Read Tshiluba Estere 1 Bible Online

Estere 1 - Tshiluba bible

Estere 1

¹Malu aa ke avua menzeke mu tshikondu tshia bukalenga bua Ahashaveroshe.[1] Yeye uvua mukalenga wa matunga lukama makumi abidi ne muanda mutekete, kutuadija ku Inde too ne ku Kushe.

²Mu tshidimu tshisatu tshia bukalenga buende, pa mukuna wa Shushane, mu nzubu wende wa bukalenga, mukalenga Ahashaveroshe uvua mulongolole didia dinene bua bonsu bavua ne mianzu mu bukalenga buende, ne bua balombodi ba ditunga. Uvua musangishe balombodi ba tshiluilu tshia bena Persa ne tshia bena Madayi, balombodi ba mu bukalenga, ne bamfumu ba matunga.[2]

⁴Mukalenga uvua ubaleja bubanji buvuaye nabu ne butumbi bua bukalenga buende. Bavua benza bibilu ebi matuku mavule, ngondu isambombu mijima.

⁵Matuku awu mamane kupita, mukalenga kulambisha kabidi didia dikuabu dinene bua bantu bonsu baneme ne bapele, bavua basomba mu tshimenga tshia Shushane. Tshibilu etshi tshivua tshienzeka lumingu lujima mu lubanza lua bukalenga.

⁶Bavua balembeleja bilamba bia manda a ndanda bitoke, nansha bia mayi a nkunde, ku tukaba tukunze tuela ku nkanu ya tshiamu tshitoke tshia mushinga mukole. Bavua bakudika nkanu ayi ku makunji a mabue engelela. Bavua bateka mu lutanda, nkuasa ya tshisaka ya mpawungi ne ya tshiamu tshitoke tshia mushinga mukole. Bavua balamika panshi mu lutanda mabue mimpe makunze, matoke, a makalumakalu ne mafuke.[3]

⁷Bavua banuina mu makopu a mpawungi, mikale dikopu dionsu dishilangane ne dikuabu. Mukalenga uvua mufile maluvu a mvinyo mapite bungi, uvua wabanyina bantu ne muoyi wa kalolu muakanyine mukalenga.

⁸Muntu yonsu uvua unua pa yende nyota. Ke muvua mukalenga muambile bena mudimu bende bonsu ne: “Bantu bandi mubikile, badie, banue, muntu yonsu muende mudiye musue.”

⁹Mukalenga mukaji Vasti uvua pende mulongoluele bakaji nende didia dinene mu lupangu lua bukalenga bua Ahashaveroshe.

¹⁰Dituku dia muanda mutekete dia didia dinene, mukalenga Ahashaveroshe uvua musanke bua mvinyo uvuaye munue. Kubikilaye batungu muanda mutekete, bena mudimu bende, ke Mekumane, Bista, Arbona, Bigta, Abagta, Zetare ne Karkase.

¹¹Kubatumaye bua bamubikidile mukalenga mukaji Vasti, bua afike kudiye, muvuale tshifulu tshia bukalenga. Mukalenga Ahashaveroshe uvua musue kuleja baneme bende ne bantu bakuabu bavuaye mubikile buimpe buvua nabu mukalenga mukaji. Bualu uvua ne mpala muimpe.

¹²Batungu kufikisha mukenji awu kudi mukalenga mukaji. Kadi mukalenga mukaji kubenga mua kuya. Nenku mukalenga Ahashaveroshe kufika munda bikole.

¹³Mukalenga kuyukila ne bamanyi ba malu, bualu uvua ne tshibidilu tshia kuakaja malu a mu bukalenga pamue ne bamanyi ba meyi ne mikandu bia ditunga.

¹⁴Bafidi ba ngenyi ba mukalenga bavua pabuipi nende bavua muanda mutekete: ke Karshena, Shetare, Admata, Tarshishe, Merese, Marsena ne Memukane. Bobu aba bavua bantu bavua ne muanzu munene mu bukalenga bua bena Persa ne bena Madayi.[4] Mukalenga uvua mubatekemene, mubape mianzu minene mu bukalenga buende.

¹⁵Mukalenga Ahashave-roshe kubakonka ne: — Meme mukalenga Ahashaveroshe, mvua mutume batungu ne diyi bua kubikila mukalenga mukaji Vasti bua kuvuaye. Kadi mmubenge kuitaba. Nanku patudi tutangila meyi ne mikandu bia ditunga, badi mua kumunyoka mushindu kaayi?

¹⁶Memukane kuandamuna mukalenga Ahashaveroshe ne balombodi ba mu bukalenga buende ne: — Mukalenga mukaji Vasti kena mupende amu mukalenga nkayende to. Mmupetule kabidi ne balombodi ba bukalenga ne bantu bonsu badi basomba mu matunga onsu adi ku bumfumu bua mukalenga.

¹⁷Nanku, bakaji bonsu bumvue mudi mukalenga mukaji muandamune amu, kabakunemeka kabidi babayabu to. Nebikale badibingisha, bamba ne: “Mukalenga Ahashaveroshe uvua mubikidishe mukalenga mukaji Vasti, kadi kubengaye bua kuya!”

¹⁸Lelu ewu, bakaji ba balombodi ba mu bukalenga bua bena Persa ne bua bena Madayi, nebamanye tshidi mukalenga mukaji muenze etshi. Nebakimine kuandamuna babayabu bia momumue. Nenku, kapeja ka bakaji aku nekafikishe balume munda.

¹⁹Nanku, mukalenga, paudi muitabe, ela mukenji wa ditunga. Ukandike kashidi mukalenga mukaji Vasti bua kamueneki kumpala kuebe to. Ufile muanzu wende kudi mukaji mukuabu udi mukumbanyine muanzu awu. Mukenji awu uufunde ku mikenji ya bena ditunga dia bena Persa ne dia bena Madayi idibu kabayi mua kukudimuna.

²⁰Padi bantu bamanya mukenji awu mu matunga onsu a mu bukalenga buebe bualabale, mukaji yonsu neatumikile bayende, nansha yeye mupele, nansha yeye mubanji.

²¹Mukalenga ne balombodi ba mu bukalenga buende kuitaba lungenyi lua Memukane. Mukalenga kukumbaja bivua Memukane muambe.

²²Kutumaye mu matunga onsu, mikanda ivuabu bafunde bilondeshile mfundilu ne muakulu wa bantu bavua basombamu. Mikanda ivua mijadike ne: Muntu mulume udi mfumu wa nzubuende, bena mu nzubuende nebakule anu muakulu wa bankambua ba mulume.[5]