Read Tshiluba Nehemya 1 Bible Online

Nehemya 1 - Tshiluba bible

Nehemya 1

¹Telejayi malu adi Nehemya, muana wa Akalya, muenze. Badi bamanyisha Nehemya malu a mu Yerushalayime Artashasta mumane kushala mu bukalenga bidimu makumi abidi, mu ngondu wa Kislewu, meme Nehemya mvua musombe mu Shushane,[1] tshimenga tshinene tshia bukalenga, tshiyuabu bakoleshe ne bimana.

²Muanetu mukuabu Anani, ne bantu bavuaye nabu, bavua bumukila mu ditunga dia bena Yuda, bafika mu Shushane. Meme kubakonka malu a mu Yerushalayime, ne a bena Yuda bavua bapatuke mu bupika, bapingane muetu.[2]

³Kungambilabu ne: — Bantu bavua mu bupika.[3] mbasombe mu ditunga dia bena Yuda. Kadi badi mu dikenga dinene. Kabidi bantu badi babapeja bikole. Bimana bia tshimenga tshia Yerushalayime mbiupuke miaba mivule. Biibi biatshi mbiosha ne kapia.

⁴Meme mumane kumvua bionsu abi, ke meme kusomba bua kudila muadi. Meme kushala ne kanyinganyinga matuku a bungi, tshiyi ndia tshintu to. Meme kutendelela Mvidi Mukulu wa mu diulu,

⁵kumuambila ne: — Ndi nkusengelela Maweja-Nangila Mvidi Mukulu wa mu diulu, Mvidi Mukulu munene wa kutshina! Wewe udi ukumbaja ndondu webe ne bantu badi batumikila mikenji yebe. Kabidi bantu bonsu badi bakunanga, kuena ubalekela to.

⁶Maweja-Nangila Mvidi Mukulu, mpindiewu, untangile, unteleje, umvua mundi nkutendelelela, meme muntu webe. Butuku ne munya, ndi anu nkulomba bualu buetu tuetu bena Izrayele, bantu bebe. Ndi nkulomba bua wewe kutufuilaku luse, bua bibi bionsu bitudi benze. Eyowa, meme ne bankambua banyi tudi benza bibi.

⁷Tudi bakupende, bualu katuena bakumbaje meyi ebe, mikenji yebe, ne mikandu yebe, biuvua mutumanyishe kudi Moshe, muntu webe.

⁸Uvuluke meyi ebe avua Moshe mutuambile ne: “Nuenu kanuyi bangitabe ne muoyi umue, nennutangalaje munkatshi mua bisamba bikuabu.[4]

⁹Kadi, nuenu bapingane kundi, bakumbaje mikenji yanyi, nansha nuenu mu bupika ku ndekelu kua buloba, meme nennukebe, nnupingaje muaba umvua mumane kusungula bua meme kusomba.[5]’

¹⁰Maweja-Nangila, tudi bena mudimu bebe. Tudi bantu bebe! Uvua mutusungidile ku bukole buebe, bualu wewe udi muena bukole buonsu.

¹¹Maweja-Nangila, ndi nkusengelela ne: utelejeku mundi nutendelela, kabidi mudibu bakutendelela kudi bantu bebe bakuabu, badi ne disanka dia kukutumbisha. Wewe, ungendeshe diakalenga mu bionsu bindi musue kuenza lelu. Ungambuluishe bua mukalenga wa bakalenga angandamune bimpe. Tshikondu atshi, meme Nehemya mvua ntangila bantu bavua balongolola maluvu a mukalenga wa bakalenga.[6]