Read Tshiluba Tobite 13 Bible Online

Tobite 13 - Tshiluba bible

Tobite 13

¹Tobite udi wimba musambu wamba ne:

²“Mvidi Mukulu atumbe, yeye udi mfumu kashidi! Yeye udi unyoka bantu, kadi udi kabidi ubafuila luse. Udi upuekesha bantu mu kandondu ka bafue, kabidi udi upandisha ku lufu ludi lukuatshisha bowa. Bintu bionsu bidiku bidi mu tshianza tshiende.

³Nuenu bena Izrayele, samunayi Mvidi Mukulu kumpala kua bukua bisamba, munkatshi mua bantu bavuaye munutangalajile.

⁴Aku uvua munulejile bukole buende. Kobolayi butumbi buende, kumpala kua bionsu bidi ne muoyi, bualu yeye udi Maweja-Nangila, Mvidi Mukulu wetu ne Tatu wetu,[67] udi Mvidi Mukulu kashidi.

⁵Udi ununyoka bua mibi yenu, kadi neanufuile luse bonsu, neanupatule mu matunga onsu avuaye munutangalaje.

⁶Pinganayi kudiye, ne muoyi wenu onsu, ne lungenyi luenu lonsu. Nushale bamulamate muenu muonsu. Nenku, yeye neapingane kunudi, kabidi kena ubenga, mua kunuenzela bimpe to.

⁷Kadi nutue mushinga wa bionsu bidiye munuenzele. Nuele mbila bua bulenga buende ne meyi enu makole. Tumbishayi Maweja-Nangila, udi muakane. Nemekayi Mukalenga kashidi.

⁸Kadi meme, ndi mmutumbishila mu ditunga, didibu bankuate mu bupika. Ndi ndeja bukole buende ne bumfumu buende kudi bantu babi.[68] Nuenu benji ba malu mabi, pinganayi kudiye. Nuenze bidi biakane ku mesu kuende, bumue udi mua kunuakidila, kunufuila luse.

⁹Ndi ntumbisha Mvidi Mukulu wanyi, ne muoyi wanyi mujima, kabidi ndi nnemeka Mukalenga wa diulu. Ndi muwule ne disanka bua kubandila bumfumu buende.

¹⁰Bonsu badi mu Yerushalayime bimbe misambu, bakobola bua bukole buende. Wewe Yerushalayime, tshimenga tshia tshijila, Mvidi Mukulu neakunyoke bua buenzayi bua bantu bebe. Kadi kabidi, neafuile bantu bakane luse.

¹¹Tumbisha Maweja-Nangila ne disanka. Samuna Mukalenga wa kashidi, bua bantu bamone mua kuasulula nzubu wende ne disanka.

¹²Maweja-Nangila neasankishe bantu bonsu, bavuabu baye nabu mu bupika! Neanange bantu bebe bonsu badibu batatshisha too ne kashidi.

¹³Butoke bukole nebupatuke munkatshi muebe, kabidi nebukenkeshe buloba bujima. Bantu ba nseke yonsu ya buloba badi kule, nebalue kuudi, bantu ba ku matunga a kule menemene nebafike kuudi, wewe tshimenga tshia tshijila,[69] nebatuadile Mukalenga wa mu diulu milambu. Ndelanganyi idi ilonda mu bikondu bishilangane, neyimbe misambu ya disanka mu misesu, matuku onsu, bantu nebakuinyike ne: ‘Tshimenga tshidi Mvidi Mukulu musungule.’

¹⁴Bantu bonsu badi bakuela nyima mbena tshibawu! Bantu bonsu badi bakubutula, mbena tshibawu! Bonsu badi bashimbula bimana biebe, batonkola tuleya tuebe, kabidi bosha nzubu yebe, mbena tshibawu! Kadi bantu bonsu badi bakunemeka, neubele lupemba kashidi.

¹⁵Nenku, wewe Yerushalayime neusanke, bua bantu bonsu batshidi bashale balamate Mvidi Mukulu, bualu nebafumine pamue mu bupika bua kutumbisha Maweja-Nangila wa tshiendelele. Bena dikasa dimpe, nebasanke nanku, bua kumona ditalala dibuelulula kabidi mu bimana biebe!

¹⁶Bantu badi babungama bua makenga adi akukuata, mbena diakalenga! Diakalenga diebe dimpe, nedikale diakalenga diabu. Nebasankile kuudi kashidi. Ndi musue kutumbisha Maweja-Nangila, mukalenga munene,

¹⁷bualu nebasulule Yerushalayime tshiakabidi, nebikale mu nzubu wa Maweja-Nangila tshiendelele. Nengikale ne disanka buebe wewe Yerushalayime, padi bantu banyi bakese badi bashala bajoja butumbi buebe, kabidi batumbisha Mukalenga wa diulu! Biibi bia tshimenga tshia Yerushalayime nebikale bienze, ne mabue a safire ne a emerode. Kabidi bimana nebikale bia mabue amu a mushinga mukole. Tuleya tua Yerushalayime netuikale tua mpawungi, nebikale batukolesha amu ne mpawungi nkayende. Misesu ya mu Yerushalayime neyikale milamika mabue a rubise ne mabue mimpe a mushinga mukole.[70]

¹⁸Misambu ya disanka neipatuke mu Yerushalayime, kabidi bantu bebe nebimbe bonsu ne: Aleluya! Tumbishayi Mvidi Mukulu wa Izrayele. Kabidi bantu bonsu bikale Maweja-Nangila musungule, nebatumbishe Dina diende dia tshijila kashidi.”