Read Tshiluba Tshimuangi 3 Bible Online

Tshimuangi 3 - Tshiluba bible

Tshimuangi 3

¹Moshe uvua udisha bimuna bia tatuende muenu Yetro, mutuangaji wa mu Madiyane. Dituku dikuabu kupitshilaye mu tshipela too ne ku Orebe, mukuna wa Mvidi Mukulu.[14]

²Muaba awu, mutumibue wa Mvidi Mukulu kumuenekela Moshe mu ndimi ya kapia munkatshi mua tshipuka. Moshe kumona muvua tshipuka tshitema kapia katshiyi tshipia tshibutuka.

³Umona nanku, kuambaye ne: “Ndi musue kubenda kusemena pabuipi bua kujadika bualu ebu bua dikema: kadilu katema, tshipuka katshiyi tshipia tshibutuka!”

⁴Maweja-Nangila uvua mumone muvua Moshe usemena pabuipi bua kujadika bualu abu. Kubikilaye Moshe munkatshi mua tshipuka ne: — Moshe! Moshe! Awu kuitaba ne: — Ke meme awu.

⁵Mvidi Mukulu kumuambila ne: — Kusemenyi pabuipi to. Kopola bisabata biebe, bualu udi muimane muaba wa tshijila.

⁶Meme ndi Mvidi Mukulu wa bankambua bebe: wa Abrahame, wa Izake ne wa Yakobe. Moshe kubuikila mpala, bualu uvua utshina bua kutangila Mvidi Mukulu.

⁷Maweja-Nangila kumuambila ne: — Ndi mumone dikenga dia bantu banyi badi mu ditunga dia Ejipitu. Ndi mumvue miadi yabu. Badi babakengesha bikole ne tshikisu. Ndi mumone mudi bena Izrayele banyingalala.

⁸Ndi mufike bua kubasungidila kudi bena Ejipitu, kubumusha mu ditunga edi, kubabueja mu ditunga dialabale didi ne mabela ne buitshi bipite bungi.[15] Ke ditunga didibu basombe mpindiewu kudi bena Kenaane, bena Iti, bena Amore, bena Perizi, bena Ivi ne bena Yebusa.

⁹Ndi mumvue miadi ya bantu banyi. Kabidi ndi mumone mudibu babakengesha kudi bena Ejipitu.

¹⁰Nanku ndi nkutuma kudi mukalenga wa bena Ejipitu, bua uye kupatula bantu banyi bena Izrayele badi mukalenga awu mukuate ku bupika.[16]

¹¹Moshe kuandamuna Mvidi Mukulu ne: — Meme tshiena ne mushindu wa kuya kumonangana ne mukalenga wa bena Ejipitu bua kupatula bena Izrayele to.

¹²Mvidi Mukulu kumuandamuna ne: — Meme ndi nebe. Ndi nkupa tshimanyinu tshidi tshileja ne: Meme ke udi mukutume. Wewe mumane kupatula bena Izrayele mu ditunga dia Ejipitu, nenuntendelele pa mukuna wa Sinayi ewu.

¹³Moshe kuamba ne: — Mbimpe. Kadi pangaya kuambila bena Izrayele ne: “Mvidi Mukulu wa bankambua benu mmuntume kunudi,” pangebejabu ne: dina diende nnganyi[17] nembandamune tshinyi?

¹⁴Mvidi Mukulu kumuambila ne: — “Meme ndi Mundi.” Ubambile ne: “Ndi Mundi mmuntume kunudi.[18]”

¹⁵Pashishe kuambilaye Moshe ne: — Newambile bena Izrayele ne: “Maweja-Nangila Mvidi Mukulu[19] wa bankambua benu, wa Abrahame, wa Izake ne wa Yakobe mmuntume kunudi.” Edi ke dina dianyi dia kashidi dia nuenu ne ndelanganyi yonsu kumbikila.

¹⁶Ndaku, ubikile bakulu ba bena Izrayele bonsu, ubambile ne: “Maweja-Nangila, Mvidi Mukulu wa bankambua benu, wa Abrahame, wa Izake ne wa Yakobe mmummuenekele. Mmungambile ne: Ndi mumone mudibu banukengesha kudi bena Ejipitu.

¹⁷Ndi musue kunusungidila mu dikenga edi, kunumusha mu ditunga edi, kunubueja mu ditunga dia bena Kenaane, bena Iti, bena Amore, bena Perizi, bena Ivi ne bena Yebusa, ditunga didi ne mabela ne buitshi bipite bungi.[20]”

¹⁸Bena Izrayele nebitabe malu audi ubambila. Pashishe wangate bakulu ba bena Izrayele, uye nabu kudi mukalenga wa bena Ejipitu, umuambile ne: “Maweja-Nangila, Mvidi Mukulu wa bena Ebrewu, Mvidi Mukulu wetu mmutumuenekele. Nanku tudi tukusengelela se: wanyishe bua tuye mu tshipela, tuenze luendu lua matuku asatu bua kumulambula milambu.”

¹⁹Ndi mumanye ne: mukalenga wa bena Ejipitu kakuitaba bua nuye, anu meme mumuenzeje ku bukole.[21]

²⁰Nanku neukengeshe bena Ejipitu ne makenga a mishindu yonsu. Pamona mukalenga wabu nanku, neanulekele.

²¹Meme nensake bena Ejipitu bua banunemeke nuenu bena Izrayele. Nanku panumuka mu Ejipitu, kanuakuikala bianza bitupu to.

²²Pa nuenu kumuka, nenupawule bena Ejipitu. Mukaji yonsu wa bena Izrayele, nealombe kudi mukaji wa bena Ejipitu udi ku nzubu kuende, nansha kudi muena mutumba nende, bintu bia tshiamu tshitoke tshia mushinga mukole, nansha bia mpawungi. Neamulombe kabidi bilamba bia kuvuala. Bana benu ba balume ne ba bakaji nebambule bintu abi.[22]