Read Tshiluba Ezra 3 Bible Online

Ezra 3 - Tshiluba bible

Ezra 3

¹Bena Izrayele bonsu bamane kusomba mu bimenga biabu, kumvuanganabu diyi dimue dia kusangila bonsu mu Yerushalayime, ngondu wa muanda mutekete wa tshidimu.[12]

²Mutuangaji Yeshuwa, muana wa Yoshadake, pamue ne batuangaji bakuabu, bana babu, kabidi ne Zerubabele, muana wa Sheyaltiyele, ne bana babu, kutuadijabu kuibakulula tshilambuilu tshia Mvidi Mukulu wa bena Izrayele, bua bamone mua kulambuilapu milambu ya kuosha, bu mudibu balombe mu mikenji ya Moshe, muntu wa Mvidi Mukulu.[13]

³Bantu bavua bafume mu bupika, nansha muvuabu batshina bantu bavua baye kuasa mu ditunga, patshivuabu bobu mu Babilone, bavua bibake tshiakabidi tshilambuilu muaba uwatshi kale. Bavua balambuilapu Maweja-Nangila milambu ya kuosha dinda ne dilolu.[14]

⁴Pashishe, bena Izrayele kuenza tshibilu tshia tuzubu tua Bisasa, bu mudibu bafunde. Bavua balambula milambu ya kuosha[15] bungi bukumbane ku dituku dionsu.

⁵Bituadija tshikondu atshi, bavua balambula milambu ya ku dituku ku dituku, kabidi ne milambu mikuabu idibu bafunde bua kulambula dituku dia kumpala dia ngondu yonsu, ne matuku a bibilu bia Maweja-Nangila, kabidi ne milambu mikuabu ya budisuile idi bantu bakadila Maweja-Nangila.[16]

⁶Nanku, biangatshile dituku dia kumpala dia ngondu wa muanda mutekete, kutuadijabu kulambula Maweja-Nangila milambu ya kuosha, kabayi banji kuibaka tshitaku tshia nzubu mupiamupia wa Mvidi Mukulu.

⁷Pashishe, kufutabu bena midimu bua kusonga mabue ne kupanda mabaya. Kupeshabu kabidi bena Sidone ne bena Tire biakudia, biakunua ne mafuta bua babasabuile mitshi ya sedre ya mu Lebanone pa mayi manene, bua kuyifikisha pa tshisabu tshia Yafa[17] Koreshe, mukalenga munene wa bena Persa, ke uvua muanyishe bua benze bionsu ebi.

⁸Bobu bamane kupingana mu Yerushalayime, tshimenga tshivua ne nzubu wa Mvidi Mukulu, tshidimu tshijima tshimane kupita, mu ngondu muibidi[18] kutuadijabu mudimu kudi Zerubabele, muana wa Sheyaltiyele, Yeshuwa, muana wa Yoshadake, bana babu batuangaji bakuabu, bena Levi, ne bonsu bavua bafume ku bupika. Kutekabu bena Levi bavua ne bidimu bituadije ku makumi abidi ne pa mutu, bua kulombola midimu ya kuibaka nzubu wa Maweja-Nangila.

⁹Bena Levi aba ke: Yeshuwa, bana bende ne bana babu, Kadmiyele, wa mu diku dia Odavya ne bana bende. Bavua balombola pamue bena mudimu bavua basa nzubu wa Mvidi Mukulu. Bavua babambuluisha kudi bena Levi ba mu diku dia Enadade.[19]

¹⁰Pavua bibaki bakeba kuasa tshitaku tshia nzubu wa Mvidi Mukulu, kubikilabu batuangaji bamane kuvuala bilamba biabu bia mudimu wa batuangaji, bikale ne mpungi. Kubikilabu kabidi bena Levi, ndelanganyi ya Ashafe, bavua ne ndibu. Bonsu abu kutumbisha Maweja-Nangila, bilondeshile mikenji ya Davide, mukalenga wa bena Izrayele.[20]

¹¹Bavua bimba, batumbisha Maweja-Nangila, bapunguluja ne: “Maweja-Nangila udi muimpe, mmunange bena Izrayele kashidi!” Bena Izrayele kabidi bavua batumbisha Maweja-Nangila, bela mbila mikole.[21] Bavua basanka, bualu bantu bavua bibaka tshitaku tshia nzubu wa Mvidi Mukulu.

¹²Batuangaji bavule, bena Levi, ne bamfumu ba meku, bonsu bantu bakole bavua bavuluka muvua nzubu wa Mvidi Mukulu wa kale, kudilabu bikole, pavuabu bamone bantu bibaka tshitaku tshia nzubu wa Mvidi Mukulu mupiamupia. Kadi bantu bakuabu ba bungi, bavua basanka, batuta bikashi.

¹³Nanku, kabawa mua kusunguluja bikashi bivuabu bakuma bua disanka, ne miadi ya bakuabu bantu to. Bualu bantu bonsu bavua amu bela mbila mikole ivua yumvuika mutantshi mule.