Read Tshiluba Tshimuangi 31 Bible Online

Tshimuangi 31 - Tshiluba bible

Tshimuangi 31

¹Maweja-Nangila kuambila kabidi Moshe ne:

²— Ndi muangate Beshalele ku mudimu. Yeye ewu, mmuana wa Uri, muikulu wa Ure wa mu tshisamba tshia Yuda.

³Mueyelu wanyi udi munda muende, bua ikale muntu wa lungenyi ne meji, mumanye mua kuenza midimu mishilangane.

⁴Mmumanye mua kulongolola midimu, kuenza bintu bia tshiamu tshia mpawungi, bia tshiamu tshitoke tshia mushinga mukole ne bia tshiamu tshikunze,

⁵kusonga mabue a mushinga mukole a kuteka mu masosu, kusonga ne mitshi ya kuenza nayi mudimu. Nanku, yeye mmumanye mua kuenza midimu yonsu.

⁶Ndi muangate kabidi Okoliyabe, muana wa Akisamaka wa mu tshisamba tshia Dane, bua ikale umuambuluisha. Ndi mupeshe bantu bakuabu tshipedi tshia kuenza midimu ya bianza. Nanku, bonsu pamue nebenze bionsu bimvua mukuambile bua wewe kuenza:

⁷ntenta wa kusambakena, mushete wa ndondu, tshibuikidiji tshia mushete ne bintu bionsu bidi mu ntenta,

⁸mesa a kulambuila mampa ne bintu bionsu bidiku, tshitaku tshia muendu tshia tshiamu tshia mpawungi nkayatshi, ne bintu bionsu bidiku, tshilambuilu tshia musenga wa manananshi,

⁹tshilambuilu ne bintu bionsu bidipu, dilongu dinene ne tshitaku tshiadi,

¹⁰bilamba bia kuenza nabi mudimu muaba wa tshijila[183], bilamba bia Arone ne bia bana bende ba balume bia kuenzabu nabi mudimu wa butuangaji,

¹¹mafuta a kujidila nawu bantu ne bintu, benze kabidi manananshi a mu muaba wa tshijila. Midimu yonsu eyi, bayenze anu mushindu umvua meme Maweja-Nangila mukuambile.

¹²Maweja-Nangila kuambila Moshe ne:

¹³Ambila bena Izrayele mikenji eyi ne: — Dituku dia Dikisha dishale tshivulukilu pankatshi petu nenu ne ndelanganyi yenu, bua nuenu kumanya ne: Meme, Maweja-Nangila ke udi munusungule.

¹⁴Nunemeke dituku dia Dikisha, bualu ndienu dia tshijila. Muntu yonsu udi wenza mudimu dituku adi, ne bamumushe munkatshi mua tshisamba tshianyi, bamushipe.

¹⁵Nuenze mudimu mu matuku asambombu, kadi dituku dia muanda mutekete nuikishe, bualu ndituku dia tshijila dia kunnemeka meme Maweja-Nangila Mvidi Mukulu wenu. Muntu yonsu udi wenza mudimu dituku dia Dikisha, nebamushipe.

¹⁶Nanku, bena Izrayele ne ndelanganyi yabu yonsu, bavuluke dituku dia Dikisha, bualu ke diumvuangana dietu nabu dia kashidi.

¹⁷Dituku edi nedikale tshimanyinu tshia diumvuangana didi pankatshi panyi ne bena Izrayele. Bualu meme Maweja-Nangila mvua mufuke diulu ne buloba mu matuku asambombu, meme kuikisha[184] dituku dia muanda mutekete.

¹⁸Nanku, Maweja-Nangila mumane kujikija diyuki ne Moshe ku mukuna wa Sinayi, kupeshaye Moshe mabue abidi ne mikenji ivuaye mudifundile nkayende.