Read Tshiluba Tshimuangi 26 Bible Online

Tshimuangi 26 - Tshiluba bible

Tshimuangi 26

¹“Ungenzele muaba wa tshijila, mulongolola ne bilamba dikumi bia ndanda. Kadi, bilamba abi bikale bifikuluke, bikunzubile ne bikunze kunzuu. Ku bilamba abi, uzolaku Bakerubine bikale ne mapuapua.

²Tshilamba tshionsu, tshikale ne metre dikumi ne anayi mu bule ne metre abidi mu butshiama. Bilamba bionsu bikale anu bule bumue.

³Nanku, ulamakaja bilamba bitanu bitanu.

⁴Kadi, ku mibangu ya tshisumbu tshia bilamba tshionsu, usuikaku makopa ne mukaba mufikuluke.

⁵Makopa awu, ikale makumi atanu ku tshilamba ku ndekelu kua tshisumbu tshionsu tshia bilamba bitanu, ikale kabidi makanangane.

⁶Wenze nkanu makumi atanu ya tshiamu tshia mpawungi bua kusuikakaja bisumbu abi bibidi, bienza ntenta umue.

⁷“Wenze ntenta mukuabu ne bilamba dikumi ne tshimue, bia boya bua mbuji, bua kubuikila pa mutu pa muaba wa tshijila.

⁸Tshilamba tshionsu tshikale ne metre dikumi ne atanu mu bule, ne metre abidi mu butshiama.

⁹Ulamakaje bangabanga bilamba bitanu. Pashishe ulamakaje bilamba bisambombu. Tshilamba tshisambombu netshikale tshilembeleja mu mushiku wa mbelu.

¹⁰Usuike makopa makumi atanu ku mibangu ya tshilamba tshia ndekelu tshia luseke lumue. Usuike makopa makuabu makumi atanu ku mibangu ya luseke lukuabu.

¹¹Wenze nkanu ya tshiamu tshikunze makumi atanu ya kuela mu makopa awu, bua ntenta amueneke bu tshintu tshimue.

¹²Kadi mu butshiama bua bilamba abi, tshisongu tshidi tshipite bule tshikale tshilembeleja panyima pa muaba wa tshijila.

¹³Mu bule bua bilamba abi, tshilamba tshidi tshipite bule, utshibuikile tshitupa ku luseke, tshitupa ku luseke lua muaba wa tshijila. Nanku muaba wa tshijila newikale mubuikila bimpe.

¹⁴Bua kulama ntenta muibidi bidi bimpe, utentakaje ntenta mukuabu wa biseba bia mikoku ya bimpanga, bilaba kakula, ne mukuabu wa biseba bia nyama wa nkonga wa mu mayi.

¹⁵“Pashishe, upande mabaya a mutshi wa ndunga a kuimanyika nawu muaba wa tshijila.

¹⁶Dibaya dionsu dikale bule bua metre itanu ne butshiama bua santimetre makumi muanda mutekete ne itanu. Mabaya awu, ikale ne mpoku bua kulamakaja abidi abidi.

¹⁸Wenze mabaya makumi abidi, a kuteka muaba wa tshijila luseke lua kuinshi.

¹⁹Mabaya awu, ikale ne bitaku makumi anayi bienza ne tshiamu tshitoke tshia mushinga mukole. Dibaya dionsu dikale ne bitaku bibidi ne mpoku ibidi bikumbanangane.

²⁰Wenze mabaya makuabu makumi abidi, a kuteka muaba wa tshijila luseke lua ku mutu.

²¹Mabaya awu, ikale ne bitaku makumi anayi bienza ne tshiamu tshitoke tshia mushinga mukole. Dibaya dionsu dikale ne bitaku bibidi.

²²Wenze kabidi mabaya asambombu, a kuteka muaba wa tshijila luseke ludi diba dibuelela.

²³Wenze mabaya abidi a mushindu mukuabu, ku matumba a kumfundu.

²⁴Mabaya abidi awu, ikale malamakaja kulu ne lukanu, mapanduluke kuinshi. Ikale anu mushindu umue bua kuenza matumba a muaba wa tshijila.

²⁵Panyima pa muaba wa tshijila, pikala nanku mabaya muanda mukulu menza ne bitaku dikumi ne bisambombu bia tshiamu tshitoke tshia mushinga mukole. Dibaya dionsu dikale ne bitaku bibidi.

²⁶“Wenze mitshi itanu ya ndunga, bua kulamakaja nayi mabaya ku luseke lua muaba wa tshijila.

²⁷Mitshi ya ndunga mikuabu itanu, uyiteke milamakaje ne mabaya adi ku luseke lukuabu lua muaba wa tshijila. Mikuabu itanu, uyilamakaje ne mabaya adi panyima pa muaba wa tshijila luseke ludi diba dibuelela.

²⁸Kadi, mutshi udi pankatshi pa muaba wa tshijila, wikale mule mutue eku ne eku.

²⁹Pashishe, ku mabaya onsu ne mitshi, ulamikaku tshiamu tshia mpawungi. Wenze nkanu ya mpawungi ya kubueja mitshi.

³⁰Uvuluke mua kuasa nzubu ewu anu mushindu umvua mukuleje ku mukuna eku.

³¹“Batedi benze tshilamba tshinene tshia mu mushiku wa mbelu. Tshikale tshitela ne buanda bua ndanda busambakaja ne bua miosa ya nyama bufikuluke, bukunzubile ne bukunze kunzuu. Kabidi, tshikale tshizola bimfuanyi bia Bakerubine.

³²Tshilamba atshi tshikale tshipopela ne misonsu ya tshiamu tshia mpawungi, ku makunji anayi a mitshi ya ndunga, mabuikila ne tshiamu tshia mpawungi. Makunji anayi awu, ikale mateka mu bitaku binayi bia tshiamu tshitoke tshia mushinga mukole.

³³Ulembeleje tshilamba ku nkanu. “Usokoke mushete udi ne meyi ne mikenji panyima pa tshilamba atshi. Tshilamba atshi netshikale tshilembeleja bua kunuleja muaba wa tshijila ne muaba wa tshijila menemene.[166]

³⁴Uteke mushete wa Maweja-Nangila awu pa nkayawu muaba wa tshijila menemene. Pashishe, ubuikile tshibuikidiji.

³⁵Uteke mesa muaba wa tshijila luseke lua ku mutu wa ditunga. Uteke tshitekelu tshia muendu tshitangilangane ne mesa luseke lua kuinshi kua ditunga.

³⁶“Tshilamba tshia kulembeleja mu mushiku wa mbelu wa ntenta, tshikale tshitela bimpe ne buanda bua ndanda busambakaja ne bua miosa ya nyama bufikuluke, bukunzubile ne bukunze kunzuu.

³⁷Wenze kabidi makunji atanu a mutshi wa ndunga, malamike tshiamu tshia mapwungi. Ku makunji aku kuikale tshilamba tshipopela ne misonsu ya tshiamu tshia mpawungi. Wenze bitaku bitanu bia tshiamu tshikunze bua makunji awu.