Read Tshiluba Yudite 15 Bible Online

Yudite 15 - Tshiluba bible

Yudite 15

¹Padi bena myita bavua mu ntenta bumvua lumu alu, kupampakanabu.

²Bowa kukuata bantu bonsu diakamue, kumukabu mu mitanda. Kunyemenabu mu tujila tua mu mpata ne mu mikuna muntu kayi mua kuvuluka mukuabu.

³Bavua ne mitanda yabu mu mikuna, minyungulukila tshimenga tshia Betuliye kunyemabu kabidi. Ke bena Izrayele ne bantu bonsu bavua munkatshi muabu, bavua ne dikanda dia myita, kubalondakaja.

⁴Oziyase kutuma bantu ne mukenji mu Betomestayime, mu Bebayi, mu Koba, mu Kola[78] kabidi ne mu ditunga dionsu dia bena Izrayele, bua kubambila bionsu bivua bienzeka. Kubikilabu bantu bonsu, bua kulondakajabu baluishi, kubabutula.

⁵Diakamue bena Izrayele bumvua nanku, kupona pavua baluishi, kubasaya bonsu too ne bavua ku Koba. Bantu bavua mu Yerushalayime ne bonsu bavua basa pa mikuna kunyema kabidi, bualu bantu bakavua bamana kubamanyisha bivua bienzeke mu mitanda ya baluishi. Bena mu Ngilaade[79] ne bena mu Ngalileya kubanga myita minene kubashipa bikole too ne ku Damase ne mu misoku ivua nayi mutumba.

⁶Kadi bena mu tshimenga tshia Betuliye bavua bashala kubuela bobu mu mitanda ya bena Ashure. Kupawulabu bintu biabu, kuyabu ne bintu bia mushinga muvule bia bungi.

⁷Padi bena Izrayele bapingana, badi bakuata bionsu bivua bishala. Bantu bavua mu misoku ne bavua mu madimi ne mu mikuna, kabidi ne mu mpata kunyengabu kabidi bintu bia bungi, bualu muvua bintu bipite bungi.

⁸Yowakime,[80] mutuangaji munene ne tshipangu tshia bakulu ba bena Izrayele bavua basa mu Yerushalayime, kutuabu ku Betuliye. Bavua basue kudimuenena bilenga bivua Maweja-Nangila muenzele bena Izrayele. Bavua basue kabidi bua kumona Yudite ne kumuela muoyi.

⁹Padibu bafika kuende, kumutuabu makumbu pamue bamba ne: — Wewe udi butumbi bua bena Yerushalayime ne lumu lua tshisamba tshietu.

¹⁰Amu wewe ke udi muenze bionsu ebi. Udi mukebele bena Izrayele disanka. Mvidi Mukulu nkayende mmusanke bua mudimu webe. Maweja-Nangila muena bukole buonsu akuele lupemba kashidi! Bantu bonsu kupunguluja ne: — Amene! Bikale nanku.

¹¹Bena Izrayele kupawula bintu mu mitanda ya bena Ashure matuku makumi asatu. Kupeshabu Yudite ntenta wa Oloferne, ditanda dia biamu, malalu ende, mabungu, ne ngesu ne bintu biende bionsu. Kubiangataye bionsu, kubiteka pa kabalu, kasuika ku matempu, kukungijaye bionsu pamue pa matempu.

¹²Bakaji bonsu ba bena Izrayele kuvuabu kudiye bua kumumona ne kumuela ka lumbandi. Bamue ba kudibu bavua bimba musambu bamujila ne maja. Yudite kuangata bisumbu bia bilongu bivuaye nabi kubipa bakaji bavua bamulonda.

¹³Bobu bonsu kusuikabu nkata ya mabeji a olive ku mitu. Yeye ke uvua ntungamulongu, ulombola bakaji bonsu. Kutungunukaye kumpala bantu bavua bimba misambu. Bantu bonsu ba bena Izrayele bavua munyima muabu ne bia myita, kabidi ne bikata bia bilongu.

¹⁴Yudite utuma musambu wa diela nawu Mvidi Mukulu tuasakidila, bena Izrayele bonsu bateleja. Bena Izrayele bonsu ne bantu bonsu bavua bapunguluja musambu pamue.