule muntu nansha umue bua kuikalaye mfumu wa bantu banyi bena Izrayele.

⁶Kadi mpindiewu, ndi musungule Yerushalayime bua nuenu kuntendelelamu. Meme kukusungula wewe Davide bua kulombola bantu banyi.”

⁷Bushuwa, tatu wanyi Davide uvua muele meji a kuibakila Maweja-Nangila Mvidi Mukulu wa Izrayele nzubu wa tshijila.

⁸Kadi, Maweja-Nangila kumuambila ne: “Udi muele meji mempe bua kungibakila nzubu.

⁹Kadi, wewe kuena mua kungibakila nzubu to, anu muanebe wa balume. Eyowa, anu muanebe wa balume neangibakile nzubu ewu.[44]”

¹⁰Nanku, Maweja-Nangila mmukumbaje bionsu bivuaye mulaye. Meme ndi mupingane tatu wanyi Davide mu bukalenga. Ndi musombe mu nkuasa wa bukalenga wa bena Izrayele, bu muvua Maweja-Nangila muambe. Kabidi ndi muibake nzubu ewu wa tshijila wa Maweja-Nangila Mvidi Mukulu wa bena Izrayele.

¹¹Ndi mutekemu mushete udi ne mabue a ndondu, uvua Maweja-Nangila mutue ne bena Izrayele.

¹²Pashishe, Shelomu kuimana kumpala kua tshilambuilu tshia Maweja-Nangila, bena Izrayele bonsu batangile. Kuelaye bianza mulu bua kutendelela.

¹³Shelomu uvua muenzeje tshitaku tshia tshiamu tshikunze tshivuabu bateke munkatshi mua lubanza lua nzubu wa Mvidi Mukulu. Tshitaku atshi tshivua ne metre abidi ne tshitupa mu bule ne mu butshiama, metre umue ne tshitupa mu butumbuke. Shelomu kubandapu, kutua binu, muaba uvua bena Izrayele bonsu mua kumumona. Kuelaye bianza mulu, utendelela Maweja-Nangila,

¹⁴wamba ne: — Maweja-Nangila Mvidi Mukulu wa bena Izrayele, kakuena Mvidi Mukulu mu diulu nansha pa buloba bu wewe. Udi uvuluka ndondu uuvua mutue ne bantu bebe. Udi unanga, wenzela bimpe, bonsu badi bakuitaba ne muoyi umue.

¹⁵Wewe udi muenzele tatu wanyi bionsu biuvua mumulaye. Eyowa, lelu udi mukumbaje bionsu biuvua mumulaye.

¹⁶Nanku, Maweja-Nangila Mvidi Mukulu wa bena Izrayele, ukumbaje kabidi malaya makuabu, auvua mulaye tatu wanyi Davide, muntu webe. Uvua mumuambile ne: “Pikala ndelanganyi yebe mingitabe, mienze tshindi musue, bu muuvua wewe muenze, ndi nkujadikila ne: misangu yonsu, muntu wa ku ndelanganyi yebe neakupingane mu bukalenga, bua kushala mukalenga wa bena Izrayele.[45]”

¹⁷Nanku Maweja-Nangila Mvidi Mukulu wa bena Izrayele, mpindiewu ndi nkusengelela bua ukumbaje bualu ebu, buuvua mulaye tatu wanyi Davide, muntu webe!

¹⁸“Kadi, bulelela Maweja-Nangila udi mua kusomba ne bantu pa buloba anyi? Diulu, nansha mudidi dinene, didi amu dikese bualu buende. Nansha kazubu ka Mvidi Mukulu kandi muibake aka, kadi kakese katambe.[46]

¹⁹Nanku Maweja-Nangila Mvidi Mukulu wanyi, tangila kundi, umvua mundi nkusengelela. Eyowa, uteleje mundi nkubikila muanyi muonsu.

²⁰Utabale, ulame nzubu ewu bimpe, butuku ne munya, amu ne muoyi wa kalolu. Bualu uvua mumane kuamba ne: ke muaba undi ndilejila kudi bantu.[47] Teleja mundi nkutendelela mu nzubuemu.

²¹Teleja mundi nkusengelela, ne mudi bantu bebe bena Izrayele bakusengelela, batangile ku nzubu ewu. Nanku Maweja-Nangila, mu diulu muudi musombe, ututeleje, ujimije mibi yetu.

²²“Padibu bafunda muntu ne: mmuenzele mukuende bibi, badi mua kufika nende mu nzubu webe emu, bua kuditshipaye kumpala kua tshilambuilu tshiebe, bua ajadike mudiye kayi ne bualu.

²³Diba adi, wewe Maweja-Nangila udi mu diulu, wikale muteleje, ukose tshilumbu tshia bena mudimu bebe, bua muena tshibawu apete dinyoka, bua udi mubinge amueneke ne: kena ne bualu.

²⁴“Padi bena Izrayele bakutombokela, badi mua kubatshimuna kudi baluishi babu. Padi bena Izrayele bakulomba bua wewe kubafuila luse, bakutumbisha, bakutendelela mu nzubu emu,

²⁵wewe Maweja-Nangila udi mu diulu, wikale muteleje. Ubajimijile mibi yabu. Ubapingajile maloba auvua mumane kupesha kale bankambua babu, mubapeshe ne bobu kabidi, bualu bena Izrayele mbantu bebe.

