Read Tshiluba Nehemya 10 Bible Online

Nehemya 10 - Tshiluba bible

Nehemya 10

¹Bua malu onsu avua matuenzeke, tuetu bena Izrayele, tuetu kumyuangana kushindika bualu, kubufunda mu mukanda. Bamfumu, bena Levi, ne batuangaji betu, kufunda mena abu mu mukanda awu, kutua tshitampi.[66]

²Bavua bafunde mena abu mbobu aba: — Nehemya, muana wa Akalya, mulo mbodi wa ditunga. — Batuangaji bavua: Sedekiya,

³Seraya, Azariya, Yirmeya,

⁴Pashekure, Amanya, Malkiya,

⁵Atushe, Shebanya, Maluke,

⁶Arime, Meremote, Obadya,

⁷Daniyele, Nginetone, Baruke,

⁸Meshulame, Abiya, Miyamine,

⁹Mazya, Bilgayi ne Shemaya.

¹⁰Bena levi bavua: Yeshuwa, muana wa Azanya, Binuyi, wa mu tshiota tshia Enadade, Kadmiyele ne bana babu aba: Shebanya, Odya, Kelita, Pelaya, Anane, Mika, Rekobe, Ashabiya, Zakume, Sherebiya, Shebaniya, Odya, Bani ne Beninu.

¹⁵Bamfumu balombodi ba bantu bavua: Paroshe, Pakate-Mowabe, Elame, Zatu, Bani, Buni, Azgade, Bebayi, Adoniya, Bigvayi, Adine, Atere, Izkiya, Azure, Odya, Ashume, Beshayi, Arife, Anatote, Nebayi, Magpiyashe, Meshulame, Ezire, Meshezabele, Sadoke, Yaduwa, Pelatiya, Anane, Ananiya, Osheya, Ananiya, Ashube, Alokesha, Pila, Shobeke, Rekume, Ashabna, Masheya, Akiya, Anane, Anane, Maluke, Arime ne Baana.

²⁹Nanku, bantu bonsu kudisangisha nabu ku malaya abu awu. Bantu abu bavua: batuangaji, bena Levi, balami ba biibi, bimbi ba misambu, bena midimu mishilangane ba mu nzubu wa Mvidi Mukulu, kabidi ne tuetu, bakaji betu, bana betu ba balume ne ba bakaji bakavua bakole, bakavua bumvua bivua bienzeka ebi. Tuetu bonsu katuvua babuelakane ne bantu ba bisamba bikuabu bavua bashala mu ditunga, kadi tuvua batumikile mikenji ya Mvidi Mukulu.

³⁰Nanku tuetu ne bana betu bakuabu, bakulu betu, tuetu kuditshipa bua kutumikila mikenji ivua Mvidi Mukulu muambile Moshe muntu wende, ne bua kukumbaja majinga a Maweja-Nangila Mvidi Mukulu wetu, kulama mikenji yonsu, ne kulonda mibelu yende.

³¹Nanku, katuena basue kuselesha bana betu ba bakaji kudi bantu bavua bashale mu buloba buetu, patuvua mu bupika. Kabidi bana betu ba balume kabena mua kusela bakaji ba bantu aba to.[67]

³²Dituku dia Dikisha, nansha dia tshibilu, pikala bantu aba basue kusumbisha ntete ya kuenza bukula, nansha bintu biabu bia mu madimi, katuena tubisumba to. Pashishe, netulekele kudima tshidimu tshia muanda mutekete, netulekelangane kabidi mabanza.[68]

³³Tuetu kumyuangana bua kufila ku tshidimu ku tshidimu, kakanu ka tshiamu tshitoke tshia mushinga mukole ka bujitu bua grame inayi, bua midimu ya mu nzubu wa Mvidi Mukulu wetu.[69]

³⁴Tudi tuenza nanku, bua tumone mua kupeta mampa a kulambula Mvidi Mukulu, nyama ya milambu ya kuosha, bia mu madimi bia kulambula dituku dionsu, milambu ya kulambula dituku dia Dikisha, dia ngondu mupiamupia, nansha matuku makuabu a tshibilu, milambu mikuabu ya kukobolola, idi bena Izrayele balambula Mvidi Mukulu. Ne tshiamu tshitoke tshia mushinga mukole atshi, netufute kabidi bonsu badi balongolola nzubu wa Mvidi Mukulu wetu.

³⁵Nanku, tuetu batuangaji, bena Levi, bantu bakuabu, tuvua batshinke, babanyangane mu meku etu, mudimu wa kufila, munkatshi mua tshidimu, nkunyi bua nzubu wa Mvidi Mukulu wetu. Bualu mukenji udi wamba ne: ku tshidimu ku tshidimu, nufile nkunyi mikumbane bua kuosha milambu pa tshilambuilu tshia Maweja-Nangila Mvidi Mukulu[70] wenu.

³⁶Tshidimu tshionsu netufile kabidi mu nzubu wa Mvidi Mukulu bintu bia kumpala bia mu madimi, too ne bimuma bia mitshi yetu.[71]

³⁷Netulambule kabidi banabute betu, ne banabute ba bimuna bietu mu nzubu wa Mvidi Mukulu. Ke mudi mukenji[72] wamba. Banabute ba nyama ya ngombe, ya mikoku, ne bana ba mbuji yetu, netubifile mu nzubu wa Mvidi Mukulu, tubipesha batuangaji badi benza mudimu mu nzubu amu.

³⁸Nebipeshe kabidi batuangaji bukula buimpe, milambu ya bimuma, ya mvinyo mipiamipia ne ya mafuta. Nebiteke bionsu abi mu bibambalu bidi ku nzubu wa Mvidi Mukulu. Kadi bena Levi, nebapete tshia dikumi tshimue tshia bintu bia mu madimi etu,[73] Bobu nkayabu nebaye kudiangatshila tshia dikumi atshi mu misoku yetu, miaba idi madimi ebi.

³⁹Nanku mutuangaji wa ku ndelanganyi ya Arone, neaye ne bena Levi, bua kuangata tshia dikumi atshi. Bena Levi nebafike ne tshia dikumi atshi mu nzubu wa Mvidi Mukulu,[74] mu bibambalu mudibu bateka bintu bia mushinga.

⁴⁰Bena Izrayele ne bena Levi nebaye ne milambu ya ntete ya kuenza bukula, ya maluvu a mvinyo mapiamapia, ne ya mafuta, mu bibambalu abi, mudi kabidi bintu bia kuenza nabi mudimu muaba wa tshijila. Ke muaba udi kabidi batuangaji, balami ba ku biibi, ne bena misambu basombe, diba didibu bindila mudimu wa kuenza. Ke mutudi mua kuvuluka nzubu wa Mvidi Mukulu.