Read Tshiluba Yudite 8 Bible Online

Yudite 8 - Tshiluba bible

Yudite 8

¹Nanku Yudite kumvuaye malu onsu avua menzeka awu. Yeye uvua muana wa Merari, uvua wa ku ndelanganyi ya Yakobe,[46] wa Sarasadayi, wa Kelumiyele, wa Natanayele, wa Eliyabe, wa Ilkiya, wa Eliya, wa Ekitobe, wa Rafayine, wa Ngideyone, wa Ananiyase, wa Ilkiya, wa Uziyele, wa Yozefe ne Okse.

²Bavua bamusele kudi Menashe, bavua ba mu tshisamba ne diku dimue. Menashe ufuile mu tshikondu tshivuabu banowe ntete ya orje.

³Pavuaye utangila bantu bavua basuika ntete mu bimpampa mu budimi, munya kumuoshawu mu lubombu bikole. Yeye kuya kulala bua kuikisha. Kutuilaye mu tshimenga tshiende tshia Betuliye. Bobu kumujika mu nkita ya bena diku diabu ivua mu budimi buvua pankatshi pa Dotane[47] ne Balamone.

⁴Yudite kushala mukamba amu kuende bidimu bisatu ne ngondu inayi.

⁵Kulu kua musaka wa nzubu wende, uvua mudienzele kazubu mu lutanda bua kuikisha. Uvua uvuala bilamba bipapa muinshi mua bilamba bia bukamba.

⁶Biangatshila katshia bayende wafua, uvua ujila biakudia, pa kutula matuku a muladilu wa dituku dia Dikisha ne dituku dia Dikisha mene, kabidi ne dituku dia ngondu mupiamupia ne matuku a masanka ne a bibilu a bena Izrayele.

⁷Uvua mulenga mpala ne muakane tshishiki. Bayende Menashe uvua mumushile mpawungi ne nkanu ya mushinga mukole ya tshiamu tshitoke, bena mudimu balume ne bakaji, bimuna ne madimi, kabidi uvua ulama bintu biende abi bimpe.

⁸Muntu nansha umue kavua mua kumujana, bualu uvua ukumbaja mikenji ya Mvidi Mukulu bikole.

⁹Bantu kumumanyisha muvua bena Izrayele bamana kuteketa mu maboku pavuabu kabayi ne mayi, ne muvuabu bajana mfumu wa tshimenga. Yudite uvua mumvue kabidi muvua Oziyase muambile bantu ne mubalaye bua kufila tshimenga kudi bena Ashure papita matuku atanu.

¹⁰Kutumaye mukaji muena mudimu uvua ulama bintu biende bionsu kudi Oziyase, Kabrise ne Karmi,[48] kabidi ne kudi bakulu ba tshimenga ubabikila bafike kuende.

¹¹Bantu bamana kufika, Yudite kubambila ne: — Nuenu bamfumu ba bena Betuliye, ntelejayi. Nuvua benza bibi panudi bayukila ne bantu bu munudi benza lelu, nuditshipa nutela Mvidi Mukulu, nuditele ne nuenu kabidi. Kanuvua mua kulaya bua kufila tshimenga kudi baluishi benu nansha, pikala Mvidi Mukulu kayi mututumine diambuluisha mu matuku atanu.

¹²Kadi mpindiewu nuenu mene, nudi banganyi? Nudi nuteta Mvidi Mukulu pa kuamba malu mu dina diende munkatshi mua bantu. Nudi nupingana Mvidi Mukulu anyi?

¹³Mpindiewu nudi nuteta Maweja-Nangila, muena bukole buonsu. Kadi nuenu kanuena mua kumanya mudi Mvidi Mukulu wela meji to.

¹⁴Bualu munudi bapanga budi mu kondu ka munda mua muntu, mudiye wela meji, kadi munudi mua kujingulula Mvidi Mukulu udi wenza bionsu bitudi tumona ebi? Mmunyi munudi mua kumanya bidiye muele meji nansha kutandula malu adiye ukeba kuenza?[49] To, bana betu. Katufikishi Maweja-Nangila Mvidi Mukulu munda!

¹⁵Bualu pikalaye kayi ne meji a kuvua kutuambuluisha mu matuku aa atanu, udi ne bumfumu bua kutupandisha mu tshikondu tshidiye musue nansha udi mua kutulekela tufua kumpala kua baluishi betu.

¹⁶Kadi kanuena mua kudia lupiku bua malu adi Maweja-Nangila Mvidi Mukulu wetu musue kujadika, kabena mua kumutumina diyi mua kuenza bualu, nansha kumuenzeja bua kumyuangana ne bantu.

