Read Tshiluba Ezra 4 Bible Online

Ezra 4 - Tshiluba bible

Ezra 4

¹Bena lukuna ba bena Yuda ne ba bena Binyamine[22] kumvua lumu ne: bantu bavuabu baye nabu mu bupika, katshia bapingane, badi bibaka nzubu wa Maweja-Nangila Mvidi Mukulu wa bena Izrayele.

²Kufikabu bua kumonangana ne Zerubabele, kabidi ne bamfumu ba meku, bua kubambila ne: — Tudi basue kunuambuluisha bua kuibaka nzubu wa Mvidi Mukulu ewu. Bualu tudi tutendelela nenu Mvidi Mukulu umue, tumulambula milambu, katshia mukalenga wa bena Ashure, Asharadone watutuma munemu.[23]

³Kadi, Zerubabele, Yeshuwa, ne bamfumu bakuabu ba meku a bena Izrayele, kuandamuna ne: — Ki mbimpe bua nutuambuluishe bua kuibaka nzubu wa Mvidi Mukulu wetu to.[24] Tuetu nkayetu tudi mua kumuibaka, bualu nzubu ewu neikale wa Maweja-Nangila Mvidi Mukulu wa bena Izrayele. Ke mudibu bambe kudi mukalenga Koreshe, mukalenga munene wa bena Persa.

⁴Bantu bavua basomba mu ditunga, kutuadija kutekesha bena Yuda mu maboku, babakuatshisha kabidi ne bowa bua balekele kuibaka nzubu wa Mvidi Mukulu.

⁵Matuku onsu avua Koreshe, mukalenga munene wa bena Persa mu bukalenga, too ne matuku avua Daryaveshe[25] mu bukalenga, bavua bapesha bafidi ba ngenyi ba mu lubanza lua mukalenga makuta, bua bafile ngenyi kudi mukalenga ya ne: bena Yuda kabatungunuki ne dibaka dia nzubu wa Mvidi Mukulu to.

⁶Ku ntuadijilu wa bukalenga bua Ahashaveroshe[26] bena lukuna ba bena Yuda kutumina Ahashaveroshe mukanda, basonguela bena Yuda ne bena Yerushalayime.

⁷Bishelame, Mitredate, Tabeyele ne balunda babu, kufundila kabidi Artashasta, mukalenga munene wa bena Persa mukanda. Mukanda awu bavua baufunda ne maleta a bena Arame, kabidi mu muakulu wa bena Arame.[27]

⁸Rekume, mulombodi wa ditunga, ne Shimeshayi tshindonda tshiende, kufundila kabidi mukalenga munene Artashasta mukanda bua malu adi atangila Yerushalayime. Mukanda awu uvua utuadija nunku:

⁹“Meme Rekume, mulombodi wa ditunga, ne Shimeshayi tshindonda tshianyi, tudi tufunda mukanda ewu mu dina kabidi dia balombodi nanyi ba mu matunga: a mu Dine, Afarsatake, Tarpele, Afarase, Ereke, Babilone, Suze, Deka, Elame,[28]

¹⁰ne mu dina dia bantu bakuabu bavuabu baye nabu mu bupika kudi Asnapare,[29] muntu munene wa lumu, badi basomba mu bimenga bia mu Samariya, nansha mu buloba budi luseke ludi diba dibuelela lua musulu wa Perate, a.n.”

¹¹Mu mukanda awu bavua bafunde ne: “Artashasta, mukalenga munene, tuetu bena mudimu bebe, badi basomba luseke ludi diba dibuelela lua musulu wa Perate, a.n.

¹²“Mukalenga, tudi tukumanyisha ne: bena Yuda badi bumuke kuebe, bafike kuetu kunu ku Yerushalayime, badi basue kuasulula tshimenga etshi tshibi tshia bantomboji. Badi benzulula tshitaku, babandisha ne bimana.

¹³Kadi, Mukalenga, umanye ne: padi bena tshimenga etshi batshiasulula, babandisha bimana biatshi, nebalekele kulambula bitadi, nansha biobi bia mushindu kaayi. Nanku nebakepeshe bikole bungi bua biuma bidi bibuela mu mushete wa mukalenga munene.

¹⁴Nanku, tuetu baudi muanyishe bua tuikale ku bumfumu buebe[30] katuena basue kumona muntu ukupepeja to. Ke patudi tukulomba ne:

¹⁵ukebulule mu mikanda yonsu ya bakalenga bavua bakudianjidila mu bukalenga. Neupete mikanda idi ijadika ne: tshimenga etshi tshivua anu tshia bantomboji, tshivua amu tshitatshisha bakalenga banene, ne balombodi ba matunga. Misangu yonsu bena tshimenga etshi badi anu batomboka. Ke pavua bakalenga banene babutula tshimenga etshi.[31]

¹⁶Mukalenga munene, tudi nkujadikila ne: padibu basulula tshimenga etshi, babandisha bimana biatshi, kuakuikala kabidi mfumu wa buloba ebu budi luseke ludi diba dibuelela lua Perate to.”

¹⁷Artashasta, mukalenga munene, kuandamuna ne: “Wewe Rekume, mulombodi wa ditunga, ne Shimeshayi, tshindonda tshiebe, ne balombodi nebe badi mu Samariya ne mu buloba budi luseke ludi diba dibuelela lua musulu wa Perate, “Ndi nnuela muoyi, a.n.

¹⁸“Mukanda unuvua bantumine, bavua bawandamuna mu muakulu wetu, kuumbadilabu.

¹⁹Mvua mutume bantu bua bakebulule mu mikanda ya bukalenga. Bantu abu kusangana ne: bushuwa, kuonsu eku, bena Yerushalayime bavua anu batombokela bakalenga. Mu Yerushalayime mudi amu mitoyi ya mvita ne bifufu bia bantomboji.

²⁰Ku kale mu tshimenga amu muvua bakalenga ba bukitu bavua balombola buloba bujima buvua ku luseke ludi diba dibuelela lua musulu wa Perate. Bavua balambuishamu bitadi, bafutshisha milambu mishilangane.

²¹Kadi mpindiewu, nuambile bena Yuda ne: balekele midimu yabu. Kabena mua kuasulula tshimenga to, amu meme mutume diyi.

²²Kanuena mua kulengulula bualu ebu, bua bubi kabuvu kuvulangana, kadi bukalenga bulua kunyanguka.”

²³Rekume, tshindonda tshiende Shimeshayi, ne balombodi bakuabu, kubalabu mukanda uvua Artashasta, mukalenga munene, mubatumine awu. Nanku kuyabu lukasa mu Yerushalayime, kukandika bena Yuda ku bukole bua balekele kuasulula tshimenga.

²⁴Bavua balekela midimu ya kuasulula nzubu wa Mvidi Mukulu mu Yerushalayime, too ne mu tshidimu tshibidi tshia bukalenga bua Daryaveshe, mukalenga munene wa bena Persa?[32]