Read Tshiluba Tshimuangi 11 Bible Online

Tshimuangi 11 - Tshiluba bible

Tshimuangi 11

¹Maweja-Nangila kuambila Moshe ne: — Ndi ntumina mukalenga wa bena Ejipitu ne bantu bende dinyoka dia ndekelu. Nanku neanulekele, anuipate mene kashidi mu ditunga diende.

²Wambile bena Izrayele bonsu ne: Bangabanga ne kumuka mu ditunga dia Ejipitu, nuenu bonsu balume ne bakaji, nulombe kudi bena mutumba nenu, bintu bienza ne mpawungi nansha ne tshiamu tshitoke tshia mushinga mukole.

³Maweja-Nangila kuambuluisha bena Izrayele. Kupetabu diakalenga kudi bena Ejipitu. Kabidi Moshe uvua ne lumu lunene mu ditunga dia Ejipitu. Bavua bamunemeke bikole kudi balombodi ba mu bukalenga ne kudi bena Ejipitu bakuabu bonsu.

⁴Moshe kuambila mukalenga wa bena Ejipitu ne: — Maweja-Nangila udi wamba ne: “Mundankulu, nempitshile mu ditunga dia Ejipitu.

⁵Nenshipe muanabute yonsu wa bena Ejipitu biangatshile kudi muanabute wa mukalenga, uvua mua kupiana bumfumu bua ditunga too ne kudi muanabute wa mukaji mupika udi upelesha bukula. Nenshipe kabidi bamuanabute ba bimuna.

⁶Mu ditunga dia Ejipitu nemuikale madilu adibu kabayi banji kudila musangu mukuabu ne adibu kabayi mua kudila kabidi to.

⁷Kadi bena Izrayele bonsu too ne bimuna biabu, nansha mbua mene kena mua kubabuikila to. Nanku nenumanye ne: Meme ndi Maweja-Nangila, ndi nsunguluja bena Ejipitu ne bena Izrayele.”

⁸Balombodi ba mu bukalenga buebe bonsu nebantuile binu, balengelela ne: “Umbukayi mene ne bantu bonsu baudi nabu!” Diba adi nenshishe kuya. Moshe kumuka ne tshiji tshikole kudi mukalenga wa bena Ejipitu.

⁹Maweja-Nangila kuambila kabidi Moshe ne: — Pikala mukalenga wa bena Ejipitu kayi ukuteleja, bidi amu bua mmone mua kuenza bishima bia bungi mu Ejipitu.

¹⁰Moshe ne Arone bakavua bamane kuenza bishima bia bungi, mukalenga wa bena Ejipitu mutangile. Kadi mukalenga ewu kena mulekele bena Izrayele to, bualu Maweja-Nangila uvua mumupeshe muoyi wa tshitunu.