Read Tshiluba Yudite 5 Bible Online

Yudite 5 - Tshiluba bible

Yudite 5

¹Oloferne, mfumu udi ku mutu kua biluilu bia bena Ashure, kumvuaye lumu ne: bana ba Izrayele badi badilongolola bua kuluangana myita, bajika njila ya mu mikuna. Mbakoleshe ku nsongu ya mikuna, bateya kabidi ne mateyi mu mpata.

²Ke Oloferne kupeta tshiji tshikole ne lonji, kubikidisha bamfumu bonsu ba bena Mowabe,[22] ne balombodi ba myita ba bena Mowabe bavua ku mutu kua balombodi bakuabu, ne balombodi bonsu ba bitupa bia buloba bavua ku muelelu wa Mayi manene a pankatshi.

³Kubambilaye ne: — Nuenu bena Kenaane,[23] ngambilayi bantu badi mu buloba bua ku mikuna ebu mbanganyi? Bimenga bidibu basombe mbia mushindu kaayi? Tshiluilu tshiabu tshidi ne mushinga ku tshinyi? Bukole buabu ne dimanya diabu bidi mua kubambuluisha mua kutua nkanana ku tshinyi? Udi ulombola bena myita babu mmukalenga kaayi?

⁴Amu bobu bantu abu ba kudi diba dibuelela[24] bavua babenga mua kumonangana nanyi bua tshinyi?

⁵Akiyore, mfumu wa bena Amone, udi utangila bamfumu bakuabu, kumuandamunaye ne: — Mfumuanyi wa bena myita, udi ku mutu kua bakuabu, anyisha bua muena mudimu webe akule. Ndi musue kukuambila bulelela mudi bantu badi base pa mikuna idi pabuipi ne mutanda webe. Tshiena nkushima to.

⁶Bantu aba badi ndelanganyi ya bena Babilone.[25]

⁷Kabavua banyishe mua kukuatshila mvidi ya bankambua babu mudimu. Bankambua babu bavua basombele mu Babilone.

⁸Kubengabu mua kulonda mu dikasa dia bankambua babu bavua basombe mu Babilone. Bavua basue kunemeka Mvidi Mukulu wa mulu, ukavuabu bamanye ne: udi amu umue. Kubipatabu mu ditunga diabu, mu buloba bua nwidie yabu ya kale. Ke bobu kuanji kuya kusomba mu ditunga dia Mezopotamiya wa ku mutu. Kushalabu matuku mulongulongu.[26]

⁹Mvidi Mukulu wabu kubambila bua bumuka mu ditunga adi, baya kuasa mu ditunga dia Kenaane. Bobu kuasamu, kuvudijabu mpawungi, ne nkanu ya tshiamu tshitoke tshia mushinga mukole, kupetabu bimuna bivule.[27]

¹⁰Pashishe, tshiyole tshia nzala kubuela mu ditunga dijima dia Kenaane. Bobu kuya mu Ejipitu. Muaba uvuabu mua kupeta tshidi mua kudisha mubidi.[28]

¹¹Kadi mukalenga wa bena Ejipitu kutuadija kubabenga, uvua ukeba ne budimu mua kubabutula pavuaye ubenzeja midimu mikole ya dikuma tushole. Bantu bakubafuisha bundu, kubamonabu bu bapika.[29]

¹²Bobu kutendekena Mvidi Mukulu wabu. Yeye kutumina ditunga dijima dia Ejipitu bipupu kabiyi ne mushindu wa kubiondapa.[30] Ke bena Ejipitu kubipata mu ditunga diabu.

¹³Mvidi Mukulu kuumisha Mayi manene makunze avua kumpala kuabu,[31]

¹⁴kubalombolaye mu njila wa ku mukuna wa Sinayi ne ku Kadeshe-Barneya. Kuipatabu bantu bonsu bavua badianza kuasa mu tshipela,

¹⁵kuasabu mu ditunga dia bena Amone, kubutulabu bena Eshebone,[32] kubapitabu bukole. Pashishe kusabukabu Yardene.

¹⁶Kukuatabu buloba bua mikuna yonsu, kuipatabu bavua miaba ayi, ke bena Kenaane, bena Perizi, bena Yebusa, bena Shekeme ne bena Ngirgashi bonsu. Bobu kushalamu matuku mavule.

¹⁷Pavuabu kabayi benza bivua bibi ku mesu a Mvidi Mukulu wabu, bavua basombe mu diakalenga. Kadi Mvidi Mukulu udi ubalama, mmubenge nsombelu mubi.[33]

¹⁸Kadi diba divuabu kabayi balonda meyi avuaye mubambile, bavua babutuke bikole mu myita mivule. Ndekelu bavua baye nabu mu bupika mu matunga a bantu benyi. Bavua bupula nzubu wa Mvidi Mukulu wabu, bakuata bimenga biabu kudi baluishi.

¹⁹Pavuabu balamata kabidi Mvidi Mukulu wabu, bavua bumuke mu matunga avuabu babatangalaje.[34] Bavua basombe mu Yerushalayime muaba udi nzubu wabu wa Mvidi Mukulu. Bavua base tshiakabidi mu mikuna muvua kamuyi bantu.

²⁰Mpindiewu, mulombodi wanyi udi ku mutu kua bakuabu, pikala bantu aba kabayi batumikila mikenji, kabayi bamanye Mvidi Mukulu wabu, kabidi patuikale bajadikilemu ne bavua benza malu mabi, nanku netubaluishe, netubatshimune.

²¹Kadi pikala bantu aba kabayi ne bubi ku mesu kua Mvidi Mukulu wabu, mulombodi wanyi wa bena myita udi ku mutu kua bakuabu, ubalekele mu ditalala. Maweja-Nangila Mvidi Mukulu wabu udi mua kubalama, nenku bantu bonsu kutuseka.

²²Amu Akiyore ujikija kuakula, bantu bonsu bavua banyungulukila ntenta, kutuadijabu kutontolola bivuaye wamba. Balombodi ba bena nwita ba Oloferne ba tshisumbu tshia ku mutu ne ba mienampala ba ku muelelu wa Mayi manene a pankatshi ne bena Mowabe,[35] kuelabu meji a kumushipa.

²³Bavua bamba ne: — Katuena mua kutshina bena Izrayele nansha. Tshisamba etshi, katshiena ne bukole nansha ne mushindu wa kulongolola tshiluilu tshikole.

²⁴Oloferne, mulombodi wa bena mvita udi ku mutu kua bakuabu, tuluishayi bantu aba, tshiluilu tshiebe netshibabutule.