Read Tshiluba Estere 7 Bible Online

Estere 7 - Tshiluba bible

Estere 7

¹Mukalenga ne Amane kuya kua mukalenga mukaji Estere, bua kudia didia dinene,

²bua musangu muibidi. Didia dimane kujika, mukalenga kukonka tshiakabidi Estere ne: — Tshiudi musue kundomba tshinyi? Ndi mua kukupesha tshiudi musue, nansha tshia bibidi tshia bukalenga buanyi.

³Mukalenga mukaji Estere kuandamuna ne: — Mukalenga, paudi munganyishe, kabidi paudi munsue, ndi nkulomba bua tshisamba tshianyi ne meme katutu to. Ke tshindi nkulomba bua ungenzele atshi.

⁴Bena tshisamba tshianyi ne meme bavua batusumbishe bua batubutule, batushipe, kamuyi luse. Bu bobu batupane, bua kushala bapika tshianana, mvua mua kupuwa, tshivua mua kukusuya bua kukuambila bualu bua nenku to.[25]

⁵Mukalenga Ahashaveroshe kuebeja mukalenga mukaji Estere ne: — Udi muele meji a kuenza nanku udi penyi? Nnganyi mene?

⁶Estere kuandamuna ne: — Muluishi wetu, kabidi mushipianganyi muena tshikisu, ke Amane. Amane kuzakala bikole kumpala kua mukalenga ne kua mukalenga mukaji.

⁷Mukalenga kufika munda bikole ne tshiji, kumuka ku mesa, kupatuka mu lupangu luende lua bukalenga. Amane umanya ne: mukalenga udi ujinga kunshipesha, kushalaye usengelela mukalenga mukaji Estere, bua amusungidile, kabamushipi.

⁸Amane kudiela mu nkuasa wa tshisaka, muaba uvua Estere musombele. Diba adi mukalenga kufika mu nzubu wa didia, utumina mu lupangu. Kuelaye diyi ne: — Mulumiana ewu udi musue kabidi kuibidila mukajanyi pambidi ku bukole, bua kumufikisha ku bubi, mu nzubu muanyi, meme mutangile anyi? Amu mukalenga wamba miaku ayi, bena mudimu kusuika Amane tshilamba ku mesu.[26]

⁹Umue wa ku bena mudimu, dina diende Arbona, kuambila mukalenga Ahashaveroshe ne: — Mukalenga, Amane mene uvua mulongoluele Mordekayi, uvua mukupandishe ku tshitungu,[27] tshiowelu bua kumuowelapu. Tshiowelu atshi tshidi kumpala kua nzubu wa Amane, tshidi ne butumbuke bua metre makumi abidi ne atanu. Mukalenga kutuma diyi ne: — Buowelepu Amane.

¹⁰Bantu kuowela Amane ku tshiowelu tshivuaye mulongoluele Mordekayi. Nenku, tshiji tshia mukalenga kutuya.