Read Tshiluba Tshimuangi 30 Bible Online

Tshimuangi 30 - Tshiluba bible

Tshimuangi 30

¹“Nebase tshilambuilu ne mitshi ya ndunga, bua kundambuilapu manananshi.

²Tshilambuilu atshi, tshikale ne santimetre makumi atanu nseke yonsu, butumbuke buatshi buikale bua metre umue. Tshilambuilu ne nsengu idi ku matumba anayi, bikale bionsu bilamakane.

³Pashishe, ulamike tshiamu tshia mpawungi pa mutu pa tshilambuilu, ku nseke yatshi yonsu inayi, ne ku nsengu. Ku mibangu ya tshilambuilu atshi, unyungululaku mukaba wa tshiamu tshia mpawungi.

⁴Kuinshi kua mukaba awu, wenzeku nkanu ibidi ya tshiamu tshia mpawungi, ku luseke ne ku luseke. Ku nkanu aku, ubuejeku mitshi bua kuambula tshilambuilu.

⁵Wenze mabaya a mitshi ya ndunga abidi, walamike tshiamu tshia mpawungi nseke yonsu.

⁶Tshilambuilu atshi, utshiteke kumpala kua tshilamba tshidi tshijike mushete wa ndondu.[176] Tshikale tshitangilangane ne mushete wa ndondu awu, muaba utuikala tumuenangana nebe.

⁷Pashishe, Arone ikale ungoshilamu manananshi dinda dionsu padiye usukula miendu idi ku tshilambuilu.

⁸Kadi dilolu, ikale ungoshila manananshi padiye uye kutemesha muendu. Kabakulekela dingoshila manananshi kashidi.

⁹Kabidi pa tshilambuilu apu, kuena mua kundambulapu mulambu wa manananshi adi kaayi a tshijila to, nansha mulambu wa kuosha, nansha wa bintu bia mu madimi nansha wa maluvu a mvinyo.

¹⁰Ku tshidimu tshionsu, Arone ikale utshikobolola, umiamine mashi a nyama ku nsengu inayi idi ku tshilambuilu, bua kukobolola bantu. Mukenji ewu, bikale bawenzulula ku tshidimu tshionsu kudi ndelanganyi yenu yonsu. Tshilambuilu etshi netshikale tshijidila, tshikale muaba wa tshijila menemene.”

¹¹Maweja-Nangila kuambila Moshe kabidi ne:

¹²— Pawikala ubadika bena Izrayele, muntu yonsu afile tshintu tshia kudipandisha natshi ku ntatu ne makenga bidi mua kumukuata, diba dia kubadika bantu.

¹³Muntu yonsu udibu babadika, alambule tshia bibidi tshimue tshia sikle bu mudibu benza muaba wa tshijila.[177]

¹⁴Muntu yonsu udi ne bidimu makumi abidi ne pa mutu, neafile mulambu awu kudi Maweja-Nangila.

¹⁵Mulambu udi bantu bafile bua kudipandisha awu, babanji ne bapele bafile amu bungi bua mushindu umue.

¹⁶Nanku, wangate makuta adi bena Izrayele bafila bua kudipandisha awu, ulongolole nawu bintu bia mu ntenta wa kusambakena. Nanku, meme Maweja-Nangila nemvuluke bena Izrayele, mbalame.

¹⁷Maweja-Nangila kuambila kabidi Moshe ne:

¹⁸— Wenze dilongu dia tshiamu tshikunze.[178] Uteke dilongu adi pa tshitaku tshiadi tshia tshiamu tshikunze pankatshi pa tshilambuilu ne ntenta wa kusambakena. Pashishe, welamu mayi.

¹⁹Arone ne bana bende bikale bowa mayi awu ku bianza ne ku makasa,

²⁰bangabanga ne kubuela mu ntenta wa kusambakena, nansha bangabanga ne kundambula milambu. Nanku kabakufua to.

²¹Badi ne bua kuowa mayi awu ku bianza ne ku makasa bua kabatu to. Balame mukenji ewu kashidi too ne ndelanganyi yabu.

²²Maweja-Nangila kuambila kabidi Moshe ne:

²³— Angata manananshi a mupuya mukole: a mire kilo itanu, a sinamome kilo ibidi ne tshitupa, a kanele kilo ibidi ne tshitupa ne

²⁴a kase[179] kilo itanu — bilondeshile tshipimu tshidibu bangata bua muaba wa tshijila, — kuikale kabidi litre isambombu ya mafuta a olive.

²⁵Basambakaje manananshi ne mafuta bua kujidila nawu bantu ne bintu.

²⁶Mafuta awu, ujidila nawu ntenta wa kusambakena, mushete wa ndondu,

²⁷mesa a kulambuila mampa ne bintu bionsu bidiku, tshitekelu tshia muendu ne bintu bionsu bidiku, tshilambuilu tshia manananshi,

²⁸tshilambuilu ne bintu bionsu bidiku, dilongu dinene ne tshitaku tshiadi.

²⁹Pawajidila bintu abi, nebikale bia tshijila menemene. Nanku, muntu yonsu nansha tshintu tshionsu tshidi tshilenga bintu abi, netshipete dinyoka.

³⁰Ulabe Arone ne bana bende ba balume mafuta aa, bua kubajidila, bua bangenzele mudimu wa butuangaji.

³¹“Wambile bena Izrayele ne: ‘Mafuta a tshijila aa, nga kujidila nawu bantu badi benzela Maweja-Nangila mudimu ne ndelanganyi yabu yonsu.

³²Kadi, muntu kena mua kulaba mafuta awu pambidi to. Kabidi muntu kena mua kuenza mafuta a mushindu ewu to. Bualu mmafuta a tshijila anudi mua kunemeka.

³³Muntu yonsu udi wenza mafuta a mushindu ewu, bua kulaba bantu badi kabayi batuangaji, numumushe munkatshi mua bantu banyi.’ ”

³⁴Maweja-Nangila kuambila kabidi Moshe ne: — Angata mitshi ya dipembu dikole: mutshi wa budimbu, bizubu bia mutshi wa budimbu, mutshi wa ndundu ne mutshi wa kamonya. [180] Bintu abi ubiangate anu bungi bua momumue.

³⁵Ubisangishe kaba kamue, welemu luepu[181] bua kubilengeja bikale bia tshijila.

³⁶Pashishe, ubitue, wenze musenga wa kuteka kumpala kua mushete wa Maweja-Nangila, udi mu ntenta wa kusambakena, muaba ungikala mukuambile bua tuetu kumuenangana. Numanye ne: musenga awu ntshintu tshienu tshia tshijila.

³⁷Kanuena mua kuenza manananshi a mushindu ewu bua midimu idi kayiyi ya tshijila. Kadi, manananshi a mushindu ewu, nuikale nuenza nawu anu mudimu wanyi meme Maweja-Nangila.

³⁸Pikala muntu mudienzele manananshi a mushindu ewu, numumushe munkatshi mua bantu banyi.[182]