Read Tshiluba Tshimuangi 1 Bible Online

Tshimuangi 1 - Tshiluba bible

Tshimuangi 1

¹Bana ba balume ba Izrayele[1] bavuaye mufike nabu mu Ejipitu, muana yonsu ne bena diku diende, badi nunku:

²Rubene, Shimeyone, Levi, Yuda,

³Isakare, Zebulone, Binyamine,

⁴Dane, Naftali, Ngade ne Ashere.

⁵Ndelanganyi ya Yakobe yonsu ivua bantu makumi muanda mutekete.[2] Amu Yozefe uvua mumane kudianjila mu Ejipitu.

⁶Kadi Yozefe ne bana babu bonsu bavua Yakobe mubuele nabu mu Ejipitu kufuabu.

⁷Pashishe ndelanganyi ya bena Izrayele kutanta, kuvulangana[3] kupita bungi mu Ejipitu. Kushalabu bantu ba bukole.

⁸Mukalenga mupiamupia,[4] uvua kayi mumanye Yozefe, kudia bukalenga mu Ejipitu.

⁹Mukalenga kuambila bantu bende ne: — Bena Izrayele aba mbapite bungi, kabidi mbantu ba bukole.

¹⁰Nanku, tukebayi mushindu wa kubapumbisha bua kabavudianganyi to. Tshianana pafika bena mvita, badi mua kudisanga ne bena lukuna betu bua kutuluisha, pashishe kumuka mu ditunga.[5]

¹¹Bena Ejipitu kusungula bamfumu ba mudimu bavua ne bua kuenzeja bena Izrayele mudimu mukole bua kubatekesha. Bena Izrayele kuashila Mukalenga wa bena Ejipitu tshimenga tshia Pitome ne tshia Ramsese[6] bua balaminemu bintu biende.

¹²Kadi pa wabu bakengesha bena Izrayele nanku, bavua amu bavulangana mu ditunga dijima. Bena Ejipitu bamona nanku, kutshinabu bena Izrayele bikole.

¹³Kubenzejabu mudimu wa bupika ne tshikisu tshipite bukole.

¹⁴Bena Izrayele kusopa buloba kuenza madiotu, kudimina bena Ejipitu madimi. Mu tshikosu, bena Ejipitu kubenzeja midimu ya mishindu yonsu ne tshikisu.

¹⁵Mukalenga wa bena Ejipitu kuambila Shifra ne Puwa, baleleshi ba bena Ebrewu ne:

¹⁶— Panudi nulelesha bakaji ba bena Ebrewu, nutangile bimpe mushindu udi muana. Pikalaye wa balume numushipe, pikalaye wa bakaji numulekele ne muoyi.

¹⁷Kadi baleleshi bavua batshina Mvidi Mukulu. Nanku kubengabu diyi dia mukalenga wa bena Ejipitu. Kulekelabu bana ba balume ne muoyi.

¹⁸Ke mukalenga wa bena Ejipitu kubabikila, ubakonka ne: — Nudi benze nenku bualu kayi? Nudi balekela bana ba balume ne muoyi bua tshinyi?

¹⁹Baleleshi kuandamuna ne: — Bakaji ba bena Ebrewu badi ne bukole bua bungi, bapite ba bena Ejipitu. Badi badilelela nkayabu, katuyi banji kufika.

²⁰Nanku bena Izrayele kuvulangana, kushala bantu bakole. Mvidi Mukulu kusankisha baleleshi abu,

²¹kubapesha bana ba bungi, bualu bavua bamutshina.

²²Kadi mukalenga wa bena Ejipitu, kuambila bantu bende bonsu ne: — Muana wa balume yonsu udi bena Izrayele balele, numuele mu musulu wa Nile. Nulekele anu bana ba bakaji ne muoyi.[7]