Read Tshiluba Nehemya 9 Bible Online

Nehemya 9 - Tshiluba bible

Nehemya 9

¹Bena Izrayele kudisangisha mu matuku makumi abidi ne anayi a ngondu awu bua kujila biakudia. Bavua bavuale bilamba bikayapale, badilaba malaba mu mitu.[46]

²Bavua balamuka kudi bantu bavua kabayi bena Izrayele, batonda mibi yabu ne ya bankambua babu kabidi.

³Pashishe, kuimanabu kulu meba asatu, bateleja dibala dia mukanda wa mikenji ya Maweja-Nangila Mvidi Mukulu wabu. Pashishe kuinyikabu mpala panshi meba asatu makuabu kumpala kua Maweja-Nangila Mvidi Mukulu, bua kulomba luse.

⁴Pa tshibumba tshivuabu balongoluela bena Levi, kubandulukabu kudi Yeshuwa, Bani, Kadmiyele, Shebanya, Buni, Sherebiya, Bani ne Kenani, bela mbila mikole, balomba diambuluisha kudi Maweja-Nangila Mvidi Mukulu wabu.

⁵Pashishe, bena Levi aba: Yeshuwa, Kadmiyele, Bani, Ashabneya, Sherebiya, Odya, Shebanya ne Petakiya, ba-vua bela mbila mikole ne: — Jukayi kulu! Tumbishayi Maweja-Nangila Mvidi Mukulu wenu. Numutumbishe matuku onsu! “Maweja-Nangila, bantu bonsu batumbishe dina diebe dia lumu. Miaku itudi mua kuamba bua kukutumbisha nayi idi amu mikese.

⁶Wewe nkayebe ke udi Maweja-Nangila! Udi mufuke diulu dialabale, ne mitotu yonsu! Udi mufuki wa buloba ne bionsu bidipu, wa mayi manene ne bionsu bidi binyungamu. Udi upesha tshifukibua tshionsu muoyi. Makole onsu a mu diulu adi akukukuila.

⁷Amu wewe Maweja-Nangila Mvidi Mukulu ke udi musungule Abrame. Wewe kumumusha mu Ure ku Babilone. Wewe kumuinyika ne: Abrahame.[47]

⁸Wewe kujadika muvuaye mukuitabe ne muoyi umue. Nanku wewe kutua nende ndondu: kumulaya bua kumupesha ditunga dia bena Kenaane, bena Iti, bena Amore, bena Perizi, bena Yebusa ne bena Ngirgashi,[48] bua ndelanganyi yende isombemu. Wewe kukumbaja biuvua muambe, bualu wewe udi wa diyi dimue.

⁹Wewe kutangila bankambua betu, kumona muvuabu babakengesha mu Ejipitu. Wewe kumvua muvuabu bela mbila ku muelelu wa Mayi manene makunze,[49] bakusengelela bua ubambuluishe.

¹⁰Uvua muenze malu a kukema, bua kunyoka mukalenga wa mu Ejipitu, nebalombodi ba mu bukalenga buende, ne bantu bonsu ba mu ditunga diende.[50] Bualu uvua mumanye muvua bena Ejipitu bakengesha bankambua betu. Ke muuvua mupete lumu lunene. Utshidi nalu ne lelu.

¹¹Uvua nuukosolole mayi manene, bena Izrayele batangile. Bobu kusabuka ku makasa kuume. Kadi bonsu bavua babalonda, Wewe kubela mu mayi. Bobu kudinabu bu dibue diela mu mayi mondoke.[51]

¹²Uvua mulombole bantu bebe, mu munya ne divuba dia muinshi, butuku ne dikunji dia kapia, divua ditokesha njila yabu.[52]

¹³Wewe kupueka mu diulu, kubambila malu ku mukuna wa Sinayi. Wewe kubamanyisha mikenji milenga, kubalongesha malu malelela, kubelela meyi ne mikandu bidi bilengelela bantu.

¹⁴Wewe kubaleja mudi dituku dia Dikisha dikale dituku diebe wewe, dituku dia tshijila. Wewe kubamanyisha mikenji yebe mikuabu, mukana mua Moshe, muntu webe.[53]

¹⁵Pavuabu ne nzala, Wewe kubapesha biakudia bia mu diulu. Pavuabu ne nyota, wewe kubapesha mayi a mu lubuebue. Wewe kubatuma bua baye kukuata ditunga, diuvua mubalaye, mutshidipe.[54]

¹⁶Kadi bankambua betu bavua bantomboji. Bavua baditambisha bikole, babenga kuitaba mikenji yebe.

¹⁷Bavua babenga kuyitumikila. Kabavua bavuluke malu a dikema, auvua mubenzele. Kukutombokelabu. Bavua basue kupingana mu Ejipitu mu bupika. Kadi wewe, udi Mvidi Mukulu udi ubuikila bubi bua bantu, udi ne luse ne dinanga, lutulu ne muoyi mulenga. Nanku, kuena mubalengulule to.[55]

¹⁸Bavua badienzele kana ka ngombe ka tshiamu tshiengulula, bakamba ne: ‘Wewe ke mvidie wetu, udi mutupatule mu Ejipitu![56]’ Bushuwa, bavua bakusendeka bibi!