²⁶“Padi bena Izrayele bakutombokela, wewe mukandike bua mvula kaloki, kadi bena Izrayele batangile ku nzubu eku bua kukutendelela ne kukutumbisha, padibu badipuekesha, balekela kukutombokela,

²⁷wewe Maweja-Nangila udi mu diulu wikale muteleje. Ubajimijile mibi yabu, bualu bena Izrayele mbena mudimu bebe, kabidi mbantu bebe. Ubalongeshe kabidi mua kukutumikila bimpe. Pashishe, ulokeshe mvula pa buloba buebe ebu, bualu uvua mumane kubupesha bena Izrayele.

²⁸“Padi tshiyole tshia nzala tshibuela mu ditunga, nansha tshipupu tshia disama dia tshiambu, padi munanga mumishe ntete ya kuenza bukula, nansha padi mvula unyanga bia pa madimi, padi mpasu ya mukumbi nansha ya mishindu mikuabu, mibuele mu ditunga mipite bungi, baluishi bakengesha bena Izrayele, babipata ne muaba mene udibu basokome mu bimenga biabu bivuabu bakoleshe ne bimana, tshipupu nansha disama dia tshiambu bibuela mu ditunga,

²⁹padi bantu bebe bena Izrayele banyingalala, badiumvua ne: tudi benze bibi, padibu bakutendakena, batangile ku nzubu eku, bela bianza mulu bua kukutendelela,

³⁰wewe Maweja-Nangila udi musombe mu diulu, wikale muteleje. Ubafuile luse, wenzele muntu yonsu bilondeshile nsombelu wende. Bualu wewe nkayebe udi mumanye meji adi mu muoyi wa muntu. Bushuwa, wewe nkayebe udi mumanye malu adi mu mioyi ya bantu.

³¹Wenzele bena Izrayele nanku, bua balame meyi ebe, bakunemeka kashidi, matuku onsu adibu ne muoyi pa buloba ebu, buuvua mumane kupesha bankambua betu.

³²“Padi muenyi udi kayi wa mu tshisamba tshia bena Izrayele, mufume ku ditunga dia kule, mubuele mu nzubu emu bua kukutendelela, yeye mumane kumvua muudi wewe Mvidi Mukulu munene wa bukole buonsu, wenza bishima,

³³wewe Maweja-Nangila udi musombe mu diulu, wikale muteleje. Umupeshe tshintu tshidiye ukulomba. Nanku, bantu ba bisamba bionsu bia pa buloba nebakumanye. Nebalonge mudibu mua kukunemeka, mudi bantu bebe bena Izrayele bakunemeka. Nebajadike ne: nzubu ewu undi muibake, ke muaba udibu ne bua kukutendelela.

³⁴“Wewe mutume bena Izrayele mu mvita, bua kuluangana ne baluishi babu, padi bena Izrayele bakudimuke batangile Yerushalayime uuvua mumane kusungula, batangile ku nzubu ewu undi mukuibakile, bakutendelela,

³⁵mu diulu muudi musombe, wikale mubateleje. Umvue mudibu bakulomba, bakusengelela. Nanku ubambuluishe.

³⁶“Padi bena Izrayele bakutombokela, — bualu kakuena muntu nansha umue udi kayi mua kuenza bibi, — misangu mikuabu udi mua kubafikila munda, kubafila mu bianza bia baluishi babu bua baluishi babu abu baye nabu mu bupika mu ditunga diabu, nansha diodi dikale mutantshi mule.

³⁷Kadi padi bena Izrayele, mu ditunga mudibu mu bupika, badiela meji badikonka, batuadija kukutendelela, bamba ne: ‘Tudi batombokele Maweja-Nangila. Tudi benze bibi, tudi bena tshibawu’,

³⁸bobu bakulomba ne muoyi wabu mujima bua wewe kubafuila luse mu ditunga mudibu mu bupika, bobu bakudimuke batangile ku ditunga diuvua mumane kupesha bankambua babu, batangile ku Yerushalayime, tshimenga tshiuvua musungule, ne ku nzubu ewu undi mukuibakile, bobu bakutendelela,

³⁹nanku, wewe Maweja-Nangila udi musombe mu diulu, wikale muteleje. Umvua mudibu bakulomba, bakusengelela. Nanku ubambuluishe. Ubafuile luse bua malu mabi onsu adibu bakuenzele.

⁴⁰“Mvidi Mukulu wanyi, tabala! Umvua mundi nkutendelela mpindiewu mu nzubu emu.

⁴¹Mpindiewu, Maweja-Nangila Mvidi Mukulu, juka, shindikija mushete wa tshijila, muaba uudi uleja bukole buebe. Ubuele muaba ewu uudi mua kuikisha. Maweja-Nangila Mvidi Mukulu, ambuluishe batuangaji bebe, bikale bakanyine bilamba biabu bia lumu, batupeteshe lupandu, bantu badi bakuitaba, basanke, bapete diakalenga.

⁴²Maweja-Nangila Mvidi Mukulu, kubengi mukalenga uudi mujidile, uvuluke bilenga bionsu biudi muenze, biudi muenzele muntu webe Davide.[48]”