Read Tshiluba Tshimuangi 27 Bible Online

Tshimuangi 27 - Tshiluba bible

Tshimuangi 27

¹“Pashishe, wenze tshilambuilu tshia mabaya a mitshi ya ndunga tshia kuoshila milambu. Tshikale ne metre abidi ne tshitupa nseke yatshi yonsu. Butumbuke buatshi buikale metre umue ne tshitupa.

²Mu matumba onsu anayi a tshilambuilu, ulamikamu nsengu ya mabaya milamakane ne tshilambuilu. Kabidi, tshilambuilu tshijima tshikale tshilamike tshiamu tshikunze.

³Wenze bintu bia kuenza nabi mudimu mu tshilambuilu ne tshiamu tshikunze: tshintu tshia kuboya natshi butu, bikasu, malongu, nkala bua kuambula munyinyi, wenze kabidi ne mbabula.[167]

⁴Uluke kabidi kakanu ka tshiamu tshikunze mu matumba onsu anayi.

⁵Kakanu aku, ukateke pankatshi pa tshilambuilu luseke lua kuinshi.

⁶Wenze mabaya abidi a mitshi ya ndunga a kubueja ku tshilambuilu. Ulamike tshiamu tshikunze ku mabaya aku.

⁷Ubueje mitshi ayi ku nkanu idi ku tshilambuilu nseke yonsu ibidi, bua kuambuilaku tshilambuilu.

⁸Tshilambuilu atshi, tshikale tshienza ne mabaya, kadi ushiye munda muatshi mutupu bu mumvua mukuambile ku mukuna eku.

⁹“Muaba wa tshijila wikale munyungulule ne lupangu. Lupangu alu, luikale lua bilamba bia buanda bua ndanda. Kuinshi kua lupangu, mu bule muikale metre makumi atanu a bilamba.

¹⁰Bilamba abi bikale bilamakaja ne nkanu ne milonda ya tshiamu tshitoke tshia mushinga mukole. Bikale bilembeleja ku makunji makumi abidi a tshiamu tshikunze. Makunji awu, ikale ne bitaku makumi abidi bia tshiamu tshikunze.

¹¹Luseke lua ku mutu kua lupangu, bilamba bikale bule bumue bisuika mushindu umue.

¹²Kadi, luseke ludi diba dibuelela, mu butshiama bua lupangu, bilamba bikale metre makumi abidi ne itanu, bisuika ku makunji dikumi.

¹³Pashishe, mu mushiku wa mbelu, luseke ludi diba dipatukila, lupangu luikale kabidi ne metre makumi abidi ne itanu a bilamba mu butshiama.

¹⁴Mu mushiku wa mbelu, ku luseke ne ku luseke kuikale bilamba mutantshi wa metre muanda mutekete ne tshitupa.

¹⁵Kuikale makunji asatu ne bitaku bisatu.

¹⁶Mu mushiku wa mbelu wa lupangu, muikale tshilamba tshia bule bua metre dikumi, tshitela ne buanda bua ndanda ne bua miosa ya nyama bufikuluke, bukunzubile ne bukunze kunzuu. Ukudike tshilamba atshi, ku makunji anayi adi pa bitaku binayi.

¹⁷Milonda ya tshiamu tshitoke tshia mushinga mukole ayi, neyilamakaje makunji onsu adi nunyungulule lupangu. Nkanu ya bijengu neikale kabidi ya tshiamu tshitoke tshia mushinga mukole. Kadi, bitaku nebikale bia tshiamu tshikunze.

¹⁸Nanku, lupangu luikale ne metre makumi atanu mu bule ne metre makumi abidi ne itanu mu butshiama. Butumbuke buikale metre ibidi ne tshitupa ya bilamba bia buanda bua ndanda. Bitaku bia makunji bikale bia tshiamu tshikunze.

¹⁹Bintu bionsu bidi ku muaba wa tshijila, ne bidibu benza nabi muaba awu, too ne ku milonda ya bitupa idi ku ntenta wa muaba wa tshijila ne ku lupangu, bikale anu bia tshiamu tshikunze.

²⁰“Ubikile bena Izrayele, bakutuadile mafuta mapiamapia a kuela mu muendu, bua wikale utema matuku onsu dilolu.

²¹Mu ntenta wa kusambakena amu, Arone ne bana bende ba balume, batekemu tshitekelu tshia muendu. Tshitekelu tshia muendu atshi, tshikale kumpala kua tshilamba tshidi tshilembeleja bua kujika muaba udi mushete wa ndondu. Miendu ayi, ikale itema butuku ne munya muaba undi meme Maweja-Nangila. Bena Izrayele ne ndelanganyi yabu yonsu, balame mukenji ewu kashidi.