Read Tshiluba Yudite 12 Bible Online

Yudite 12 - Tshiluba bible

Yudite 12

¹Oloferne kutuma diyi bua Yudite asombe ku mesa, bavua kutekaku malonga a tshiamu tshitoke tshia mushinga mukole. Kutumaye diyi bua bamuenzele biakudia amu biende menemene ne nwinyo wende uvuaye udinuina.

²Kadi Yudite kuamba ne: — Tshiena mua kudia biakudia ebi, bualu ndi mua kunyanga mukenji wa kudi Mvidi Mukulu[65] wanyi. Nendie amu bindi mulue nabi.

³Oloferne kumuandamuna ne: — Pikala biakudia biudi nabi bijika, mutudi mua kuenza bua kukupetela bikuabu bidi bifuanangana ne ebi mbishi? Bualu mu mitanda yetu emu, kamuena muntu wa tshisamba tshiebe nansha umue.

⁴Yudite kumuandamuna ne: — Amu pautshidi ne muoyi, bangabanga tshiyi muanji kujikija biakudia bindi nabi bua kudia, Mvidi Mukulu neakuate nanyi mudimu bua kukumbaja bidiye muele meji.

⁵Balombodi ba tshiluilu tshia Oloferne kumubueja mu ntenta, kulalaye too ne munda nkulu. Patshiatshia kubikaye butuku kabuyi buanji kutshia.

⁶Kutumaye bantu bua kuambila Oloferne ne: ndi nkulomba bua undekele nya kutendelela.

⁷Oloferne kutumina balami ba tshiibi diyi bua kabamukandiki. Yudite kushala mu mitanda matuku asatu. Butuku uvua uya mu lubuwa lua mu tshimenga tshia Betuliye, uvua owa mayi a mpokolu.[66]

⁸Pavuaye upatukamu, uvua utendelela Maweja-Nangila, Mvidi Mukulu wa Izrayele bua anulombole mu bivuaye mubange, amone mua kupandisha bena Izrayele.[67]

⁹Yeye mumane kumusha mikiya,[68] kupinganaye mu ntenta. Kushalayemu ne ku dilolu, too ne padibu bamupa tshiakudia.

¹⁰Bafika mu dituku dinayi,[69] Oloferne kuenzeja didia dinene. Uvua anu mubikile bena mudimu bende. Kadi kavua mubikile mulombodi wa tshiluilu tshiende nansha umue.

¹¹Kuambilaye Bagoyase, mutungu uvua mutangile bintu biende ne: — Uye kungambidila mukaji wa bena Ebrewu udi kuebe awu, umusuishile bua avue kudia ne kunua netu pamue.

¹²Bualu bidi mua kuikala ne bundu bu tuetu mua kupanga kubuelela mukaji wa nenku mu nzubu. Tuetu katuyi bamuambishe neatuseke.[70]

¹³Bagoyase kulayangana ne Oloferne, kuyaye kudi Yudite, umuamba ne: — Wewe mukaji wa mushinga nenku, anyisha uye kudi mfumuanyi, udi ukubikila kuende. Neakusankishe padiye ukupeta. Neunue netu nwinyo lelu, neusanke bu mudi nsongakaji ya bena Ashure idi mu nzubu wa bukalenga wa Nebukadnesare.

¹⁴Yudite kuandamuna ne: — Mundi mua kubenga diyi dia mfumuanyi mbishi? Tshiyi ngelakana, nengenze tshidi tshilengelela mfumu, bualu tshidi disanka dianyi dindi mua kuvuluka ne mundi mfua.

¹⁵Kujukaye, kuvualaye bilamba biende bimpe ne bilengejilu bionsu. Mukaji muena mudimu wende kudianjila mu ntenta wa Oloferne, kuadijaye biseba bia mikoku panshi kumpala kua Oloferne. Biseba abi ke bivua Bagoyase mupe Yudite bua ikale udioluelapu ku dituku ku dituku diba didiye udia.

¹⁶Yudite kubuela mu ntenta, kudiolola pa biseba panshi. Oloferne kualakana Yudite, lungenyi luende kulubakana bikole. Muoyi wa kubuelela Yudite munzubu kumusaminawu bikole. Bualu katshia umonangana nende, uvua amu ukeba mushindu wa kumufikisha ku dimanyangana nende.

¹⁷Oloferne kumuamba ne: — Nuaku, usanke pamue netu.

¹⁸Yudite kumuandamuna ne: — Nennue mfumuanyi, bualu disanka dianyi dia lelu ndipite dia katshia bandela.

¹⁹Kuangataye bivua muena mudimu wende mumulambile,[71] kudiaye kabidi kunuaye, Oloferne mutangile.

²⁰Oloferne kumvuaye disanka, kunuaye nwinyo muvule, bungi buvuaye kayi muanji kunua dituku nansha dimue katshia bamutela.