Read Tshiluba Tshimuangi 28 Bible Online

Tshimuangi 28 - Tshiluba bible

Tshimuangi 28

¹“Wambile mukuluebe Arone ne bana bende ba balume: Nadabe, Abihu, Elazare ne Itamare, ubumushe munkatshi mua bena Izrayele, bua bangenzele mudimu wa butuangaji.

²Kadi, uteleshile muanenu Arone bilamba bia tshijila bia lumu ne butumbi bia mudimu wende.

³Bilamba abi, babitele anu kudi bantu bandi meme Maweja-Nangila mupeshe tshipedi tshia butedi. Arone ikale uvuala bilamba abi, padibu bamujidila ne padiye ungenzela mudimu wa butuangaji.

⁴Bilamba abi bikale bia mushindu ewu: tshilamba tshia pa tshiadi, tshia efode, tshia muntumpu, tshia muinshi tshilengeja ne buanda bua mishindu mishilangane, tshifulu ne mukaba. Muanenu Arone ne bana bende ba balume nebavuale bilamba abi padibu benza mudimu wa butuangaji.

⁵Batele bilamba abi ne buanda bua miosa ya nyama, bufikuluke, bukunzubile, bukunze kunzuu, ne buanda bua ndanda ne bua mubidi wa mpawungi.

⁶“Nanku, tshilamba tshia efode[168] tshia mutuangaji munene, tshikale tshitela kudi batedi ba kalanda-musenga. Tshikale tshitela ne buanda bua ndanda busambakaja ne bua miosa ya nyama bufikuluke, bukunzubile ne bukunze kunzuu. Tshilamba atshi, tshikale tshitela bimpe ne buanda bua mpawungi.

⁷Kadi, tshikale tshitela ne mampinda abidi ku nseke bua kutshivuala bimpe.

⁸Tukaba tudi mutuangaji munene uvuala natu tshilamba tshia efode, tuikale tua tshilamba atshi, tutela ne buanda bua mushindu umue.

⁹Wangate mabue a komaline abidi, ufundepu mena a bana ba Izrayele dikumi ne abidi.

¹⁰Pa dibue dimue ufundepu mena a bana basambombu, pa dibue dikuabu mena a bana basambombu, bilondeshile ku diledibua dia muana yonsu.

¹¹Mena a bana awu, ikale mafunda pa mabue abidi, kudi muntu udi ne tshipedi, bu mudi tshitampi. Ikale mabueja mu masosu abidi engelela bu tshiamu tshia mpawungi.

¹²Mabue abidi awu, wateka pa mampinda abidi adi pa tshilamba tshia efode tshia mutuangaji munene. Ikale tshimanyinu tshia mena a bisamba dikumi ne bibidi bia bena Izrayele. Nanku, padi Arone wimane kumpala kua Maweja-Nangila, mena awu ikale amueneka pa makaya ende, bua meme Maweja-Nangila ngikale nnuvuluka amu kunuvuluka.

¹³Wenza masosu engelela bu tshiamu tshia mpawungi,

¹⁴uluke kabidi tukaba tukese tubidi tua tshiamu tshia mpawungi menemene tupindakaja bu mionji. Ututenteke mu masosu amu.

¹⁵“Uteleshe tshilamba tshia kuvuala pa tshiadi, tshia pa dilumbulula.[169] Tshilamba atshi, tshikale tshitela ne buanda bua ndanda, busambakaja ne bua miosa ya nyama bufikuluke, bukunzubile ne bukunze kunzuu. Tshikale tshitela bu tshilamba tshia efode ne buanda buengelela bu tshiamu tshia mpawungi.

¹⁶Tshilamba tshia pa tshiadi atshi, tshikale tshibombi tshimue tshia santimetre makumi abidi ne itanu nseke yonsu.

¹⁷Pa tshilamba atshi, pikale milongu ya mabue a mushinga mukole inayi: mulongu wa kumpala wikale ne mabue a rubise, topaze ne emerode.

¹⁸Mulongu muibidi wikale ne mabue a grenate, safire ne dia mbongu.

¹⁹Mulongu muisatu wikale ne mabue a yasinte, agate ne ametiste.

²⁰Mulongu muinayi wikale ne mabue a krisolite, komaline ne yaspe.[170] Dibue dionsu dikale dibueja mu disosu dia tshiamu tshia mpawungi didi ku tshilamba tshia pa tshiadi.

²¹Mabue awu, ikale dikumi ne abidi, bungi bua bana ba Yakobe. Dina dia muana yonsu dikale difunda pa dibue bu mudi tshitampi. Mabue awu, neikale tshimanyinu tshia bisamba dikumi ne bibidi bia bena Izrayele.

²²“Ku tshilamba tshia pa tshiadi, kuikale tukanu tukese tubidi tua tshiamu tshia mpawungi menemene, tupindakaja bu mionji.

