Read Tshiluba Yudite 6 Bible Online

Yudite 6 - Tshiluba bible

Yudite 6

¹Mitoyi ya balombodi ba myita bavua mu tshipangu mimane kujika, ke Oloferne, mulombodi wa bena myita ne mfumu wa tshiluilu tshia bena Ashure, kubikilaye Akiyore munkatshi mua bantu bavule, bena ku luseke lua Mayi manene a pankatshi ne bena Mowabe, umukonka ne:

²— Akiyore, wewe udi nganyi? Nuenu bantu bavuabu bakosa mishiku kudi bena Izrayele, nudi banganyi bua nuenu kulua apa kutuambila malu bu bambi? Udi utubela bua katuluishi bena Izrayele, bualu Mvidi Mukulu wabu udi mubalame. Kudi nwidie mukuabu bu Nebukadnesare anyi? Amu yeye neatumine bantu aba tshiluilu tshiende tshikole, netshibabutule pa buloba. Kadi Mvidi Mukulu wabu kakubasungidila to.

³Tuetu tudi tukuatshila Nebukadnesare mudimu, netubashipe musangu amu umue. Kabena mua kutuila babandi betu ba pa tubalu nkanana nansha.

⁴Netuboshe batshikale ne muoyi. Mikuna yabu neinue mashi abu ne bitalu biabu nebiuwule mu mpata tente. Kabena mua kuenza bualu nansha bumue kumpala kuetu to. Mukalenga Nebukadnesare, mfumu wa buloba bujima mumane kuamba ne: nebabutuke bonsu. Bidiye muambe nebikumbane.

⁵Kadi wewe Akiyore, muena Amone udibu babuejila lupetu, udi uyukila lelu utungilangana tshitungu. Kuakummona kabidi bituadija ku lelu, too ne ku dituku dindi nsombuela bantu bavua banyema mu Ejipitu.

⁶Pangapingana, bena myita banyi ne balombodi banyi ba bena myita, nebakutubule mbadi ne miele ya myita ne mafuma,[36] nebakuimanshile wewe munkatshi mua bena Izrayele bikale bafue.

⁷Bantu banyi, ne bena mudimu banyi, mpindiewu nebakufile mu ditunga dia mikuna, nebakushiye mu umue wa ku misoku idi pa miaba mipulumuke ya pa mukuna.

⁸Nebakushipe pamue ne bena Izrayele.

⁹Bualu paudi muitabilemu ne: dikenga kadiena mua kubakuata, kubungami to Akiyore. Kadi ujadike ne: bionsu bimvua muambe nebikumbane.

¹⁰Oloferne kutumina bena mudimu bende bavua bimana mu ntenta diyi, bua bakuate Akiyore, baya nende mu Betuliye,[37] kabidi bamufite kudi bena Izrayele.

¹¹Bena mudimu kumukuata, kumupatula mu mitanda mu mpata. Muaba awu kuyabu batangila ku mikuna. Kufikabu ku mpokolu idi ipatukila mayi kuinshi kua tshimenga tshia Betuliye.

¹²Tshimenga mene tshivua tshiasa ku mikuna. Padi bena myita babamuenena ku bule, kuangatabu bia myita kupatukabu mu tshimenga. Bantu bonsu bavua ne bia myita bifuana ndundu ya kuela nayi nyunyi, kupangisha bena Ashure mua kupita kubanda mu tshimenga ku mabue avuabu babela.

¹³Bena Ashure kutuluka kuinshi kua mukuna, kusuikabu Akiyore mionji, kumushiya kuinshi kua mukuna. Pashishe kupinganabu kudi mfumuabu.

¹⁴Bena Izrayele kupueka mu tshimenga tshiabu, kumonabu Akiyore. Kumusululabu mionji, kuyabu nende mu tshimenga tshia Betuliye kudi bamfumu ba tshimenga.

¹⁵Tshikondu atshi, bamfumu, bavua Oziyase, muana wa Mika muena mu tshisamba tshia Simeyone;[38] Kabrise, muana wa Otniyele, kabidi ne Karmi, muana wa Melkiyele.

¹⁶Bobu abu kubikidishabu bakulu bonsu ba mu tshimenga. Bansonga ne bantu bakaji kuambulujabu lubilu mu tshisangilu. Kutekabu Akiyore munkatshi mua bantu. Oziyase kumukonka muvua bualu buenzeke.

¹⁷Akiyore kubandamuna ubalondela bivuabu bajadika mu tshipangu tshivua Oloferne mulombodi, kabidi ne malu onsu avua Akiyore muambile bamfumu ba bena Ashure, kabidi ne muvua Oloferne usendeka bena Izrayele.

¹⁸Bena Izrayele kutua bonsu binu panshi, bakukuila Mvidi Mukulu bamba ne diyi dikole ne:

¹⁹— Maweja-Nangila, Mvidi Mukulu wa mu diulu, utangile buakulavi bua baluishi betu,[39] utufuile luse, padibu bamfuishe bundu! Utuvuluke lelu tudi bantu bebe.

²⁰Pashishe kukoleshabu Akiyore ku muoyi, bamuela ka lumbandi kavule.

²¹Oziyase kupatuka nende mu tshipangu, kuya nende kuende, kubikila kabidi bakulu mu didia dia dilolu. Butuku bujima abu, bena Izrayele bavua balomba Mvidi Mukulu wa bena Izrayele diambuluisha.