Read Tshiluba Yudite 1 Bible Online

Yudite 1 - Tshiluba bible

Yudite 1

¹Nebukadnesare, mukalenga wa bena Ashure, uvua ku bumfumu bua tshimenga tshinene tshia Ninive bidimu dikumi ne bibidi. Mu tshikondu atshi, Arpaksade uvua mfumu wa bena Madayi, uvua musombele mu tshimenga tshinene[1] tshia Ekbatane.

²Arpaksade uvua muibakishe tshimana tshia mabue masonge, tshinyungulule Ekbatane, dibue dionsu divua ne butshiama bua metre umue ne tshitupa, ne bule bua metre isatu. Tshimana tshivua ne butumbuke bua metre makumi asatu ne atanu ne butshiama bua metre makumi abidi ne atanu.

³Pa buipi ne biibi bia tshimenga, mukalenga uvua muashishe tuleya bule bua metre makumi atanu, bitaku biatu bivua ne metre makumi asatu mu butshiama.

⁴Biibi nkayabi bivua bule bua metre makumi asatu ne atanu ne butshiama bua metre makumi abidi. Bivua biambuluisha bantu bavua ne bia nwita ne bena nwita batua benda ku makasa bua bamone mua kupatuka balondangana bimpe.

⁵Mu tshidimu tshia dikumi ne tshibidi tshia bukalenga buende, Nebukadnesare kubundaye mukalenga Arpaksade myita mu mpata munene wa Ragawu.[2]

⁶Bantu bonsu batua base mu ditunga dia mikuna ne mu bibandabanda bia musulu wa Perate, ne wa Tigre ne wa Idaspe, kudisangabu nende, pamue ne bantu batua base mu mpata, bavuabu batangila kudi Ariyoke, mukalenga wa bena Elimayise. Bena myita ba mu matunga mavule kudisangabu pamue ne bena Babilone.[3]

⁷Nebukadnesare, mukalenga wa bena Ashure uvua mutume bantu ne mikenji mu nseke yonsu kudi bonsu bavua basa mu ditunga dia Persa, luseke ludi diba dipatukila ne kudi bonsu bavua base mu Silisiya luseke ludi diba dibuelela, mu Damase, mu Libane ne mu Antilibane too ne kudi bonsu bavua basombe ku muelelu wa Mayi manene a pankatshi,

⁸ne kudi bonsu bavua base ku mukuna wa Karmele, mu ditunga dia Ngilaade, mu Ngalileya wa ku mutu, ne kudi bantu bavua base mu mpata wa Yizreyele.

⁹Mukenji kufika ne kudi bonsu batua base mu Samariya ne mu bimenga bia pabuipi ne Samariya, kudi bonsu batua mu matunga avua dia muamua dia Yardene too ne ku Yerushalayime: ke Betaneye, Keluse ne ku Kadeshe. Kufikawu kabidi too ne ku musulu utua wenza mukalu ne Ejipitu, ulunguluka ne ku tshimenga tshia Tapnese ne tshia Ramsese ne ku buloba bua Ngoshene,

¹⁰utungunuka amu kutungunuka ne ku tshimenga tshia Tanise ne tshia Memfise, ne kudi bonsu bavua base mu Ejipitu too ne ku mikalu ne bena Kushe.

¹¹Kadi bantu bonsu ba mu matunga aa kudiwulabu mukenji uvua Nebukadnesare mutume. Kubengabu mua kutua ku tshiende. Bavua bamumona amu mudi muntu yonsu udi wenda ewu. Bantu bende bavuaye mutume kupingana ne bundu disu tente.

¹²Nebukadnesare kufika munda bikole. Kuditshipaye ne nengenze muanyi muonsu ne bionsu bia mu bukalenga buanyi bua kunyoka bantu bonsu aba. Kulayaye bua kushipa bantu badi mu Silisiya, mu Damase, ne bonsu badi mu Ashure, mu Mowabe ne mu Amone,[4] ne bena mu Yudeya mujima ne bonsu kabidi badi mu Ejipitu too ne badi ku muelelu wa Mayi manene a pankatshi, ne badi ku Mayi manene makunze.

¹³Mu tshidimu tshia dikumi ne muanda mutekete tshia bukalenga buende, Nebukadnesare kuluisha mukalenga Arpaksade, kumutshimuna. Kutangalajaye tshiluilu tshia Arpaksade, babandi ba pa tubalu ne pa matempu onsu a myita.

¹⁴Kunyengaye bimenga bia muluishi wende, kufikaye too ne ku tshimenga tshia Ekbatane. Kunyangakajaye miaba ivua bantu basangila, kubutula tshimenga tshivua tshiakane.

¹⁵Nebukadnesare wakakuata Arpaksade ku mukuna ya Ragawu, wamutua misongolu, kumushipa, kujikija bukole buende kashidi.

¹⁶Kupinganaye ku Ninive pamue ne bena tshiluilu tshiende bonsu. Kuenzabu masanka matuku lukama ne makumi abidi.