Read Tshiluba Nehemya 4 Bible Online

Nehemya 4 - Tshiluba bible

Nehemya 4

¹Kadi Sanebalate, Tobiya, bena Arabe, bena Amone, ne bena Asdode,[23] ku-mvuabu muvua dibakulula dia tshimana tshia tshimenga tshia Yerushalayime diya kumpala, mutuvua tuamba kujikija mudimu wa kuibakulula miaba ivua miupuke. Nanku kufikabu munda bikole.

²Kudisangishabu bonsu bua kuluisha bena mu tshimenga tshia Yerushalayime, ne kujula tshimvundu.

³Tuetu kutendelela Mvidi Mukulu wetu, kuteka batentekedi butuku ne munya, bua kualamina baluishi abu.

⁴Kadi bena Yuda bavua bamba ne: “Bena mudimu kabena kabidi ne bukole to. Bintu bidi binyanguke mbipite bungi. Kakuena mushindu wa kuibakulula bimana kujikija to!”

⁵Baluishi betu bavua bela meji ne: tuetu katuena mua kumanya bualu, katuena mua kubamona, too ne pafikabu ne mvita munkatshi muetu, bua kutushipa ne kutulekesha mudimu.

⁶Bena Yuda bavua basombe pabuipi ne baluishi betu, kufikabu kutudi misangu bu dikumi, bua kutumanyisha ne: “Nudi ne njiwu, pinganayi kuetu.[24]”

⁷Nanku, meme kulongolola miaba ya kusokoka bantu[25] panyima pa tshimana. Meme kusokokamu bena mvita, balondangane ku biota biabu. Kabidi bavuane bia mvita: miele, mafuma, ne mata a mikete.

⁸Meme mumane kumona muaba uvua bena mvita betu basokome, meme kuambila bakulu ba ditunga, balombodi, ne bantu bonsu bavua muaba awu, ne: — Kanutshinyi baluishi betu to! Nudi bamanye bukole bua Maweja-Nangila utudi tutshina. Nuluangane bua kupandisha bena tshisamba tshienu, bana benu ba balume, bana benu ba bakaji, bakaji benu, ne nzubu yenu.

⁹Baluishi betu kumvua mutuvua bamane kumanya tshifufu tshiyuabu batuelele. Nanku Mvidi Mukulu ke uvua mubapangishe bua batuenzele bionsu bivuabu bela meji. Tuetu bonsu kupingana ku mudimu wa dibakulula tshimana.

¹⁰Kadi biangatshile dituku adi, tshia bibidi tshimue tshia bantu bamvua nabu, ke bavua benza mudimu. Bantu bakuabu bavua bambula mafuma, ngabu, mata a mikete, ba-vuale ne tuzaku tua mvita. Balombodi bavua balame bena Yuda bonsu

¹¹bavua benza mudimu wa kuibakulula tshimana. Bantu bavua bambula majitu, bavua benza mudimu anu ne tshianza tshimue, bualu bavua bambula bia mvita mu tshianza tshikuabu.

¹²Muntu yonsu uvua wibaka tshimana, uvua ne muele muasa ku mikaba. Muntu mukuabu utuvua tuenda nende, uvua mumane kudilongolola bua kuela mpungi.

¹³Meme kuambila bakulu ba ditunga, balombodi, ne bantu bonsu bavua muaba awu, ne: — Mudimu wa kuibakulula tshimana etshi tshijima utshidi wa bungi. Tudi babanyangane mudimu, tukuata mudimu bashilangane mutantshi mule. Katuena tuenza mudimu muaba umue to.

¹⁴Kadi muaba onsu unudi nuenza mudimu, panudi numvua mpungi, nudisangishe bonsu, nufike muaba undi. Nanku, Mvidi Mukulu wetu atuluile mvita!

¹⁵Nanku, tuvua tuenza mudimu dinda too ne dilolu. Bantu bakuabu ba munkatshi muetu bavua anu bakuata mafuma ku bianza.

¹⁶Tshikondu atshi, mvua ntumina mulombodi yonsu diyi, yeye ne bantu bende, bua baye kulala mu tshimenga tshia Yerushalayime, bua bamone mua kutulama butuku, munda munya benze mudimu.

¹⁷Meme Nehemya, bana betu, bena mudimu banyi, ne bena mvita bavua batalame, katavua tumusha bilamba pambidi to, anu pa kuowa mayi.[26]