Read Tshiluba Tobite 5 Bible Online

Tobite 5 - Tshiluba bible

Tobite 5

¹Ke Tobiyase kuandamuna tatuende Tobite ne: — Tatu, nengenze bionsu biudi mungambile.

²Kadi katuena bamanyangane ne Ngabayele to, mundi mua kupeta lupetu alu mbishi? Ntshimanyinu kaayi tshidi mua kumujadikila bua anyishe ampeshe lupetu alu? Kabidi tshiena mumanye njila wa ku Madayi. Ndi mua kukufika bishi?[38]

³Tobite kuandamuna muanende ne: — Ngabayele ne meme, tuvua bafunde mukanda, bautua biala bonsu babidi. Meme kuukosolola mu bitupa bibidi. Muntu kuangata tshiende tshitupa tshia mukanda, mukuabu kuangata tshiende tshitupa tshia mukanda. Pashishe, meme kuteka tshiende tshitupa tshia mukanda pamue ne lupetu lumvua mutekeshe kuende alu. Kudi mpindiewu bidimu makumi abidi katshia ntekesha lupetu alu. Kadi muananyi, udi mua kukeba muntu wa bushiwa udi mua kukufila ku Madayi. Netumufute difutu diende panudi nupingana kuetu kunu. Mbimpe uye kuangata makuta awu kudi Ngabayele.

⁴Tobiyase kuya wenda ukeba muntu udi mua kumufila, udi mua kuikala kabidi mumanye njila wa ku Madayi. Tobiyase upatuka pambelu kumonanganaye ne Rafayele, kadi kavua mumanye ne mmutumibue wa Mvidi Mukulu to.

⁵Kumuebejaye ne: — Mulunda wanyi, udi ufuma penyi? Mutumibue kumuandamuna ne: — Ndi umue wa ku bana benu bena Izrayele. Ndi mufike muaba ewu bua kukeba mudimu. Tobiyase kumukonka ne: — Udi mumanye njila udi muye ku Madayi anyi?

⁶Mutumibue kumuandamuna ne: — Bushuwa, nkadi mufikaku misangu mivule. Ndi mumanye njila ayi. Misangu ya bungi, mvua nya ku ditunga adi ndala kua muanetu Ngabayele, udi muase mu Raguyese, mu ditunga dia Madayi. Ekbatane ne Raguyese mbimenga bidi biasa pa mikuna, mbishilangana mutantshi wa matuku abidi.

⁷Tobiyase kuamba ne: — Ngindila apa, mulunda wanyi. Ndi nya kumanyisha tatu. Ndi nkengela muntu udi mua kuya kumfila ku luendu, meme kumufuta difutu diende.

⁸Ke yeye ne: — Ndi mukuindile apa. Kadi ambuluja lukasa!

⁹Tobiyase kupingana kudi tatuende, umulondela ne: — Tatu, ndi mupete muntu udi mua kumfila. Udi umue wa ku bana betu bena Izrayele. Tobite kumuambila ne: — Umumbikidile bua mmanye diku ne tshisamba tshiende, bua njadike ne udi mua kukufila bilenga.

¹⁰Tobiyase kupatuka bua kubikila mutumibue, wamba ne: — Mulunda wanyi, tatu udi ukeba bua kuanji kukumona. Mutumibue wa Mvidi Mukulu kubuelamu nzubu. Tobite kudianza kumuela muoyi. Mutumibue kuandamuna ne: — Ndi nkujingila dikasa dimpe. Kadi Tobite kuandamuna ne: — Ndi mua kutekemena kabidi dikasa dimpe kaayi? Meme nkadi mpofu. Tshiena mmona butoke. Ndi mu miidima bu bantu badi bafue kabayi mua kumona kabidi diba. Ntshidi ne muoyi, kadi nkadi munkatshi mua bafue. Ndi ngumvua bantu bakula, kadi tshiena mbamona nansha. Mutumibue kumuandamuna ne: — Kolesha muoyi, Mvidi Mukulu neakondape lukasa. Kuteketshi mu maboku! Tatu kuamba ne: — Muananyi Tobiyase udi udilongolola mua kuya ku Madayi. Wewe udi mua kumufila ne kumufikisha anyi? Bushuwa, mulunda wanyi nenkufute difutu diebe. Mutumibue kuandamuna ne: — Ndi mumane kudilongolola bua kuya nende. Ndi mumanye njila yonsu idi miye ku Madayi, bualu mvua nyaku misangu mivule. Mu mpata ne mu mikuna ke mumvua mpits(...)

