Read Tshiluba Yudite 11 Bible Online

Yudite 11 - Tshiluba bible

Yudite 11

¹Oloferne kuambila Yudite ne: — Kutshinyi nansha! Katshia tshiena muanji kuenzela muntu udi ukuatshila Nebukadnesare, mukalenga wa buloba bujima mudimu bibi nansha musangu umue.

²Kadi tshivua mua kubunda bantu bebe badi basa pa mikuna, bobu kabayi bampepeja. Bobu bena Izrayele badi badikebela njiwu eyi nkayabu.

³Ngambila tshiudi mubanyemene muvue kunu. Mbushuwa, udi mutue kunu bua wewe kupanda. Ujadike ne: bituadije ku butuku ebu, tudi tulama muoyi webe, too ne matuku adi alonda.

⁴Muntu kena mua kukuenzela bibi to. Kadi nebaluenzele bilenga bu mudibu benzela bena mudimu ba Nebukadnesare, mukalenga wanyi.

⁵Yudite kuandamuna ne: — Anyisha bua nkuambile bundi muende nabu, meme mupika webe. Mfumu unteleje, butuku ebu nenkuambile malu onsu amu malelela. Tshiyi nkushima to.

⁶Bu wewe muteleje bidi mupika webe ukuambila, Mvidi Mukulu neakuenzele malu manene. Nenku bionsu biudi wenza nebiye amu kumpala.

⁷Ndi nditshipa bulelela ne: Nebukadnesare, uvua mukutume bua uludike muntu yonsu munjila mululame. Kabidi Nebukadnesare, mukalenga wa buloba bujima akuate ku mundundu, akole boboboo. Amu buebe wewe, bantu badi bakumbaja mikenji ya mukalenga Nebukadnesare. Amu bua bulombodi buebe, nyama ya muitu ne pa mbelu kabidi ne nyunyi, nebilonde amu diyi dia Nebukadnesare ne dia bena diku diende.[59]

⁸Bualu tudi bumvue bakula kudi bantu ba mu buloba bujima bua meji ebe ne budimu buudi nabu. Wewe udi ne mushinga wa bungi mu bukalenga bujima. Udi ne dimanya disunguluke. Udi mulombodi wa bena myita udi ne lumu lua bungi.

⁹“Kadi tudi bamane kumanya diyuki dinene divua Akiyore muenze mu tshipangu.[60] Bena Betuliye bavua bamuakidila, yeye uvua mubalondele bionsu bivuaye muakule kumpala kuebe.

¹⁰Nenku, mfumu ne mukalenga wanyi, kuena mua kulengulula diyuki diende edi to. Udilame munda. Bualu bidiye muambe mbia bushiwa, tshisamba tshietu katshiena mua kubutuka, amu tshiotshi tshienzela Mvidi Mukulu malu mabi.

¹¹Kadi mpindiewu, bia nanku ke bidi mua kuenzeka, bua kuyi kupingana kuyi ne diakalenga. Bena Izrayele nebafue, bualu bavua benza bibi, badi bakeba Mvidi Mukulu tshiji misangu yonsu padibu benza bibi.

¹²Kabena ne biakudia, badi bapeta mayi nanku nanku. Ke padibu bakeba mua kushipa bimuna, kudia bionsu bidi Mvidi Mukulu mubakandike bua kabadi.[61]

¹³Nebadidile nkayabu ntete ya kuenza bukula ya tshianyi, tshia dikumi tshia maluvu a nwinyo ne tshia mafuta bivuabu balama. Mbintu bia tshijila bivuabu balamina batuangaji bavua bakuatshila Mvidi Mukulu wetu mudimu mu nzubu wende udi mu Yerushalayime. Kadi muntu mukuabu nansha umue kavua ne bukenji bua kubilenga to.[62]

¹⁴Kadi bena mu Yerushalayime kabena kabidi balonda mukenji ewu nansha. Ke padi bena Betuliye batuma bantu kudi bakulu badi mu Yerushalayime bua kupetabu dianyisha dia kuenzabu malu bu mudi bena Yerushalayime benza.

¹⁵Nenku dituku dikalabu badia biakudia abi, Mvidi Mukulu neabafile mu bianza biebe, neubabutule bonsu.

¹⁶Pangumvu nanku, meme mukaji mupika webe, meme kubanyema. Mvidi Mukulu mmuntume bua tulongolole nebe midimu idi mua kukemesha bantu bonsu badi mua kuyumvua.

¹⁷Bualu meme mupika webe, ndi muitabe Mvidi Mukulu wa diulu, ndi mmukuatshila mudimu butuku ne munya.[63] Bituadija ku lelu, ndi nshala pabuipi nebe, mfumuanyi. Mupika webe neikale upatuka butuku, uya mu lubuwa bua kutendelela Mvidi Mukulu. Amu yeye ke udi mua kummanyisha pikala bena Betuliye benza malu mabi.

¹⁸Nenku nemvue kukuambila. Nenku neuye ne tshiluilu tshiebe tshijima bua kubaluisha. Muntu nansha umue wa kudibu kakutua nkanana kumpala kuebe.

¹⁹Nenkufile mu Yudeya mujima too ne muudi ufika mu Yerushalayime. Nenkubanjije mu tshimenga tshiabu atshi. Neubalombole bu mudibu balombola mikoku idi kayiyi ne mulami. Mbwa nansha umue kena mua kukubulukila to.[64] Mvidi Mukulu mmumane kungambila, uvua muanyishe bua meme kudianza kumanya bionsu ebi, mmuntume kuudi, bua meme kukuambila.”

²⁰Miaku ya Yudite kutua Oloferne ne balombodi bende ba nwita ku muoyi. Kukatshilabu, kukemabu bua meji a Yudite, bobu kuambilangana ne:

²¹— Ku ntengu yonsu ya buloba katuena banji kumona mukaji muimpe nenku, muikale kabidi wakula ne meji.

²²Oloferne kuambila Yudite ne: — Mvidi Mukulu mmuenze bimpe, mukumushe kuenu kule, mukutume apa bua tumone mua kutshimuna ne kubutula bantu badi bapepeja Nebukadnesare, mfumuanyi.

²³Kadi wewe kuena amu muimpe to. Udi kabidi mumanye mua kuakula bimpe. Bu wewe muenze muwambi amu, Mvidi Mukulu webe neikale Mvidi Mukulu wanyi. Wewe kabidi neusombe mu nzubu wa bukalenga bua mukalenga Nebukadnesare, bantu nebakupe lumu buloba bujima.