Read Tshiluba Yudite 4 Bible Online

Yudite 4 - Tshiluba bible

Yudite 4

¹Bena Izrayele bavua base mu Yudeya kumvuabu lumu, muvua Oloferne mulombodi wa bena myita, uvua ku mutu kua bakuabu, uvua kabidi tshindonde tshia Nebukadnesare, mukalenga wa bena Ashure, mukengeshe matunga makuabu, mupawule ne mubutule miaba yabu yonsu ya kutendelela.

²Kukuatshikabu bowa bunene, pavuaye wenda usemena kuvuabu. Bavua kabidi ne luzakalu bua Yerushalayime ne bua nzubu wa Maweja-Nangila Mvidi Mukulu wabu.

³Batshina bafuminaku mu bupika.[16] Diakamue, kufikabu bua kujidila kabidi nzubu wa Mvidi Mukulu, ne ngesu ne malongu ende, ne tshilambuilu tshiende, binabu banyanga ne mikiya.

⁴Bobu kutuma bantu ne mikenji mu Samariya mujima, mu Kona, mu Bete-Orone, mu Abele-Mayime ne mu Yeriko, pashishe ku Koba, ku Asore mu tshibandabanda tshia Saleme.

⁵Kukuatabu nsongu yonsu ya mikuna mitumbuke. Kukoleshabu misoku ya mu ditunga adi. Kutekabu biakudia bikuabu bua myita, bualu batshina bafuminaku ku dinowa bia pa madimi.

⁶Yowakime, ke uvua mutuangaji munene wa mu Yerushalayime mu tshikondu atshi. Una mutumine bantu bana mu Betuliye, ne mu Betomestayime mukanda, badi buludiludi ne musoku wa Yizreyele, mu mpala mua mpata wa Dotane.[17]

⁷Kubatuminaye diyi bua kulama njila ya mu mikuna, ivua itungunuka ne ku Yudeya. Ina mipepela bua bantu kuyilama, bualu bana mua kupitshilamu kudi bantu babidi musangu umue.

⁸Bena Izrayele kukumbajabu menemene bivuabu bajinga kudi mutuangaji munene ne kudi tshipangu tshia bakulu ba bena Izrayele bavua badisangishe ku Yerushalayime.

⁹Mu ditunga, muntu yonsu una ulomba Mvidi Mukulu diambuluisha ne disuminyina. Bana bajila biakudia bikole.

¹⁰Bantu balume ne bakaji babu, bana babu ne bimuna biabu, ne benyi badi basombe mu bena Izrayele, bena mudimu badibu bafuta kabidi ne bapika, kuvualabu bilamba bipandike.[18]

¹¹Bantu bonsu ba mu Yerushalayime, balume bakaji ne bana, kudielabu panshi kumpala kua nzubu wa Mvidi Mukulu. Bavua badilaba butu[19] mu mitu, banala bilamba bia madilu, bua kulomba Maweja-Nangila luse.

¹²Bana kabidi banyungulule tshilambuilu ne tshilamba tshia madilu. Bantu bonsu pamue, bana basengelela Mvidi Mukulu wa Izrayele bua kalekedi baluishi bakuata bana batekete ne bakaji kabidi, babutula bimenga bidiye mumane kupesha bantu bende. Bana bamusengelela kabidi bua kasankishi bantu benyi bua bamone mua kunyanga nzubu wa Mvidi Mukulu ne mikiya kabidi bamuseka.

¹³Maweja-Nangila kumvuaye dilomba diabu, kumonaye dikenga diabu. Bantu kutungunukabu ne dijila biakudia matuku a bungi mu ditunga dijima dia Yudeya ne mu Yerushalayime, kumpala kua nzubu wa Maweja-Nangila muena bukole buonsu.

¹⁴Yowakime, mutuangaji munene pamue ne batuangaji bonsu, ne bantu bakuabu bavua bakuata mudimu mu nzubu wa Maweja-Nangila, kuvualabu bilamba bia madilu, kulambulabu Mvidi Mukulu milambu ya kuosha[20] ya buatshiabuatshia, ya mapiku ne ya budisuile.

¹⁵Bavua balaba butu pa bifulu biabu. Bavua batendekena Maweja-Nangila muabu muonsu bua ambuluishe bena Izrayele.[21]