¹¹Tobite kumuebeja ne: — Mulunda wanyi, diku diebe ndiku kaayi? Udi muena tshisamba kaayi? Ndi nkusengelela ungambile.

¹²Mutumibue kumukonka ne: — Udi ukengela kumanya nanku bua tshinyi? Tobite kuandamuna ne: — Mulunda wanyi, ndi musue kumanya bulelela ne: Udi muana wa nganyi? Kabidi dina diebe nganyi?

¹³Mutumibue kuandamuna ne: — Ndi Azarya, muana wa Ananiya mukulumpe, umue wa ku bana benu.

¹⁴Pashishe, Tobite kumuela muoyi, wamba ne: — Muanetu, Mvidi Mukulu akuele lupemba. Kufiki munda bua pamvua musue bua kumanya ne kushindika diku diebe. Bushuwa udi muanetu, diku dienu ndimpe. Ndi mumanye Ananiya ne Natane, bubidi buabu mbana ba Semeliyase mukulumpe. Kale bavua baya kumfila ku Yerushalayime[39] aku, bavua batendelela Mvidi Mukulu pamue nanyi. Bavua amu balamate Mvidi Mukulu. Kabidi tatuebe ne mansebebe mbantu ba malu mimpe. Bakakuebe mbantu bimpe. Ndi nkujingila difika dimpe.

¹⁵Kadi Tobite kuamba kabidi ne: — Nenkufute lukanu lumue lutoke lua mushinga mukole, bu difutu diebe dimpe dia ku dituku, kadi bua biakudia biebe nenkupe amu bia momumue ne bia muananyi.[40]

¹⁶Wewe muye nende bimpe mu njila, nembandishe difutu diebe.

¹⁷Mutumibue kuandamuna ne: — Ndi umufila, lekela kutshina. Netuye nende bimpe, kabidi tupingane amu bilenga. Bualu ndi mumanye njila bimpe. Tobite kuamba ne: — Mvidi Mukulu akuele lupemba, mulunda wanyi. Pashishe kuambilaye muanende ne: — Longolola binudi mua kuya nabi ne muanenu, Mvidi Mukulu wa mulu anulame, mu luendu kabidi anupingaje kunu bimpe! Mutumibue wende anulame mu njila, anulombole, muananyi. Tobiyase kudilongolola bua kuya. Kupukilaye tatuende ne mamuende, kumata mu njila. Tobite kumuamba ne: Nuaya bimpe.

¹⁸Mamuende kutuadija kudila wambila Tobite ne: — Udi utuma muananyi bua tshinyi? Kuena mumanye ne yeye ke udi utulama padiye uya eku uya kuaka anyi?

¹⁹Wewe udi unanga amu kunanga makuta bua tshinyi? Muana mmupite bionsu.

²⁰Mudi Maweja-Nangila mutuenzela emu mmutuakanyine.

²¹Tobite kuandamuna ne: — Kupampakanyi nansha. Muana udi amu bimpe neapingane bimpe kabidi. Neudijadikile padiye upingana.

²²Kupampakanyi mukajanyi, kuena mua kuzakala bualu buabu to. Mutumibue muimpe wa Mvidi Mukulu nealombole muana. Luendu nebikale luimpe, kabidi neapingane kunu anu bilenga.

²³Sara kulekela muadi.