¹⁷Ke patudi batekemena kudiye bua atupandishe. Tumutendelelayi amu kumutendelela bua atuambuluishe, neatuteleje pikalaye musue.

¹⁸Mu bantu bavua badianjila kumpala kuetu too ne ku lelu, tshisamba nansha tshimue tshia bisamba bietu, tshiota nansha tshimue ku biota bietu, muntu nansha umue wa ku misoku yetu, nansha wa mu bimenga bietu katshiena utendelela nwidie idibu benza kudi bantu, bu muvuabi kale,

¹⁹mu tshikondu tshia bankambua betu.[50] Ke pavuabu babakengesha ne myita babapawula, baluishi betu bababutula bikole.

²⁰Kadi tuetu, katuena tutendelela nwidie mukuabu to, amu Maweja-Nangila. Nenku tudi tumutekemena, nansha tuetu, nansha muntu wa mu tshisamba tshietu.

²¹Bualu bobu bakuata tshimenga tshietu, nebakuate kabidi Yudeya mujima. Nebupule nzubu wetu wa Mvidi Mukulu. Pashishe Mvidi Mukulu neatuase tshilumbu mudibu banyanga nzubu wende ne mikiya.[51]

²²Netuikale ne tshilumbu bua bana betu badibu bashipe ne bua badibu baya nabu mu bupika, kabidi ne bua dinyangakaja dia ditunga dietu. Netushale bapika ba benyi, nebatulombole kudi bantu bakuabu, kabakutuangata ne mushinga to, nebatupende.

²³Nsombelu wetu utudi nende mu bupika ewu, kena mua kusankisha bamfumu betu bua kutufuilabu luse, kadi Maweja-Nangila Mvidi Mukulu neamubipishe.

²⁴Kadi mpindiewu, bana betu, tulejayi mudi mioyi ya bana betu mu bianza bietu. Muaba wa tshijila, nzubu wa Mvidi Mukulu ne tshilambuilu bionsu ebi bidi mu bianza bietu.

²⁵Kadi tuelayi nangananga Maweja-Nangila Mvidi Mukulu tuasakidila, mudiye ututeta bu muvuaye mutete bankamba betu.

²⁶Vulukayi muvuaye muenzele Abrahame, kabidi ne mushindu uvuaye mutete Izake, vulukayi bivua bienzekele Yakobe mu Mezopotamiya, pavuaye ulama mikoku ya mansebende Labane[52]

²⁷Mvidi Mukulu uvua ubateta ne kapia, bua kumanya tshivua munda mua kondu kabu ka muoyi. Kadi bidi bia mumue ne buetu petu, kena mutusombuela. Kena mutunyoke. Bidi amu bua kubela bantu ne: Maweja-Nangila udi ukengesha bantu badi bamunemeka.

²⁸Oziyase kuandamuna ne: — Bionsu biudi muambe bidi bia meji, muntu nansha umue kena mua kubibenga to.

²⁹Bantu bonsu mbamanye mudi meji ebe katshia bakulele ne muudi ujadika malu ebe. Lelu ki mmusangu wa kumpala udi meji ebe amueneka patoke nansha.

³⁰Bantu bavua bafua ne nyota, bavua batuenzeja bua tuenze tshituvua babambila. Tuvua baditshipa ne katuena mua kupula ndondu ewu to.

³¹Nanku, mpindiewu, utulombele kudi Maweja-Nangila. Bualu, udi mukaji wa malu mimpe, bua Maweja-Nangila Mvidi Mukulu alokeshe mvula, mabungu etu uwule, katutu kabidi ne nyota to.

³²Yudite kuandamuna ne: — Ntelejayi, nengenze bualu buashala ndelanganyi yonsu yamba.

³³Lamayi ku tshiibi tshia tshimenga butuku, meme ne mukaji muena mudimu wanyi netudianze kupatuka dituku dinuvua balaya bua kufila tshimenga kudi baluishi betu, kadiyi dianji kukumbana. Maweja-Nangila neangambuluishe bua meme kupandisha bena Izrayele.

³⁴Kadi, kanuena mua kudikonka bua bindi muela meji a kuenza, tshiena mua kunuambila bualu pandi tshiyi muanji kubukumbaja.

³⁵Oziyase ne bakulu babidi ba tshimenga kuandamuna Yudite ne: — Waya bimpe, kabidi Maweja-Nangila Mvidi Mukulu akuendeshe bimpe, anyoke baluishi betu.

³⁶Kumukabu mu mbalanda wa Yudite,[53] kupinganabu mu miaba yabu ya mudimu.