Read Tshiluba Tobite 2 Bible Online

Tobite 2 - Tshiluba bible

Tobite 2

¹Mu matuku avua Asaradone mu bukalenga, meme kupingana kuetu ku Ninive. Mukajanyi Ana ne muananyi wa balume Tobiyase kupinganabu kundi. Kadi bua tshibilu tshia Dinowa,[15] tshitudi tusanka mbingu muanda mutekete kunyima kua tshibilu tshia Dipita dia Maweja-Nangila, kungenzelabu didia dimpe. Meme kudia.

²Bavua bantuadila biakudia bivule pa mesa. Nanku, meme kuambila muananyi Tobiyase ne: — Uye kudi bana betu bena Izrayele badibu bakuate mu bupika ku Ninive. Ukebe munkatshi muabu muntu mupele, utshidi mulamate Maweja-Nangila, umubikile tulue kudia nende. Ndi mutekemene bua kudia amu paudi upingana.

³Tobiyase kuya, wenda ukeba mupele mu bana betu, kadi upingana, kungelaye diyi ne: — Tatu! Meme kuitaba ne: — Ntshinganyi muananyi? Ke muana ne:

⁴— Tatu ndi musangane umue muntu wa tshisamba tshietu mufyekele mu nshingu, mushipa, bamulekela mu masangu a njila, utshidipu ne mpindiewu. Meme kuzawuka, kujuka lukasa, kushiya biakudia tshiyi mubitue tshianza, kuya kuambula tshitalu atshi, kutshiteka mu tshibambalu, muindile bua diba dibuela nya kutshijika.[16]

⁵Meme kupingana, kuowa mayi, bua kumusha mikiya,[17] pashishe meme kubanga kudia muikale ne kanyinganyinga kavule.

⁶Meme kuvuluka kabidi miaku ivua muambi Amosa ubela nayi bena mu Betele ne: “Bibilu bienu bia disanka nebiandamuke madilu kabidi misambu yenu neyishale miyenga ya miadi.[18]” Meme kutuadija kudila.

⁷Pashishe diba dimane kubuela, meme kumbula tshiina, kujika muntu awu.

⁸Bena mutumba bavua baseka, bangamba ne: — Bushuwa! Muntu ewu katshiena kabidi ne bowa. Bavua bamukeba amu kumukeba bua kumushipa bua mudimu wende ewu. Jojayi, utshidi amu utungunuka ne kujika kua bafue!

⁹Dilolu adi, meme mumane kuowa mayi, bua kumusha mikiya, mvua muikishile mu lubanza ku tshimana tshia lupangu. Kadi kuvua luya luvule, mvua mushale ku mutu kutupu.

¹⁰Tshivua mumanye ne: kulu kudi nyunyi ya mishamisha mu tshimana to. Bibolela bia nyunyi ya mishamisha bikale ne luya kummatshila mu mesu. Nsonga kumuenekayi mu mesu. Meme kuya kudiondapisha kudi baminganga. Pavuabu bangela manga mu mesu, avua enda afua amu kufua. Ku ndekelu, meme kushala mpofu bidimu binayi bijima tshiyi mmona kantu kabidi. Bana betu bonsu kubungama bikole bualu buanyi. Akikare kushala undama bidimu bibidi bulubulu, too ne padiye uya mu ditunga dia Elimayise.[19]

¹¹Tshikondu atshi, muena kuanyi Ana uvua ne bua kukuata mudimu bua tuetu kudia bu mudi bakuabu bakaji benza. Uvua uluka manda, utela bilamba.

¹²Uvua upa bavua nabi dijinga. Bobu pabu bamufuta makuta. Kadi mu matuku muanda mutekete a ngondu wa Distrose,[20] kujikijaye tshilamba, kutshifila kudi bavua ne bua kutshisumba. Bantu bavua basumba abu, kumupa mushinga onsu uvuabu bumvuangana, kumusakidila ne lukungulu lua mbuji.

¹³Kadi pa kubuela muetu mu nzubu, lukungulu lua mbuji alu ludi lutuadija kudila muadi. Ke meme kubikila mukajanyi, kumuebeja ne: — Lukungulu lua mbuji elu ndufuma kuepi? Udi muluiba anyi? Ulupingajile bamfumualu. Bualu katuena mua kudia bintu biba to.

¹⁴Kadi yeye kungandamuna ne: — Nka lumbandi kadibu basakidila pa bintu bimvua mupane! Meme tshivua muitabe bivuaye muambe to, kadi mvua mmuambila amu kumuambila bua akapingaje lukungulu lua mbuji alu kudi bamfumu balu. Amu bua bualu abu, mvua mumufikile munda bikole. Yeye umvua nanku, kungandamuna ne: — Bintu biebe bia luse biuvua upesha bapele mbikuambuluishe ku tshinyi? Kadi midimu yebe mimpe iuvua ukuata? Mianda yebe mimpe iuvua wenza idi penyi? Bantu bonsu mbamanye bimpe mudi bionsu ebi bifike kuudi![21]