Read Tshiluba Estere 4 Bible Online

Estere 4 - Tshiluba bible

Estere 4

¹Mordekayi umvua bivua bienzeka, kudipandaye bilamba, kuvuala bilamba bia madilu, kudilaba butu mu mutu. Uvua wendakana mu tshimenga, wela mbila mikole ya dikenga.

²Yeye mumane kufika kumpala kua nzubu wa mukalenga, kuimanaye, bualu muntu muvuale bilamba bia madilu kawa mua kubuela mu nzubu wa mukalenga to.

³Mu ditunga dia mu bukalenga dionsu divua mukenji wa mukalenga ufika, bena Yuda bonsu bavua amu ne bowa bunene. Bavua bajila biakudia, badila miadi, bakengakana. Bantu ba bungi bavua bavuala bilamba bia madilu, balala mu butu.[18]

⁴Bakaji ba bena mudimu bende, ne batungu bavua baya kudi mukalenga mukaji Estere bua kumanyisha muvua Mordekayi muenze amu. Estere kupeta buowa bunene. Kutuminaye Mordekayi bilamba bia kuvuala, bua avule bilamba bia madilu biwaye nabi. Kadi Mordekayi kubenga.

⁵Nanku Estere kubikidisha Atake, mutungu uvua mukalenga mumupeshe bua kumuenzela mudimu. Estere kumutuma kudi Mordekayi, bua amumvuije mudi bualu, amumvuije kabidi tshidiye muvuadile bilamba bia madilu abi.

⁶Atake kuya kuvua Mordekayi ku tshibuelelu tshivua kumpala kua nzubu wa mukalenga.

⁷Mordekayi kumumanyisha malu onsu avua menzeke. Kadi uvua umuambila nangananga bua lupetu luvua Amane mulaye mukalenga, bua kuela mu tshibutshilu tshia bukalenga padibu babutula bena Yuda bonsu.

⁸Mordekayi kumupesha kabidi mukanda uvuabu bafundile bena Shushane, muikale ne mukenji wa kubutula bena Yuda. Uvua umusengelela bua ambile Estere bionsu abi, amuleje ne mukanda. Atake uvua kabidi ne bua kutendakena Estere bua aye kudi mukalenga, bua kuakuila bena tshisamba tshiabu ne kubalombela luse.

⁹Atake kuambila Estere bionsu bivuabu bamuandamune kudi Mordekayi.

¹⁰Pashishe, Estere kutuma kabidi Atake kudi Mordekayi bua kumuandamuna ne:

¹¹“Bantu bonsu, bena mudimu ba mukalenga, nansha badi basomba mu matunga a mu bukalenga, mbamanye bimpe ne: Muntu yonsu, mulume nansha mukaji, udi udiyila mu lubanza munda mua lupangu lua mukalenga, kabayi bamubikila kudi mukalenga, tshiende ndufu. Udi mua kushala ne muoyi amu padi mukalenga umuoluela dikombu diende dia mpawungi. Kadi meme, kukadi mpindiewu ngondu mujima, udi mukalenga kayi mumbikile pabuipi nende.”

¹²Mordekayi mumane kupeta diandamuna dia Estere edi,

¹³kuambilaye kabidi Atake bua aye kuandamuna Estere ne: “Kuedi meji ne: udi mua kupanda wewe nkayebe, padibu bashipa bena Yuda, bualu udi musombele mu nzubu wa bukalenga.

¹⁴Nanku paudi ubenga kutuakuila mu tshikondu tshikole etshi, bena Yuda nebapete diambuluisha ku nseke mikuabu, nebapande.[19] Kadi wewe ne bena diku diebe, nenubutuke. Umanye kabidi ne: bumue mbua bualu ebu, ke buudi mua kuikala mupete muanzu wa mukalenga mukaji.”

¹⁵Pashishe Estere kuandamuna Mordekayi ne:

¹⁶“Uye kusangisha bena Yuda bonsu badi mu Shushane. Nujile biakudia bualu buanyi, kanuyi nudia nansha nunua matuku asatu a munya ne a butuku. Netuenze kabidi nanku meme ne bena mudimu banyi. Pashishe, nansha bu mudibi bikandika kudi diyi, nenye kudi mukalenga. Nanku, bu bobu mua kunshipa nebanshipe!”

¹⁷Ke Mordekayi kupingana bua kuenza muonsu muvua Estere mumuambile.