Read Tshiluba Yudite 16 Bible Online

Yudite 16 - Tshiluba bible

Yudite 16

¹Telejayi muvua Yudite wimba musambu. “Tuimbilayi Mvidi Mukulu wanyi musambu ne ngoma. Imbilayi Maweja-Nangila misambu ne luzenze! Musakilayi misambu ya kumutumbisha. Numubikile avue kunuambuluisha.

²Bualu Maweja-Nangila, ke Mvidi Mukulu udi ujikija myita, uvua munnyenge mu bianza bia baluishi banyi, kumpingajaye kabidi mu mitanda tshiyi ne mputa pambidi, munkatshi mua bantu bende.

³Bena Ashure badi bafuma ku mikuna ya ku mutu kua ditunga, badi bavua bantu binunu ne binunu, badi mu tshiluilu tshiabu. Bungi buabu budi buele nkila, mayi kaayi apita, bena tubalu babu badi buwule mikuna tente.

⁴Baluishi basue kuosha ditunga dietu dijima, kubutula bansonga betu ne muele wa mvita, kuimansha bana betu ba ku dibela, kuya ne bana betu ku bupika, kutunyenga nsongakaji yetu.

⁵Maweja-Nangila muena bukole buonsu, uvua mubapumbishe pavuaye muambuluishe mukaji awu.

⁶Mfumuabu ki mmushipa kudi bansongalume batshidi ne dikanda, ki mmushipa kudi bilobu, kabavua bamuluisha kudi bantu ba kafiondu. Kadi Yudite, muana wa Merari,[81] wamutshimunyi amu bua bulenga bua mpala wende.

⁷Uvua muvule bilamba biende bia lufuila, bua kupatula bena Izrayele bavuabu bakengesha mu bupika, uvua mulabe mafuta a mupuya muimpe ku mesu.

⁸Uvua musuike nsuki yende ne mukaba, bua kulenduisha muluishi, uvua muvuale muntumpu wa buanda bua mitshi.

⁹Mesu a mulombodi wa bena myita udi ku mutu kua bakuabu, avua mapite kunanga bisabata biende, kabidi bulenga buende buvua bumulobesha. Kukosaye mutu wende ne muele.

¹⁰Bena Persa kuzakala bua tshikama tshiende, kadi bena Madayi kutshina bulobu buende.

¹¹Ke tshisamba tshietu tshivuabu bafuishe bundu, kuela mbila ya mvita, bena Ashure kukuatshika bowa, tshisamba tshietu tshidi katshiyi ne bukole, kuela bibingu, baluishi kuzakala.[82] Tshisamba tshietu kuela tunkunduluila.

¹²Bobu kubatubula ne mafuma, kudi bavuabu bapetula bu tuana tua bakaji, bobu kubatapa mputa, kutuabu, kunyemabu bu bantu bavua kabayi ne bukole. Kufuabu bualu Maweja-Nangila uvua udiluangena myita eyi.

¹³Nengimbile Mvidi Mukulu musambu mupiamupia,[83] Maweja-Nangila udi munene udi ne butumbi, bukole buebe budi buzakaja bantu, kakuena udi mua kubutshimuna.

¹⁴Bionsu biudi mufuke mbidilongolola bua kukukuatshila mudimu. Wewe kuamba amu muaku webe bua bionsu bikaleku. Wewe kubiela Mueyelu webe bua bikale bilongame, muntu nansha umue kena mua kutuila diyi diebe nkanana.

¹⁵Paudi ufika munda, mikuna idi yupukila kuinshi kuayi, mbuebue idi idiela mu mayi manene, idi yenguluka bu mudi kamonya. Kadi bantu badi bakunemeka badi bavuluke muudi mubamanye.

¹⁶Bualu mulambu udi amu kantu kakese, kawena ne mupuya udi ulengelela Maweja-Nangila. Mulambu wa kuosha, kawena ne mushinga ku mesu kuebe. Kadi muntu udi unemeka Mvidi Mukulu udi ne lumu kashidi.[84]

¹⁷Matunga onsu adi aluisha tshisamba tshietu, adi ne diakabi. Maweja-Nangila muena bukole buonsu abanyoke dituku dia tshilumbuluilu, neababutuishe kudi kapia ne kudi misanda.[85] Nebadile bakenga bua kashidi.”

¹⁸Padibu bafika mu Yerushalayime, bantu bonsu kuyabu mu nzubu wa Mvidi Mukulu bua kumunemeka. Kumushabu mikiya ivuabu nayi, pashishe kulambulabu Mvidi Mukulu milambu ya kuosha, ya budisuile, ne ya bintu bikuabu.

¹⁹Bintu bia Oloferne bivuabu bamupa kudi bena Izrayele, Yudite wakabilambula Mvidi Mukulu. Kadi bua tshilamba tshia kudijika bua tumue tshivuaye muangatshile mu tshibambalu tshia mulombodi wa bena myita udi ku mutu kua bakuabu, Yudite uvua mutshilambule Maweja-Nangila, bu mudi tshintu tshipawule mu myita tshivuaye mumulamine.[86]

²⁰Mu ngondu isatu, bena Izrayele bavua amu basanka kumpala kua nzubu wa Mvidi Mukulu mu Yerushalayime bu muvuabu batshimuna. Yudite uvua amu nabu.

²¹Matuku awu mamane kupita, muntu yonsu kupingana kuende, Yudite pende kupingana ku Betuliye mu nzubu yende. Kushalaye ne lumu lunene mu matuku onsu atshivuaye ne muoyi, mu ditunga dijima.

²²Bantu balume bavule bavua bajinga mua kumusela. Kadi katshia bayende Menashe ufua bamujika,[87] yeye uvua ubenga amu kubenga kashidi bua muntu kamuangatshi kabidi.

²³Pashishe kukulakajaye bikole. Uvua amu musombele mu nzubu uvuabu ne bayende too ne ku bidimu lukama ne bitanu. Bangabanga kayi muanji kufua, uvua muanyishe bua mukaji muena mudimu wende adienzele malu. Yudite uvua muabanyine bana babu ne babayende tshiina bintu biende. Kufuaye mu Betuliye, kumujikabu mu lukita lua bayende.[88]

²⁴Bena Izrayele kuenzabu madilu ende matuku muanda mutekete.

²⁵Patshivua Yudite ne muoyi, too ne kunyima kua lufu luende, matuku a bungi, kakutshivua kabidi muntu uvua ukanyina bena Izrayele to.