Read Tshiluba Nehemya 2 Bible Online

Nehemya 2 - Tshiluba bible

Nehemya 2

¹Artashasta, mukalenga wa bakalenga, mumane kushala mu bukalenga bidimu makumi abidi, dituku dikuabu, mu ngondu wa Nisane,[7] uvua musombe ku mesa. Meme Nehemya kuangata maluvu, kumuelela. Mvua anu mubungame. Katshia tshivua muanji kubungama muaba uvua mukalenga to.

²Nanku mukalenga wa bakalenga kunkonka ne: — Nehemya, udi mubungame bua tshinyi? Udi usama anyi? Tshidi tshikutonda ntshinyi? Meme kumvua bowa bua bungi.

³Ke meme kuambila mukalenga ne: — Mfumuanyi, ndi nkujingila diakalenga kashidi! Meme tshiena mua kuikala ne disanka to, bualu tshimenga tshidibu bajike bankambua banyi ntshinyangakaja, kabidi biibi biatshi mbiosha ne kapia.[8]

⁴Mukalenga kunkonka kabidi ne: — Udi musue nkuenzele tshinyi? Diakamue meme kutendelela Maweja-Nangila wa mu diulu.

⁵Pashishe, meme kuandamuna mukalenga ne: — Mfumuanyi, pawikala musue kumfuila luse, witabe bua meme kuya mu ditunga dia bena Yuda, mu tshimenga tshidibu bajike bankambua banyi, bua meme kuibakulula tshimenga atshi.

⁶Mukaji wa mukalenga wa bakalenga uvua musombe pamue ne bayende. Awu kunkonka kabidi ne: — Nehemya, neushale mu luendu matuku bungi munyi? Neupingane dituku kaayi? Meme kumuambila dituku dimvua ne bua kupingana.[9] Nanku mukalenga wa bakalenga kuitaba bua meme kuya.

⁷Pashishe meme kumulomba kabidi ne: — Mfumuanyi, umpeshe mikanda ya meme kupesha bulombodi ba buloba budi luseke ludi diba dibuelela lua musulu wa Perate, bua banyishe bua meme kupita, kuya mu ditunga dia bena Yuda.

⁸Umpeshe mukanda mukuabu wa meme kupesha Ashafe, mulami wa metu a mukalenga, bua kumpeshaye mabaya makumbane a meme kuenza nawu biibi bianzubu wa balami ba nzubu wa Mvidi Mukulu, kuenza nawu kabidi bimana bia ku tshimenga, ne kuasa nawu nzubu wa meme kusomba. Mukalenga wa bakalenga kumpesha mikanda ayi, bualu Mvidi Mukulu wanyi uvua mungambuluishe.

⁹Meme kuya ne mikanda ayi kudi balombodi ba buloba buvua luseke ludi diba dibuelela lua musulu wa Perate. Meme kubapesha mikanda yakudi mukalenga wabakalenga. Mvua muye ne bamfumu ba bena mvita, ne babandi ba pa nyama ya tubalu, bavua mukalenga wa bakalenga mumpe bua bandame.

¹⁰Pashishe, Sanebalate, muena Orone,[10] ne Tobiya, muena Amone, uvua umuambuluisha, kumvuabu lumu lua difika dianyi. Nanku kufikabu munda bikole, bua pumvuabu ne muntu mmufike bua kuambuluisha bena Izrayele.

¹¹Meme mumane kufika mu Yerushalayime, ke meme kushala muindile matuku asatu.

¹²Tshiena muambile muntu malu avua Mvidi Mukulu wanyi mungambile, bua kuenza mu tshimenga atshi. Pashishe meme kujuka butuku ne kasumbu ka bantu balume. Tshivua muye ne nyama mukuabu to, anu nyama wa mpunde umvua mbanda.

¹³Mundankulu, meme kumuka mu tshimenga, kupatukila ku tshiibi tshia ku Tshibandabanda. Meme kuya luseke lua ku mpokolu wa mayi a Mamba-muntu, ne ku tshiibi tshia ku Dyala.[11] Meme kukenketa bimana bia tshimenga. Meme kujadika ne: bimana bivua biupuke miaba mivule, kabidi biibi bivua biosha ne kapia.

¹⁴Ke meme kutungunuka ne luendu luseke luvua tshiibi tshia ku Mpokolu wa mayi, ne luseke luvua dijiba dia mukalenga.[12] Kadi nyama wa mpunde umvua mubande, kavua mupete kabidi muaba wa kupitshila to.

¹⁵Nanku, anu butuku abu, meme kuya ku kasulu ka mayi ka Sedrone, ngenda ntangila bimana bia tshimenga. Pashishe, meme kupingana mu tshimenga, kubuelela ku tshiibi tshia ku Tshibandabanda.[13]

¹⁶Balombodi ba tshimenga kabavua bamanye muaba umvua muye, nansha malu amvua muenze. Bualu diba dimvua ngenza bionsu ebi, tshivua muanji kumanyisha bena Yuda bualu, nansha batuangaji, nansha bakulu ba ditunga[14], balombodi, nansha bantu mene bavua batangila midimu.

¹⁷Nanku, mpindiewu meme kubambila ne: — Nudi bamone dikenga ditudi nadi: tshimenga tshia Yerushalayime ntshinyangakaja. Biibi biatshi mbiosha ne kapia! Tuyayi kuibakulula bimana bia Yerushalayime, bua tujikije bundu butudi nabu.

¹⁸Meme kubambila muvua Mvidi Mukulu wanyi mungambuluishe, kubambila kabidi bionsu bivua mukalenga wa bakalenga mungambile. Diakamue kuelabu mbila, bamba ne: — Jukayi, tuenze mudimu! Tuibakulule tshimenga! Bantu kujuka ne dikima, bua kuenza mudimu awu muimpe.

¹⁹Kadi, Sanebalate, muena Orone, Tobiya, muena Amone, uvua umuambuluisha, ne Ngesheme, muena Arabe, kutusekabu. Kutusendekabu, bakonka ne: — Tshinudi nuenza ntshinyi? Nudi basue kutombokela mukalenga wa bakalenga anyi?

²⁰Meme kubandamuna ne: — Anu Mvidi Mukulu wamu diulu nkayende neatuambuluishe bua tuetu kutshimuna. Tuetu, bena mudimu bende, netuenze mudimu wa kuibakulula tshimenga. Kadi nuenu kanuena ne bualu muaba ewu to. Kanuena mua kupiana bintu mu Yerushalayime, kanuena mua kudiamu bumfumu, kanuena mua kutendamu bibidilu bia bankambua betu.