Read Tshiluba 2 Kulondolola 8 Bible Online

2 Kulondolola 8 - Tshiluba bible

2 Kulondolola 8

¹Bidimu makumi abidi bimane kukumbana, Shelomu kujikija nzubu wa Mvidi Mukulu ne wende wa bukalenga.

²Diba adi, Shelomu kuibakulula kabidi bimenga bivua mukalenga Irame wa mu ditunga dia Tire mumupe. Kutumaye kabidi bena Izrayele bua kusombamu.

³Pashishe, Shelomu kuvua kuluisha Amate-Soba,[53] kukuata ditunga adi.

⁴Kuibakululaye tshimenga tshia Tadmore[54] mu tshipela. Kuibakululaye kabidi ne bimenga bivuaye muase mu buloba bua Amate bua kutekamu mayeba ende.

⁵Shelomu uvua muibakulule kabidi bimenga bia Bete-Orone wa ku mutu ne Bete-Orone wa kuinshi. Bimenga ebi bavua babibaka ne bimana bikole, kabidi ne biibi bikole bikanga ne milonda.

⁶Uvua muibakulule ne Baalate, ne bimenga bionsu bivuaye muteke mayeba, matempu ende a mvita, ne nyama yende ya tubalu. Nanku, Shelomu kuibaka bintu bionsu bi-vuaye musue kuibaka mu Yerushalayime, pa mukuna wa Lebanone, ne mu ditunga dijima divua ku bumfumu buende.

⁷Mu ditunga amu mutshivua bantu ba bisamba bikuabu: Ke bena Iti, bena Amore, bena Perizi, bena Ivi ne bena Yebusa, mmumue ne bantu bonsu bavua kabayi bena Izrayele to.

⁸Bisamba ebi bivua bishale mu ditunga, bualu bena Izrayele kabavua babibutula to. Bantu ba bisamba ebi ke bavua Shelomu wenzeja midimu. Batshidi babenzejayi too ne mpindiewu.

⁹Kadi Shelomu kavua wenzeja bena Izrayele midimu ayi to. Uvua mubangate[55] amu ku mudimu wa bena mvita, bikale ne mianzu mishilangane: ya balombodi, ya bendeshi ba matempu a mvita, ne ya babandi ba pa nyama ya tubalu.

¹⁰Bamfumu ba maloba kusungula bantu nkama ibidi ne makumi atanu, bua bikale batangila bantu bonsu bavua benzela Shelomu midimu mishilangane.

¹¹Shelomu kutumina mukajende, muana wa mukalenga wa bena Ejipitu, diyi bua umuke mu Tshimenga tshia Davide, aye kusomba mu nzubu wa bukalenga uvuabu bamuibakile. Mukalenga Shelomu kuamba ne: “Nansha mukajanyi kena mua kusomba kabidi mu nzubu wa bukalenga wa Davide, mukalenga wa bena Izrayele to, bualu nzubu mene idibu bateke mushete wa tshijila wa Maweja-Nangila idi anu ya tshijila.”

¹²Biangatshile musangu awu, mukalenga Shelomu uvua ulambula Maweja-Nangila milambu ya kuosha pa tshilambuilu tshivuaye mumuashile, kumpala kua muaba wa tshijila.

¹³Bilondeshile mikenji ivua Moshe mumane kujadika bua dituku dionsu dia bualu, Shelomu uvua ulambula milambu dituku dia Dikisha, dituku dia kumpala dia ngondu, ne mu bibilu bisatu binene bia ku tshidimu: Dituku dia Mampa kaayi mela buanga, dia Dinowa biakudia, ne dia tuzubu tua Bisasa.[56]

¹⁴Shelomu uvua ukumbaja malu avua tatuende Davide muambe. Uvua uteka bisumbu bia batuangaji mu midimu yabu. Pashishe uvua uteka bena Levi bua bikale batumbisha Maweja-Nangila diba dionsu, nansha bambuluisha batuangaji mu mudimu wabu. Uvua muteke kabidi balami ba biibi. Tshiibi tshionsu tshikale ne tshisumbu tshia balami batshi. Ke muvua Davide, muntu wa Mvidi Mukulu, muambe nanku.[57]

¹⁵Midimu yonsu ya batuangaji, nansha ya bena Levi, bavua bayenza amu muvua Davide muambe, too ne ya kulama biuma bia mu ditunga.

¹⁶Midimu yonsu ya Shelomu ivuaye musue kuenza, kukumbanayi muvuaye muyilongolole, biangatshile ku tshitaku tshia nzubu wa Mvidi Mukulu too ne midimu ya dijikija nzubu awu kulu. Nzubu wa Mvidi Mukulu uvua muimpe mutambe.

¹⁷Pashishe, Shelomu kuyaku Eshiyone-Ngebere ne ku Elate, muaba uvua bantu basabukila ku Mayi manene makunze mu ditunga dia Edome.

¹⁸Mukalenga Irame uvua mutumine Shelomu bantu ba bena Fenisiya bavua bamanye mua kuita matu bikole. Bitshi ba matu abu, pamue ne bitshi ba matu ba Shelomu, kuya mu ditunga dia Ofire.[58] Bavua bakadila mukalenga Shelomu tshiamu tshia mpawungi tshia mu ditunga adi, tshia kilo binunu dikumi ne bisatu ne pa mutu.