Read Tshiluba Yudite 9 Bible Online

Yudite 9 - Tshiluba bible

Yudite 9

¹Mu nzubu wa Mvidi Mukulu wa mu Yerushalayime, diba divuabu balambula mulambu wa manananshi, Yudite uvua muiname too ne panshi. Uvua mudiele butu mu mutu, uvua muleje patoke tshilamba tshia madilu tshivuaye muvuale muinshi mua bimue bilamba biende.[54] Uvua utendelela Mvidi Mukulu ne diyi dikole, wamba ne:

²— Maweja-Nangila udi Mvidi Mukulu wa nkambua wanyi Simeyone. Wewekeuvua mumupe muele wa myita bua kusombuela benyi, bavua babuelela muakunyende wa bakaji ku bukole mu nzubu, bamuvula bilamba bua kumupula lumu pa kumukuata ku bukole. Bavua benza bubi buudi mukandike.[55]

³Ke pauvua mufile bamfumu babu bua babashipe. Bobu kubashimabu kabidi: bulalu buvuabu bafuishile muana wa bakaji awu bundu, mbubole ne mashi abu. Uvua mukengeshe bapika pamue ne bamfumu, ne bakalenga badi mu nkuasa yabu.

⁴Uvua mutume bakaji babu ne bana babu ba bakaji mu bupika. Bionsu bivuabu nabi mbishale bia bena Izrayele, bantu baudi munange, bayua bakuitabe benza muudi musue. Bavua bafika munda bua mashi abu avua maye panshi, ke kukulombabu diambuluisha. Mvidi Mukulu, Mvidi Mukulu wanyi, unteleje meme mukaji mukamba.

⁵Bionsu bivua bienzeka ku kale, ne bivua bidianza kuenzeka ne bidi bilonda, amu wewe ke uvua mubienze. Nsombelu wa matuku aa, ne udi uvua kumpala, amu wewe ke udi mumuanyishe. Malu auvua muele meji mmamane kuenzeka.

⁶Malu onsu auvua mushindika bua wewe kuenza, mmamane kufika, akuambila ne: “Ke tuetu aba.” Malu onsu audi wenza mmamane kulongolola, biudi mushindike udi mudianza kubimanya.

⁷Maweja-Nangila, bena Ashure mbafike ne bena myita babu bonsu. Badi baditemba bua tubalu tuabu ne bua bantu badi babandapu, badi baditambisha bua bukole budi nabu bena myita babu badi benda ku makasa. Badi batekemena mafuma abu ne ngabu yabu, kabidi ne buta ne ndundu ya kuela nayi mabue. Badi bapue muoyi ne wewe ke Maweja-Nangila udi usunga myita.[56]

⁸Diebe mMaweja-Nangila. Bukole buebe butangalaje makanda abu. Ushipakaje bukole buabu ne tshiji tshiebe. Bualu bavua bajadika bua kupisha nzubu webe wa tshijila mikiya, mua kunyanga muaba uudi musombe ne butumbi, kabidi mua kutonkola nsengu ya ku tshilambuilu tshiebe ne biamu.

⁹Tangila mudibu baditambisha, tshiji tshiebe tshibashipe. Meme mukaji mukamba, umpeshe bukole bua kukumbaja tshindi muele meji.

¹⁰Ku miaku yanyi ya budimu, ushipe mukalenga ne mupika, kabidi mfumu ne bena myita. Ubapangishishe malu abu a ditambisha adibu bela meji.

¹¹Bualu bukole buebe kabuena bufuma ku bungi bua bantu, nansha bumfumu buebe kabuena bushindamena ku bulobu. Kadi udi Mvidi Mukulu wa bapuekele, udi wambuluisha badi bateketa, usungidila badi kabayi ne dikanda, ukuba badi kabayi ne mubalami, upandisha badi kabayi ne mubasungidi.

¹²Eyowa, Mvidi Mukulu wa tatuanyi, Mvidi Mukulu udi bena Izrayele batekemena, Maweja-Nangila wa diulu ne buloba. Udi Mufuki wa misulu ya mayi, udi mukalenga wa bifukibua biebe bionsu, uteleje ditendelela dianyi.

¹³Kabidi enza bua miaku yanyi ya budimu itape mputa, kabidi ishipe bonsu badi bapangadika mua kuluisha baudi mutue nabu ndondu, nzubu webe mujidile, mukuna wa Siyone ne ditunga diudi mupe bana bebe.

¹⁴Wenza bua bantu bebe bonsu ne bisamba biebe bionsu bijingulule ne wewe udi Mvidi Mukulu mukole kabidi ne wa ngulu yonsu. Amu wewe ke udi ulama bena Izrayele.