Read Tshiluba Tshimuangi 10 Bible Online

Tshimuangi 10 - Tshiluba bible

Tshimuangi 10

¹Maweja-Nangila kuambila Moshe ne: — Uye kudi mukalenga wa bena Ejipitu. Meme ke udi mumupe muoyi wa tshitunu, yeye ne balombodi ba mu bukalenga buende bua mmone mua kuenza bishima bionsu ebi mu ditunga diende.

²Nanku wewe Moshe neumone mua kumanyisha muanebe wa balume ne muikuluebe mundi mulembakaje bena Ejipitu, muenze bishima bionsu ebi mu ditunga diabu. Ke munudi mua kujadika ne: meme ndi Maweja-Nangila.

³Moshe ne Arone kuya kudi mukalenga wa bena Ejipitu, kumuambila ne: — Maweja-Nangila Mvidi Mukulu wa bena Ebrewu, udi wamba ne: “Mbimpe udipuekeshe kumpala kuanyi. Ulekele bantu banyi bena Izrayele baye kuntendelela.

⁴Kadi pawikala ubenga anu kubenga bua kulekela bantu banyi, malaba ndi ntuma mpasu mu ditunga dijima dia Ejipitu.

⁵Mpasu ayi neyikile panshi, ipafikishe fitutuu. Neyidie bintu bionsu bivua bishale pa madimi, bivua mabue a mvula kaayi nenyange,[46] too ne mitshi yonsu idi imena mu madimi enu.

⁶Mpasu neyuwule mu nzubu muebe tente, mu nzubu ya balombodi ba mu bukalenga buebe too ne mu nzubu ya bena Ejipitu bakuabu bonsu. Kabidi bankambua benu kabavua banji kumona tshipupu tshia mushindu ewu to.” Moshe kupatuka, kushiyangana ne mukalenga wa bena Ejipitu.

⁷Balombodi ba mu bukalenga kukonka mukalenga wa bena Ejipitu ne: — Muntu ewu neanyange ditunga dietu too ne ku diba kayi? Lekela bena Izrayele, baye kutendelela Maweja-Nangila Mvidi Mukulu wabu, bualu ditunga dia Ejipitu didi mua kubutuka!

⁸Bena Ejipitu kupingaja Moshe ne Arone kudi mukalenga wabu. Awu kubambila ne: — Nuye kutendelela Maweja-Nangila Mvidi Mukulu wenu. Kadi badi ne bua kuya menemene mbanganyi?

⁹Moshe kumuandamuna ne: — Tuyaya bonsu pamue: bansonga betu ne bantu bakulakaje, bana betu ba balume ne ba bakaji ne bimuna bietu bionsu, mikoku, ngombe ne mbuji. Bualu tuyaya kuenza tshibilu bua Maweja-Nangila.

¹⁰Mukalenga wa bena Ejipitu kuandamuna ne nsenda ne: — Maweja-Nangila ikale nenu! Tshiena mua kuitaba bua nuye ne bakaji ne bana to, bualu nudi nuleja patoke munudi ne meji makuabu mabi munda muenu.

¹¹Kabiena mua kuenzeka to. Nuenu bantu balume bu munudi nujinga kutendelela Maweja-Nangila, nuye nkayenu. Kuipatabu Moshe ne Arone muaba uvua mukalenga wa bena Ejipitu.

¹²Maweja-Nangila kuambila Moshe ne: — Olola diboku, mpasu ipatuke mu ditunga dijima dia Ejipitu, idie bintu bionsu bidi mu madimi, bivua mabue a mvula kaayi manyange.

¹³Moshe kuolola dikombu mu ditunga dia Ejipitu. Dituku adi too ne butuku, Maweja-Nangila kutuma lupepele lufumina kudi diba dipatukila. Butshia dinda, lupepele alu kupaluisha mpasu.

¹⁴Mpasu ayi ivua mipite bungi mu ditunga dijima dia Ejipitu, ikila miaba yonsu. Katshia mpasu kayivua mianji kumueneka bungi abu. Kabidi mikuabu kayena mua kumueneka kabidi bungi abu to.

¹⁵Ivua mikile panshi, mipafikishe fitutuu. Ivua idia bintu bionsu bivua mabue a mvula kaayi manyange too ne bimuma bionsu bivua ku mitshi. Ka-kuvua kushala tshintu tshibishi nansha tshimue ku mitshi yonsu ya mu ditunga dia Ejipitu nansha pa madimi.[47]

¹⁶Mukalenga wa bena Ejipitu kubikila Moshe ne Arone lukasa wamba ne: — Ndi muenzele Maweja-Nangila Mvidi Mukulu wenu bibi ne nuenu kabidi!

¹⁷Mpindiewu ndi nnulomba ne: Numbuikidile bubi buanyi. Nundombele kudi Maweja-Nangila Mvidi Mukulu wenu angumushile dinyoka edi dia lufu.

¹⁸Moshe kumuka kudi mukalenga wa bena Ejipitu bua kutendelela Maweja-Nangila.

¹⁹Maweja-Nangila kutuma lupepele lukole lufumina kudi diba dibuelela. Lupepele alu kuipata mpasu yonsu, kuyituma mu Mayi manene makunze. Mu ditunga dia Ejipitu ka-muvua mushale kabidi mpasu nansha umue to.

²⁰Kadi mukalenga wa bena Ejipitu kena mulekele bena Izrayele to, bualu Maweja-Nangila uvua mumupeshe muoyi wa tshitunu.

²¹Maweja-Nangila kuambila Moshe ne: — Olola tshianza mulu, midima yenzeke mu ditunga dia Ejipitu, midima mikole mipite idi bantu bafuane kukuata mu bianza!

²²Moshe kolola tshianza mulu, midima mikole kuenzeka mu ditunga dia Ejipitu matuku asatu.[48]

²³Matuku asatu awu, bena Ejipitu kabavua ne mushindu wa kuendakana, bualu kabavua mua kumona bantu nabu to. Kadi muaba uvua bena Izrayele basombele uvua butoke.

²⁴Mukalenga wa bena Ejipitu kubikila Moshe kumuambila ne: — Nuenu bantu balume, bakaji benu ne bana, nuye kutendelela Maweja-Nangila, kadi bimuna bienu, mikoku, mbuji ne ngombe, bishale munemu.

²⁵Moshe kumukonka ne: — Wewe neutupe bimuna[49] bitudi mua kuya kuosha bua kulambula Maweja-Nangila Mvidi Mukulu wetu anyi?

²⁶Tuetu katuena mua kushiya tshimuna tshietu nansha tshimue. Tuyaya nabi bionsu, bualu tuyaya kutendelela nabi Maweja-Nangila Mvidi Mukulu wetu. Kabidi netumanye bimuna bidiye musue bua tuetu kumulambula amu patuafika kutudi tuya.

²⁷Mukalenga wa bena Ejipitu kena mulekele bena Izrayele to, bualu Maweja-Nangila uvua mumupeshe muoyi wa tshitunu.

²⁸Mukalenga awu kuipata Moshe wamba ne: — Umuka! Kuena mua kufika kabidi apa to. Dituku diwafika kabidi apa, udi ufua!

²⁹Moshe kuandamuna ne: — Anu muwambi amu. Tshiena mua kumonangana nebe kabidi to.