Read Tshiluba Yudite 7 Bible Online

Yudite 7 - Tshiluba bible

Yudite 7

¹Butshia, Oloferne kutumina tshiluilu tshiende tshionsu, ne bena myita bende diyi, bua baye bonsu ku Betuliye ne myita, bajike njila idi miye ku mikuna, babunde bena Izrayele.

²Dituku adi, muntu uvua ne dikanda uvua ne bua kuya ku myita. Tshiluilu atshi tshivua ne bena myita badi benda ku makasa binunu lukama ne makumi muanda mutekete, babandi ba pa tubalu binunu dikumi ne bibidi, katuena babala bantu badi bambula mabuki a bantu benda ku makasa ne majitu. Nanku tshiluilu atshi tshivua ne bantu bavule.

³Kuasabu mitanda mu mpata pabuipi ne ku tshimenga tshia Betuliye pamue ne mpokolu. Kusombabu mu buloba buonsu buvua buye ku Dotane too ne ku Delbayime mu bule, mu butshiama buvua butuadija ku Betuliye too ne ku Kyamone buludiludi ne tshimenga tshia Yizreyele.[40]

⁴Bena Izrayele kupampakana pamonyibu bantu bungi nanku, ke kuambilanganabu ne: — Bantu aba, nebanyangakaje ditunga dietu, nansha mpongu nansha tukuna nebikale bikese, bobu badi amu ba bungi.

⁵Muntu yonsu wa kudibu kuangata biende bia kuluangana nabi myita. Bena Izrayele kutemeshabu kapia ku tuleya, kushala batentekelangana nabu butuku bujima abu.

⁶Butshia, Oloferne kupatula tshiluilu tshionsu tshia babandi ba pa tubalu bua bena Izrayele bayua mu Betuliye batshimone.

⁷Kukenketaye njila ivua mibanda miye mu tshimenga. Kukonkononaye kabidi mpokolu ya mayi, kuyikuata. Kutekaye bena myita bua babilame. Ke yeye kupingana kuvua bende basombela.

⁸Bamfumu bonsu ba tshisamba tshia Ezawu,[41] balombodi ba bena Mowabe ne bamfumu bayua basombe ku muelelu wa Mayi manene a pankatshi bonsu kusemena kudi Oloferne, kumuambila ne:

⁹— Mukalenga, teleja tukuambila, bua bena tshiluilu tshiebe kabapetshi njiwu.

¹⁰Bantu ba tshisamba tshia bena Izrayele kabena bamona mafuma abu bu adi ne bualu kudibu to. Kadi tshidibu batumbisha tshidi amu ditumbuke dia mikuna idibu basa ayi.[42] Bualu kabiena bipepela mua kufika ku nsongu ya mikuna yabo ayi to.

¹¹Nanku mukalenga, kuena mua kubaluisha bu mudi myita ya luseela, bualu katuakushipa muntu wabu nansha umue.

¹²Wewe shala mu mitanda ne bena myita bebe. Kadi tuetu bena mudimu webe tudi tuenda tukenketa mishimi ya mayi abu adi apatuka muinshi mua mukuna bua kuyilama.

¹³Bualu bantu ba mu tshimenga tshia Betuliye badi bayua kusuna mayi a ku mishimi ayi. Nyota neibabutule. Nenku nebafile tshimenga tshiabu mu bianza biebe. Tuetu petu ne bantu betu netubande, tusemena ku nsongu ya mikuna, kabidi tuasaku bua kubapangisha bua kupatukabu. Nanku muntu wabu nansha umue kakupatuka mu tshimenga.

¹⁴Nebafue nzala, bobu, bakaji ne bana babu, myita kayiyi mianji kubanga. Nebikale bamana kubunguluja panshi kumpala kua nzubu yabu.

¹⁵Nanku ke difutu dia pa buntomboji buabu, bualu mbakutombokela, kabidi kabavua basue kudifila kuudi mu bupole.

¹⁶Miaku yabu ayi kulengelela Oloferne ne bakulu ba tshiluilu bonsu. Ke kutumaye diyi bua benze muambibu amu.

