Read Tshiluba Tshimuangi 33 Bible Online

Tshimuangi 33 - Tshiluba bible

Tshimuangi 33

¹Pashishe, Maweja-Nangila kuambila Moshe ne: — Umukayi muaba ewu ne bena Izrayele bonsu, bauvua mupatule mu Ejipitu. Ndayi kusomba mu ditunga dimvua mulaye Abrahame, Izake ne Yakobe.[193] Mvua mumane kutshipa bua kubapesha ditunga adi ne ndelanganyi yabu.

²Nanku, nentume mutumibue wanyi bua kunulama. Nennuipatshile bena Kenaane, bena Amore, bena Iti, bena Perizi, bena Ivi ne bena Yebusa.

³Nuye mu ditunga edi didi ne biakudia bia bungi.[194] Kadi meme tshiakuya nenu to, bualu nudi ne tshitunu, ndi mua kunubutula mu njila.

⁴Bena Izrayele bumvua miaku eyi mikole ya matandu, kudilabu bikole. Kuvualabu bilamba bia dibungama.

⁵Maweja-Nangila kuambila Moshe bua kumanyisha bena Izrayele ne: “Bu mudibu ne tshitunu, meme muende nabu mutantshi mukese, ndi mua kubabutula bonsu. Kadi badikengeshe, bumushe bilenga bionsu bidibu nabi, bavuale anu bilamba bia dibungama, nanku nemmone tshindi mua kubenzela.”

⁶Ke muakadikengesha bena Izrayele nanku, kumushabu bilenga bionsu bivuabu bavuale, bituadije ku mukuna wa Sinayi.

⁷Bamane kuasa mitanda, Moshe kumusha nzubu wa ntenta wa tshijila uvua munkatshi mua bantu, kumuasaye ku luseke, mutantshi mule ne muaba uvua bantu basombele. Kumuinyikaye dina ne: “Ntenta wa kusambakena”. Bavua basue kumonangana ne Maweja-Nangila, bavua bumuka mu mitanda yabu, baye mu ntenta ewu bua kuyukila ne Maweja-Nangila.

⁸Misangu yonsu ivua Moshe uya ku ntenta, bena Izrayele bavua bajuka, muntu yonsu wimana mu mushiku wa mbelu wa mutanda wende, mutangile mudi Moshe ubuela mu ntenta wa kusambakena.

⁹Nanku, pavua Moshe ubuela mu ntenta amu, divuba[195] divua dibuikila mu mushiku wa mbelu wa ntenta. Maweja-Nangila uvua wakula mu divuba amu uyukila ne Moshe.

¹⁰Bantu bonsu bavua batua binu panshi mu mishiku yabu ya mbelu, pavuabu bamona divuba adi ku tshibuelelu tshia ntenta wa kusambakena.

¹¹Maweja-Nangila uvua wakula ne Moshe bitangilangane bu muntu wakula ne mulunda wende. Kadi pavua Moshe upingana muaba uvua bantu bonsu basombe, Yoshuwa muana wa Nune, uvua umuambuluisha, uvua mushale anu mu ntenta.

¹²Moshe kuambila Maweja-Nangila ne: — Maweja-Nangila unteleje. Wewe udi muntume bua meme kulombola bena Izrayele, kadi kuena mumpeshe muntu mukuabu udi mua kungambuluisha to. Wewe udi munsungule, mungendeshe diakalenga bu muuvua mumane kuamba.

¹³Nanku, bu muudi mungendeshe diakalenga, ungambile bionsu biudi wela meji, bua meme nkumanye nkujadike, ngikale muena diakalenga kashidi. Uvuluke ne: bena Izrayele mbantu bebe.

¹⁴Maweja-Nangila kuandamuna Moshe ne: — Meme nkayanyi nenkulombole; neutshimune.

¹⁵Moshe kuandamuna ne: — Pawikala kuyi uya netu, ki mbimpe tumuke muaba ewu to.

¹⁶Kabidi mmunyi mudi bantu mua kumanya ne: meme ne bena Izrayele tudi bapete diakalenga kuudi, paudi kuyi munkatshi muetu? Bua tuetu kushilangana ne bisamba bikuabu, anu wewe muikale munkatshi muetu.

¹⁷Pashishe, Maweja-Nangila kuambila Moshe ne: — Nenkumbaje bionsu biudi mungambile ebi, bualu ndi mumanye dina diebe, kabidi udi unsankisha.

¹⁸Moshe kusengelela Maweja-Nangila wamba ne: — Ndejaku butumbi buebe.

¹⁹Maweja-Nangila kuandamuna Moshe ne: — Nenkuleje buakane buanyi, nenkuambile kabidi dina dianyi dia “Maweja-Nangila”. Muntu undi musue kunanga, ndi mmunanga, kabidi muntu undi musue kufuila luse, ndi mmufuila luse.[196]

²⁰Maweja-Nangila kumujadikila ne: — Kuena mua kumona mpala wanyi to, bualu muntu kena mua kumona mpala wanyi, kushala kabidi ne muoyi to.

²¹Maweja-Nangila kuleja Moshe lubuebue, kumuambila ne: — Imana pa lubuebue apa too ne pa umbakuleja butumbi buanyi.

²²Nenkubuikile ne tshianza tshianyi mu lubuebue too ne pangapita.

²³Pangumusha tshianza tshianyi, neumone nyima wanyi, bualu muntu kena mua kumona mpala wanyi to.