Read Tshiluba Yudite 3 Bible Online

Yudite 3 - Tshiluba bible

Yudite 3

¹Kutuminabu Oloferne bantu ne mukenji, bamuambila ne:

²— Tudi bimana kumpala kuebe, bu bena mudimu ba Nebukadnesare, mukalenga munene. Utuenzele bu muudi muanyishe.

³Bikumbi bietu bia bimuna, maloba etu onsu ne madimi etu a ntete ya kuenza bukula, ne nyama yetu mikese ne minene, kabidi ne mpata yetu yonsu ya kudishila nyama, bidi mu bianza biebe, enza nabi muudi musue.

⁴Bimenga bietu bidi mu dina diebe, bantu badimu mbapika bebe. Luaku ubenzele muudi musue.

⁵Eyi ke miaku ya bantu bavuabu batumina Oloferne, bamuambila.

⁶Oloferne kupueka too ne ku Mayi manene a pankatshi pamue ne tshiluilu tshiende. Kutekaye bena myita bua balame bimenga, kubuejaye mu bena myita bende abu, bantu balume ba dikanda.

⁷Bavua bamuakidila mu ditunga dijima kudi bantu, bambula nkata ya bilongu benda baja maja, balonda dikasa dia ngoma.[12]

⁸Kunyangakajaye buloba bujima, kushimbula metu abu, ne miaba isuabu batendelela. Bualu tshiende tshivuaye muipatshila tshivua amu kubutula nwidie ya panu yonsu bua bantu bonsu bashale kukukuila amu Nebukadnesare nkayende, kabidi bua miaku yonsu ne bisamba bionsu bikale bimusengelela amu yeye bu nwidie.[13]

⁹Pashishe, Oloferne kufika buludiludi ne Yizreyele,[14] pepi ne Dotane kumpala kua mikuna minene ya Yudeya.

¹⁰Kuasabu mitanda pankatshi pa bimenga bia Ngeba ne Shitopolise.[15] Kushalayemu ngondu mujima bua kupeta kabidi biakudia bikuabu bivua tshiluilu tshiende tshikengela.