Read Tshiluba Estere 5 Bible Online

Estere 5 - Tshiluba bible

Estere 5

¹Matuku asatu a tshijila tshiende mamane kujika, Estere kuvuala bilamba biende bimpe bia mukalenga mukaji. Kuyaye mu lubanza lua munda mua nzubu wa mukalenga. Kuimanaye kumpala kua nzubu wa mukalenga. Mukalenga uvua mu nzubu wende, musombe mu nkuasa, mutangile ku mushiku wa tshibuelelu.

²Pavuaye umona mukalenga mukaji muimane mu lubanza, kumuanyishaye, kumuoluelaye dikombu dia mpawungi di-vuaye mukuate mu tshianza.[20] Estere kusemena, kukuata ku lusongu lua dikombu.

³Mukalenga kumukonka ne: — Mukalenga mukaji, mmalu kaayi? Udi ujinga tshinyi? Nkadi mumane kudilongolola bua kukuambuluisha nansha ne tshia bibidi tshia bukalenga buanyi.

⁴Estere kuandamuna ne: — Mukalenga, lelu mene ndi mukuenzele didia dinene. Ndi musue nufike mu didia edi ne Amane.

⁵Nanku mukalenga kubikidisha diakamue Amane bua bakumbaje muvua Estere ujinga. Nanku bonsu babidi kuya mu didia divua Estere mulongolole.

⁶Didia dijika, mukalenga kukonka Estere ne: — Tshiudi musue kundomba ntshinyi? Ndi mua kukuambuluisha nansha ne tshia bibidi tshia bukalenga buanyi.

⁷Estere kuandamuna ne: — Tshindi njinga kukulomba ngetshi:

⁸Mukalenga, paudi munganyishe, muanyishe dilomba dianyi, ufike kabidi muanyi maloba, bua didia dinene dindi munuenzele wewe ne Amane. Nanku, diba adi nenkuambile tshindi njinga.

⁹Amane kupatuka ne disanka dituku adi mu nzubu mua mukalenga mukaji. Kadi ufika ku tshiibi tshia lupangu lua mukalenga, kusanganaye Mordekayi musombe, kayi ujuka, kayi umuleja kanemu nansha kakese. Amane kumufikila munda bikole.

¹⁰Kadi kuanjiye kudilama, kupingana kuende. Kubikidishaye balunda bende ne muena kuende Zereshe.

¹¹Amane kuditambisha kumpala kuabu, bua bubanji buende, bua bana ba bungi bavuaye nabu, ne bua lumu luvua mukalenga mumupeshe. Bualu mukalenga uvua mumuteke mulombodi wa kumpala, mupite banene ba mu bukalenga bonsu, ne baludiki ba ditunga ku muanzu.

¹²Amane kuamba kabidi ne: — Mukalenga mukaji Estere uvua mumbikile, amu meme nkayanyi, bua kufila mukalenga, mu didia divuaye mulambe muende lelu. Mmutubikile tshiakabidi ne mukalenga maloba.

¹³Kadi bionsu ebi kabiena binsankisha nansha kakese, misangu yonsu indi mmona Mordekayi, muena Yuda, wenzela mudimu ku tshiibi tshia lupangu lua mukalenga.

¹⁴Nenku, muena kuende Zereshe ne balunda bende bonsu, kumuambila ne: — Bantu bakongoluele mutshi wa bule bua metre makumi abidi ne atanu. Maloba dinda, lomba mukalenga bua boweleku Mordekayi.[21] Nenku, neuye kufila mukalenga ne disanka mu didia amu. Amane kuanyisha lungenyi alu, kuenzeja tshiowelu.