¹⁹Kadi nansha diba adi, bu mudi dinanga diebe kadiyi ndekelu, kuena mubalekele nkayabu mu tshipela. Kuvua mumushe divuba dia muinshi, divua dibaleja njila mu munya; nansha dikunji dia kapia, divua dibaleja njila butuku.

²⁰Wewe kubapesha Mueyelu webe, bua bapete meji mempe. Wewe kubapesha kabidi biakudia ne mayi, bua kutuyisha nzala ne nyota yabu.

²¹Wewe kubalama bimpe mu tshipela, bidimu makumi anayi, kabayi babula tshintu. Bilamba biabu kabivua bisunsuke, makasa abu kaavua muwule ne luendu to.[57]

²²Wewe, udi mubape bumfumu, bua matunga ne bua makalenga. Kuangatabu matunga avua mutumba nabu, ditunga dia Oge, mukalenga wa Bashane, ne ditunga dia Sihone, mukalenga wa Eshebone.[58]

²³Ndelanganyi yabu ivua ya bungi, mipite mitotu ya mu diulu. Udi mubafile bua bakuate ditunga dia Kenaane, diuvua mulaye bankambua babu.[59]

²⁴Bantu bebe kubuela mu ditunga edi, kudikuata. Wewe kutekesha bena Kenaane, bua bashale ku bumfumu buabu.[60] Bantu bebe kuenza bu mudibu basue, ne bakalenga ne bisamba bivua muaba awu.

²⁵Bavua bakuate bimenga bivuabu bakoleshe ne bimana, bakuate madimi mimpe, nzubu miuwule tente ne biuma, bina bia mayi bimana kumbula, madimi a mionji ya mvinyo, ne mitshi ya olive, kabidi ne mitshi mikuabu ya bimuma mipite bungi. Nanku, bu muudi ne muoyi mulenga, bena Izrayele kudia kuukuta, kudiunda, kusanka bua bionsu biuvua mubapeshe.[61]

²⁶Kadi bavua ne tshishiku. Nanku bobu kukutombokela, kubenga diyi diebe, kushipa bambi bebe, bavua bababela bua bapingane kuudi. Ke muvuabu bakuenzela bibi, bakupenda misangu ne misangu.

²⁷Nanku, wewe kubafila mu bianza bia baluishi babu, bavua babakengesha bikole. Kadi pavuabu mu dikenga dinene, bobu kukubikila. Wewe mu diulu, kubateleja. Bu mudi dinanga diebe kadiyi ndekelu, Wewe kutuma bilobu, bua kubasungidila kudi baluishi babu.

²⁸Kadi bobu bamane kupatuka mu dikenga, ke kupinganabu ku malu mabi. Nanku, wewe kubalekela tshiakabidi mu bianza bia baluishi. Ke bobu kukubikila, wewe kubateleja mu diulu, kubasungidila misangu ne misangu, bu mudi dinanga diebe kadiyi ndekelu.[62]

²⁹Pashishe, wewe kubabela bua bapingane kuudi. Kabavua bitabe mikenji yebe. Kadi bavua buwule ne ditambisha, babenga mikenji yebe ne meyi ebe. Badi batumikila meyi ebe ke badi bapeta muoyi.[63] Kadi bobu kukutombokela, kubenga kukuteleja.

³⁰Bidimu bia bungi, wewe kubafuila luse. Bambi bebe kupeta Mueyelu webe, kubela bantu bebe, kadi nanshabu kubateleja.[64] Ke wewe kubafila mu bianza bia bantu benyi.

³¹Kadi bu mudi dinanga diebe kadiyi ndekelu, wewe kuena mubabutule to. Kuena mubalekele, bualu udi Mvidi Mukulu wa luse ne dinanga.

³²Wewe, Mvidi Mukulu wetu, udi munene, wa bukole buonsu ne wa kutshina. Udi ulama bimpe ndondu iuvua mutue netu. Vuluka dikenga divua dikuate bantu bebe, dikuate bakalenga betu, ne bamfumu betu, batuangaji betu, ne bambi betu, bankambua betu, ne tuetu mene, biangatshile tshikondu tshia bakalenga ba bena Ashure,[65] too ne mpindiewu.

³³Mu malu onsu adi matukuate, wewe udi wenza amu biakane. Nansha tuetu bakubenge, wewe uvua anu utukeba, utunanga.

³⁴Kadi bakalenga betu, ne bamfumu betu, batuangaji betu, ne bankambua betu, kabena banemeka mikenji yebe. Bavua babenge meyi ebe, too ne mibelu iuvua ubabela nayi.

³⁵Ku luse luebe, bavua ne bintu bivule mu ditunga diabu, bavua badishikamine mu makalenga abu, bavua basombe mu ditunga dimpe dialabale. Kadi kabavua basue kukuenzela mudimu, kabavua balekele malu abu mabi.

³⁶Mpindiewu tudi mu bupika! Tudi bapika mu ditunga dia bankambua betu, divuabu bapete kuudi, didi ne biakudia bia bungi.

³⁷Ditunga didi ne biakudia bia bungi, kadi bidi bisankisha nangananga bakalenga, bavua batubueje mu bupika bua bubi buetu. Badi benza netu, kabidi ne biuma bietu, amu bu mudibu basue. Bushuwa, tudi mu dikenga dinene!”