¹⁷Bena Amone kutula mitanda ne bena Ashure binunu bitanu, kuenzabu pabu momumue. Kuasabu mu tshibandabanda, kukandamanabu ne mayi a mishimi a bena Izrayele.

¹⁸Ke bena Ezawu ne bena Amone kuya kuasa mu mikuna idi mitangilangane ne tshimenga tshia Dotane. Bamue ba kudibu kuya kuinshi ne kudi diba dipatukila bitangilangane ne Egrebele, udi pepi ne musoku wa Kuse ku muelelu wa musulu wa Mokmure. Bantu ba tshiluilu tshia Asiriya bayua bashala, kuasabu mu mpata, kubuikila ditunga dijima. Bungi bua ntenta ne bungi bua mabuki a tshiluilu bunene nenku buvua bupite.

¹⁹Bena Izrayele kuela Maweja-Nangila Mvidi Mukulu wabu mbila mikole, bualu kabavua batekesha mu maboku pa kumona baluishi babu babanyungulukila, kabidi kabayi mushindu wa kupatuka mu tshimenga.

²⁰Tshiluilu tshijima tshia bena Ashure, badi benda ku makasa, tshia bena matempu a nwita awu onsu, ne babandi ba pa tubalu, bavua babanyungulukila matuku makumi asatu ne anayi. Bena mu tshimenga tshia Betuliye kumushabu mabungu abu onsu avua ne mayi.

²¹Mabungu mamane kushala munda mutupu, bavua babanyina bantu mayi, kadi muntu kavua mua kuanua, ajikija nyota yende dituku dimue nansha.

²²Nenku, bana kuteketangana, bakaji ne bansonga kupungila bikole ne nyota, bavua badishinda mu misesu ya mu tshimenga pabuipi ne ku tshibuelelu. Kabatshivua ne bukole kabidi.

²³Bantu bonsu: bansonga, bakulumpe, bakaji ne bana, kudisangabu ne Oziyase kabidi ne bamfumu ba mu tshimenga.[43] Bobu kutontolola kumpala kua bakulu bonsu, bela mbila ne:

²⁴— Mvidi Mukulu akose nsambu idi munkatshi muetu nenu. Nuvua batuenzela bibi, panuvua nubenga bua kumyuangana ne bena Ashure.

²⁵Kadi mpindiewu tudi tukeba ditalala. Katuena mua kutekemena diambuluisha nansha dimue kudi muntu. Bualu Mvidi Mukulu mmumane kutufila mu bianza biabu, netufue bonsu ne nyota bobu batangila.

²⁶Nanku bikilayi bena mudimu ba Oloferne, ne tshiluilu tshiende tshionsu, nubapeshe tshimenga, bua batshipawule.

²⁷Bidi bimpe tuikale bena lukanu babu, tushale bapika babu, netuikale ne muoyi.[44] Pashishe katuena mua kumona mudi bansonga betu ne bakaji betu ne bana betu bafua, tuetu batangila.

²⁸Tudi tutshipa mu dina dia Muena kulu, mfumu wa buloba, mu dina dia Mvidi Mukulu wetu, Maweja-Nangila wa bankambua betu, udi utusombuela bua mibi yetu ne ya bankambua betu, wenze bua tumone mua kuepuka ku makenga aa.[45]

²⁹Bonsu bavua mu tshipangu kudila, kupampakana, bonsu kutendekena Maweja-Nangila Mvidi Mukulu ne mbila mikole.

³⁰Nanku, Oziyase kubandamuna ne: — Bana betu! Tutekemenayi kabidi matuku atanu, Maweja-Nangila wetu nealeje mudiye utufuile luse. Bualu kena mua kutulekela kashidi to.

³¹Kadi pikala matuku atanu aa mapite, katuyi bapeta diambuluisha, meme nengenze munudi nundomba amu.

³²Pashishe kutangalajaye bantu bonsu: bantu balume kupingana mu miaba yabu ya pa bimana bia tshimenga ivuabu balama, kadi bakaji ne bana kualukila ku mbanza. Bantu bonsu bavua batekete mu maboku teketee.