Read Tshiluba Estere 8 Bible Online

Estere 8 - Tshiluba bible

Estere 8

¹Dituku adi, mukalenga Ahashaveroshe kupesha Estere mukalenga mukaji bintu bionsu bia Amane, muluishi wa bena Yuda. Mukalenga kubikidisha Mordekayi, bualu Estere uvua mumuambile ne: Mordekayi mmuana wa tatu mukuabu.

²Mukalenga kukopola kakanu ka ku munu ka bukalenga kavuaye munyenge Amane, kukapesha Mordekayi.[28] Estere kabidi kupa Mordekayi mudimu wa kulama bintu bivua bia Amane.

³Estere kuyukila tshiakabidi ne mukalenga, kudiela panshi ku makasa ende, udila muadi, umusengelela bua abenge malu mabi avua Amane wa ku ndelanganyi ya Agaje musue kuenzela bena Yuda.[29]

⁴Mukalenga kuoluela Estere dikombu diende dia mpawungi. Estere kujuka[30] panshi,

⁵kuambila mukalenga ne: — Mukalenga, paudi mumone ne bindi nkulomba bidi bimpe, kabidi paudi munganyishe, munnange, ufunde mukanda wa kukandika nawu mikanda ivua Amane, muana wa Amedata, wa ku ndelanganyi ya Agaje mufunde bua kubutula bena Yuda, badi basomba mu matunga onsu a mu bukalenga buebe.

⁶Mundi mua kumona bashipa bana betu, tshiyi ngenza bualu mbishi? Mundi mua kutangila ne mesu babutula bantu ba tshisamba tshietu mbishi?

⁷Pashishe, mukalenga Ahashaveroshe kuandamuna Estere pamue ne Mordekayi, muena Yuda, ne: — Monayi, mvua mutume diyi bua kuowabu Amane, bualu uvua ukeba kubutula bena Yuda; kabidi wewe Estere mvua mukupeshe bintu bionsu bia Amane.

⁸Kadi tshiena ne mushindu wa kukandika mukenji uvuabu bela mu dina dianyi, batue ne tshitampi tshidi ne kakanu kanyi. Kadi nuenu, nudi mua kufunda mikanda, kuleja bionsu bidi binulengelela bualu bua bena Yuda. Nudi mua kufunda dina dianyi ne kutua tshitampi tshidi ne kakanu kanyi.

⁹Kubikidishabu bafundi ba malu a mukalenga dituku adi, matuku makumi abidi ne asatu a ngondu muisatu, ngondu wa Sivane. Bilondeshile muvua Mordekayi mulongolole, bobu kufunda mikanda, kuyitumina bena Yuda, bamienampala ba mukalenga, balombodi ne baludiki ba matunga lukama ne makumi abidi ne muanda mutekete a mu bukalenga, kutuadija ku Inde too ne ku ditunga dia bena Kushe. Mikanda ayi bavua bayifunda mu miakulu ne mfundilu wa bantu ba mu bisamba bishilangane bivua mu bukalenga, kabidi ne mu miakulu ne mfundilu wa bena Yuda nkayabu.

¹⁰Mu mikanda ayi bavua bafunda dina dia mukalenga Ahashaveroshe, bayitue ne tshitampi ne kakanu kende ka ku munu. Kuyitumabu kudi babandi ba pa nyama ya tubalu tuvua mu bikumbi bia mu lubanza lua mukalenga.

¹¹Bavua bafundamu ne: Mukalenga mmuanyishe bua bena Yuda, badi mu bimenga bionsu bidi mu bukalenga, badisangishe bua kudilama ku njiwu. Mukalenga udi wanyisha bua mu ditunga dionsu dia bukalenga buende, ne mu tshisamba tshionsu tshidi bena Yuda basomba, bena Yuda bashipe, nansha bakose mutu wa muntu yonsu udi ubaluisha ne bia mvita mu bianza. Badi mua kushipa bakaji ne bana ba baluishi babu kabidi, ne kupawula bintu biabu.

¹²Bionsu abi bivua ne bua kuenzeka miaba yonsu mu bukalenga bua Ahashaveroshe amu dituku dimue: dia dikumi ne disatu dia ngondu wa dikumi ne muibidi, ngondu wa Adare.[31]

¹³Bavua bamanyisha bena Yuda mukanda ewu mu matunga onsu, bua bawangate bu diyi diela kudi mukalenga, kabidi bua bamone mua kudisombuela kudi bena lukuna babu dituku adi.

¹⁴Nanku, mukalenga mumane kutuma diyi adi, bantu bavua ne mikanda kubanda pa nyama ya tubalu tuvua mu bikumbi bia mu lubanza lua mukalenga, kuyabu ne lukasa luonsu. Pashishe bavua babadila bantu ba mu tshimenga tshia Shushane mukanda awu.[32]

¹⁵Mordekayi kupatuka mu nzubu wa mukalenga muvuale tshilamba tshia bukalenga tshifikuluke, tshitoke, mutentakaje tshinkutu tshia buanda bukunze. Uvua muase kabidi tshifulu tshinene tshia mpawungi. Bena mu tshimenga tshia Shushane bavua bela tunkunduluila ne bibingu bia disanka.

¹⁶Bena Yuda bavua ne diakalenga, basanka bua pavuabu batshimuna baluishi babu.

¹⁷Ku ditunga dionsu, mu tshimenga tshionsu, ne konsu kuvua mukanda ewu ufika, bena Yuda bavue amu ne disanka. Bavua benzeja didia dinene dia tshibilu. Bantu ba bisamba bikuabu bavua babuela mu tshisumbu tshia bena Yuda, bua bowa buvuabu babakuatshisha kudi bena Yuda.