Read Tshiluba Tobite 3 Bible Online

Tobite 3 - Tshiluba bible

Tobite 3

¹Muoyi wa munda kunshikila, meme kuitshija mioyi munda kutuadija kudila. Pashishe meme kubanga kutendelela ne mikemu, ngamba ne:

²“Maweja-Nangila, wewe udi muena buakane. Midimu yebe yonsu idi miakane. Udi uyikuata matuku onsu ne luse ne muoyi umue, anu bualu buetu. Wewe udi mulumbuluishi wa bantu ba buloba bujima.

³Maweja-Nangila, umvuluke. Utangile kundi. Kunnyoki bua mibi yanyi, nansha bua malu mabi atuvua bakuenzele, meme ne bankambua banyi.

⁴Bualu katuvua balonde meyi ebe. Wewe kumfila mu bianza bia baluishi bua bapawule bintu bietu, batukuata mu bupika, kabidi batushipa. Bavua batuseka, bameta nsenda kudi bantu ba mu bisamba muuvua mututangalaje.

⁵Kadi paudi ukosa, nsambu yebe idi amu pa yoyi, paudi unyoka utangila bilema bianyi, ne bia bankambua banyi. Bualu katuena bakutumikile, nansha balonde njila webe mulelela.

⁶Kadi mpindiewu, ungenzele muudi musue. Anyisha bua unshipe, bua ngumuke pa buloba, ngandamuka lupuishi.[22] Buanyi meme, mbimpe kufua pa mutu pa kuikala ne muoyi. Bualu badi bampenda kapayi bualu. Dibungama dianyi ndinene! Maweja-Nangila umpatule mu dikenga edi, umfikishe mu ditalala dia kashidi. Maweja-Nangila, kungedi nyima. Ndi musue kufua pa mutu pa kushala ne muoyi, mu dibungama dia mushindu ewu, kabidi bampenda amu kumpenda.”

⁷Kadi amu dituku adi,[23] mu tshimenga tshia Ekbatane, mu ditunga dia Madayi, Sara, muana wa Raguwele kumvuaye muvuabu bamupenda kudi mukaji, muena mudimu wa tatuende.

⁸Bualu Sara uvua mutua ku mabaka misangu muanda mutekete. Kadi ku musangu onsu Asmodeye, mukishi[24] mubi uvua ne bua kudianza kushipa mulume awu bangabanga ne yeye kayi muanji kubuelela Sara mu nzubu. Telejayi muvua muena mudimu mukaji upenda Sara: — Tshiwewe ntshidi tshishipa balume. Uvua mutue ku mabaka muanda mutekete. Kadi kuena ne tshivulukilu tshia mulume nansha umue wa kudibu to.

⁹Udi unkengesha padibu bamane kufua bua tshinyi? Ubalonde, kuena mulele muana wa balume nansha wa bakaji.

¹⁰Diba adi, Sara kubungama bikole, kubandaye mu tshibambalu tshia nzubu wa tshilala kulu wa tatuende, wenda udila. Uvua ne dijinga dia kudiowa amu dituku adi. Pashishe kudielaye meji, kudiambila ne: “Kabiena bimpe bua bantu bavua bapenda tatu, bamuamba ne: ‘Uvua ne muana wa bakaji umue uvuaye munange, muana awu mmudiowa anu bua makenga ende!’ Tshipendu tshia nanku tshidi mua kuvua kufikisha wanyi tatu udi mumane kukulakaja ewu ku lufu.[25] Pa mutu pa kudiowa, nendombe amu kudi Maweja-Nangila bua anshipe bua tshiumvu bipendu to.”

¹¹Diakamue, kutangilaye ku madidishi,[26] kuelaye bianza mulu, utendelela Mvidi Mukulu, wamba ne: “Wewe Mvidi Mukulu, muena luse luvule. Ndi nkutumbisha! Bonsu batumbishe dina diebe tshiendelele! Bionsu biudi mufuke, bikutumbishe kashidi!

¹²Kadi mpindiewu, ndi mutangile amu kuudi, kuudi wewe, ke kundi mutangile,

¹³Ungumushe panu, tshiena musue kumvua mudibu bampenda.

¹⁴Wewe Maweja-Nangila udi mumanye, mundi tshiyi mumanye balume, mulume nansha umue kavua mungangate,

¹⁵tshiena mupepeje dina dianyi, nansha dia tatu wanyi, mu ditunga edi, mudibu batukuate ku bupika. Ndi nkayanyi kua tatu wanyi. Kena ne munga muana udi mua kupiana bintu biende. Kena ne muanabu wa balume nansha wa ku batatuende mukuabu, udi mua kungangata bu mukajende, meme kushala kudiye.[27] Nkadi mufuishe balume muanda mutekete. Tshindi mua kushadila matuku mulongulongu panu ntshinyi? Kadi Maweja-Nangila, padibi kabiyi bikulengelela bua wewe kunshipa, nenku, uvuluke bua bipendu bidibu bampenda.”

¹⁶Diakamue, Mvidi Mukulu wa butumbi kumvua malomba abu bonsu babidi.

¹⁷Mvidi Mukulu kutuma mutumibue wende, diende Rafayele, bua ajikije masama abu bonsu babidi. Uvua ne bua kumusha nsonga ivua mu mesu a Tobite bua amone tshiakabidi butoke bua Mvidi Mukulu. Uvua ne bua kupandisha Sara, muana wa Raguwele mu bianza bia Asmodeye, mukishi mubi,[28] bua Tobiyase, muana wa Tobite amusele. Nenku Tobiyase ke uvua ne bua kusela Sara pa mutu pa bantu bonsu bavua bamuelela meji akumusela. Diakamue Tobite kupingana mu lubanza, mu nzubu wende, pashishe Sara, muana wa Raguwele kutuluka ku tshibambalu tshia kulu kua nzubu wa tatuende.