Read Tshiluba Estere 2 Bible Online

Estere 2 - Tshiluba bible

Estere 2

¹Matuku makese mamane kupita, tshiji tshia mukalenga tshimane kutuya, mukalenga kuela meji ku bivua Vasti muenze ne ku mukenji uvuaye muele bualu buende.

²Ke bafidi ba ngenyi ba mu ditunga diende kumuambila ne: — Bakukebele nsongakaji itshidi tumama, idi imueneka ne mpala muimpe.

³Nenku, lomba balombodi ba matunga onsu adi mu bukalenga buebe, bua bakutuadile nsongakaji ya mpala mulenga. Bafike nayi mu lupangu lua bakaji ba bukalenga, ludi mu tshimenga tshia Shushane.[6] Egayi, mutungu mulami wa lupangu elu, neayilame bimpe, neayipeshe mafuta a bulenga a kulabayo pambidi.

⁴Nsongakaji uwanyisha awu neashale mukalenga mukaji, pa mutu pa Vasti. Mukalenga Ahashaveroshe kuanyisha lungenyi alu, kulukumbaja.

⁵Mu tshimenga tshia Shushane muvua muena Yuda, dina diende Mordekayi, muana wa Yayire, wa ku ndelanganyi ya Shimeyi ne Kishe,[7] wa mu tshisamba tshia Binyamine.

⁶Mordekayi uvua wa ku tshisumbu tshia bantu bavua Nebukadnesare, mukalenga wa Babilone, muangate mu Yerushalayime pamue ne Yekoniya, mukalenga wa bena Yuda, bua kuya nabu kuende.[8]

⁷Mordekayi uvua mukoleshe muana wa bakaji wa muanabu, dina diende Adasha, uvuabu binyika kabidi ne: Estere.[9] Adasha uvua muana wa nshiye. Kunyima kua lufu lua baledi bende, Mordekayi kumuangata bua kukolelaye kuende. Adasha uvua ne mpala muimpe mutambe.

⁸Bantu bamane kumvua diyi dia bukalenga, kusangishabu nsongakaji mivule mu tshimenga tshia Shushane. Munkatshi muabu muvua Estere. Kuyabu nende, pamue ne bakuabu, mu lupangu lua bukalenga. Bavua babalama kudi Egayi, mulami wa lupangu lua bakaji.

⁹Estere uvua wenza bivua bilengelela Egayi. Ke Egayi kumuanyisha bikole. Kupeshaye Estere biakudia ne bintu bionsu bivua mua kulengeja mubidi wende. Uvua mumupeshe kabidi ne bena mudimu muanda mutekete, basunguila ku bansongakaji bena mudimu bavua mu nzubu wa bukalenga. Uvua mubateke pamue ne Estere mu nzubu uvua muimpe mupite mikuabu yonsu ya mu lupangu lua bakaji.

¹⁰Estere kavua mudimanyishe ne: ndi muena Yuda to. Bualu Mordekayi uvua mumukandike.

¹¹Kadi Mordekayi uvua wendakana ku dituku ku dituku kumpala kua lupangu lua bakaji bua kumanya muvua Estere, ne bua kumanya tshidibu mua kumuenzela.

¹²Bansongakaji bavua mu lupangu bavua ne bua kukumbaja tshidimu tshijima, benza bionsu bivuabu babafundila, bua kulengeja nabi mubidi wabu. Ngondu isambombu ya kumpala, bavua babafita mafuta a mire; minga isambombu ivua ilonda, bavua babafita mafuta a manananshi, ne bintu bikuabu bia kulengeja nabi bakaji. Pashishe, nsongakaji yonsu uvua ne tshiende tshikondu tshivuaye ne bua kubuela ku nzubu kuvua mukalenga Ahashaveroshe.

¹³Pavua nsongakaji umuka ku lupangu lua bakaji, uya ku lupangu lua mukalenga, uvua upeta bilamba ne bilengejilu bionsu bivuaye musue kuya nabi kudi mukalenga.

¹⁴Nanku, dilolu uvua umonangana ne mukalenga. Maloba dinda bavua bamupingaja mu lupangu luibidi lua bakaji, luvuabu balama kudi Shashagaze, mutungu, mulami wa bakaji bakuabu ba mukalenga. Nsongakaji kavua mua kupingana kabidi kudi mukalenga, amu pavua mukalenga musue, muleje dijinga adi, nansha umubikila mu dina diende.

¹⁵Dituku dikuabu, tshikondu tshivua Estere, muana wa Abikayile, uvua Mordekayi muana wa tatuende mukuabu mukoleshe, ne bua kuya ku nzubu bua kumonangana ne mukalenga, kukumbanatshi. Uvua ulomba amu bivua Egayi, mutungu mulami wa lupangu lua bakaji ba mukalenga mumuambile bua kuangata. Estere kutokela bonsu bavua bamumona ku muoyi.

¹⁶Nenku bakafua Estere munda mua lupangu kua mukalenga Ahashaveroshe mu ngondu wa dikumi, ngondu wa Tebete, wa tshidimu tshia muanda mutekete tshia bukalenga buende.

¹⁷Mukalenga kunanga Estere kumpala kua bakaji bakuabu bonsu. Ku bansongakaji bonsu, amu Estere ke uvua mukalenga mupite kunanga. Kumuasaye tshifulu tshia bukalenga, kumubanda bu mukalenga mukaji pa mutu pa Vasti.

¹⁸Pashishe mukalenga kulongoluela Estere didia dinene. Kubikilaye baneme ne balombodi ba mu bukalenga buende buonsu. Kuanyishaye bua bantu ba mu matunga avua ku bumfumu buende, kabalambudi tshitupa tshia milambu ivuabu ne bua kufuta,[10] kuabanyinaye bantu bintu ne muoyi wa kalolu, muakanyine mukalenga.

¹⁹Musangu muibidi, kusangishabu kabidi bansongakaji.[11] Mordekayi ukavua mumane kupeta muanzu munkatshi mua bena mudimu ba mu bukalenga.

²⁰Estere pende kavua muanji kudimanyisha ne: ndi muena Yuda to. Uvua muitabe muvua Mordekayi mumukandike. Uvua utungunuka ne kuitaba diyi diende amu bu tshikondu tshivuaye kumbelu kuende.

²¹Dituku dikuabu, pavua Mordekayi wenzela mudimu mu nzubu wa mukalenga, Bigtane ne Tereshe, bantungu babidi ba mukalenga bavua balami ba tshibuelelu tshia nzubu ya mukalenga, bavua bela tshifufu tshia kushipa mukalenga Ahashaveroshe, bualu mukalenga uvua mubafikishe munda bikole.

²²Kadi Mordekayi kumanya bualu abu. Kubumanyishaye mukalenga mukaji Estere, bua abufikishe kudi mukalenga.

²³Pavuabu bakenketa bualu abu, bavua bajadika ne: mbulelela. Ke kuowabu bantu abu. Mukalenga kufundisha bualu abu mu mukanda wa Dilondolola malu a mu bukalenga bua ditunga.[12]