²³Kuikale kabidi nkanu ibidi ya bijengu ya tshiamu tshia mpawungi, ya kusuika ku mutu kua tshilamba tshia pa tshiadi.

²⁴Pashishe, usuike kakanu kakese ka majita ku nkanu ya bijengu yonsu idi ku tshilamba tshia pa tshiadi.

²⁵Kadi, nsongu ibidi ya tukanu tukese atu, uyiteke ku masosu abidi a tshiamu tshia mpawungi, adi ku mampinda a tshilamba tshia efode. Tshilamba tshia pa tshiadi tshikale kumpala.

²⁶Wenze kabidi nkanu ibidi ya bijengu ya tshiamu tshia mpawungi, uyiteke kuinshi kua tshilamba tshia pa tshiadi, bituangane ne tshilamba tshia efode.

²⁷Wenza nkanu mikuabu ibidi ya bijengu ya tshiamu tshia mpawungi, uyiteke kuinshi kua mampinda adi kumpala kua tshilamba tshia efode. Nkanu ayi, ikale pa mutu pa tshilamba tshia efode bilamakaja ne tukaba.

²⁸Usuikakaje nkanu ya bijengu idi ku tshilamba tshia pa tshiadi, ne idi ku tshilamba tshia efode ne muonji mufikuluke. Nanku, tshilamba tshia pa tshiadi netshikale pa mutu pa tshilamba tshia efode bilamakaja ne tukaba bua kabitukakanyi pa tshiadi.

²⁹“Pikala Arone ubuela mu muaba wa tshijila, ikale uvuala tshilamba tshia pa tshiadi tshia dilumbulula, tshidi ne mena a bisamba bia bena Izrayele, bua meme Maweja-Nangila ngikale nnuvuluka amu kunuvuluka.

³⁰Wewe Moshe, ubueje Urime ne Tumime[171] mu tshilamba tshia pa tshiadi, tshia kuvuala pa kulumbulula. Arone ikale uvuala bintu abi misangu yonsu padiye wimana kumpala kuanyi meme Maweja-Nangila, bua kumanya tshindi musue kuenzela bena Izrayele.

³¹“Muntumpu wa Arone wikale onsu mujima wa tshilamba tshikunzubile.

³²Muntumpu awu wikale ne nshingu. Ku nshingu aku, kuikale tukaba tutela bikole bu mudibu batela muntumpu wa mvita.

³³Ku muntumpu aku, kuikale kabidi bintu bia mishindu mishilangane bifuanangane ne tumuma tua grenade. Kadi ubitele ne buanda bukunzubile ne bukunze kunzuu. Pashishe, kuinshi kua muntumpu aku,

³⁴ulembelejeku ndibu ya tshiamu tshia mpawungi pankatshi pa tumuma tua grenade.

³⁵Arone neavuale muntumpu awu diba didiye wenza mudimu wende wa butuangaji. Pikalaye wenza mudimu kumpala kuanyi nansha upatuka mu muaba wa tshijila bantu bonsu nebumvue muadi wa ndibu ayi. Nanku Arone kakufua to.

³⁶“Pashishe, wenze tshitata tshia tshiamu tshia mpawungi tshifuanangane ne tshilongu. Ufundepu bu tshitampi ne: ‘Wa tshijila wa Maweja-Nangila.

³⁷Tshitata atshi, utshisuike kumpala kua tshifulu ne mukaba mukunzubile.

³⁸Padi Arone wasa tshifulu atshi, pandi ntshimona, nengikale mfuila bena Izrayele luse nansha bobu batupakana padibu bantuadila milambu.

³⁹“Nebatelele kabidi Arone: tshilamba tshia muinshi tshia miosa ya nyama, tshifulu tshia buanda bua ndanda ne mukaba mulengeja.

⁴⁰“Utelele bana ba balume ba Arone mintumpu, bifulu ne mikaba bia lumu ne butumbi.[172]

⁴¹“Bilamba abi, wewe Moshe ubivuadike muanenu Arone ne bana bende ba balume, ubalabe mafuta, ubambike midimu yabu. Ke muudi mua kubabanjija nanku bua bashale benza midimu ya butuangaji.

⁴²Ubatelele kabidi tuputula tua muinshi tua buanda bua ndanda, tumukila mu tshimonu too ne mu binu bua butaka buabu kabumueneki.

⁴³Bilamba abi, Arone ne bana bende ba balume babivuale anu padibu babuele mu ntenta wa kusambakena, nansha padibu baye pabuipi ne tshilambuilu tshidi muaba wa tshijila bua mudimu wa butuangaji, nanku butaka buabu kabuakumueneka, kabuena bubakebela lufu to. Arone alame mukenji ewu kashidi ne ndelanganyi yende yonsu.