Read Tshiluba Tshimuangi 34 Bible Online

Tshimuangi 34 - Tshiluba bible

Tshimuangi 34

¹Maweja-Nangila kuambila Moshe ne: — Usonge mabue makuabu a mikenji, mafuanangane ne a kumpala auvua 1 munyange.[197] Meme nemfundululepu meyi anyi ne mikenji yanyi.

²Udilongolole, malaba dinda, ubande ku lusongu lua mukuna wa Sinayi, ungindileku.

³Kadi, wikala anu nkayebe. Muntu mukuabu kena mua kupitshila ku mukuna aku. Nansha nyama kena mua kupitshilaku. Kabidi mukoku, mbuji, ngombe kayena mua kupitshilaku bua kudia to.

⁴Moshe kusonga mabue a mikenji abidi mafuanangane ne a kumpala. Dinda dionsu, kubandaye ku mukuna wa Sinayi ne mabue awu makuate ku bianza bu muvua Maweja-Nangila mumuambile.

⁵Nanku, Maweja-Nangila kupueka mu divuba dia kapia,[198] kuimanaye pamue ne Moshe, kudisamunaye nkayende dina diende dia “Maweja-Nangila”.

⁶Pashishe, kupitaye kumpala kua Moshe wamba kabidi ne[199]: “Ndi Maweja-Nangila Mvidi Mukulu wa luse ne dinanga, ndi ne lutulu luvule, ndi nkumbaja bionsu bindi ndaya bantu, tshiena mfika munda lukasa.

⁷Ndi mfuila bantu luse too ne ku ndelanganyi tshinunu, mbajimijila bubi buabu, buntomboji ne ditupakana diabu. Kadi, tshiena mbingisha muntu udi mupile. Ndi nnyoka bana ba ndelanganyi misatu nansha minayi bua buenzayi bua baledi babu.[200]”

⁸Moshe kutua binu panshi lukasa, kuinyikaye mutu

⁹wamba ne: — Maweja-Nangila wanyi, ndi mujadike ne bena Izrayele mbantu ba tshitunu, kadi bu muudi munnange, ndi nkusengelela bua wikale munkatshi muetu. Utufuileku luse ku bionsu bitudi bakuenzele, bualu tudi bantu bebe.

¹⁰Maweja-Nangila kuambila Moshe ne: — Ndi ntua nebe ndondu, nengenze malu a kukema munkatshi muenu, adi kaayi manji kuenzeka mu tshisamba tshikuabu pa buloba bujima. Bua bena Izrayele bonsu banudi nabu bajadike mudimu muimpe undi mubenzele pamue nebe.

¹¹“Wewe Moshe, ukumbaje malu onsu andi mukuambile lelu aa. Meme nenkuipatshile bena Amore, bena Kenaane, bena Iti, bena Perizi, bena Ivi ne bena Yebusa.

¹²Kadi, kuena mua kutua ndondu ne bantu ba ditunga dinuasomba to. Bualu nudi mua kulonda buenzayi buabu, nuenu kupeta diakabi.

¹³Nanku, nupule bilambuilu biabu, nupule makunji abu adibu batendelela.[201]

¹⁴Nuenu kanuena mua kukukuila mvidie wa tshisamba tshikuabu to. Bualu meme Maweja-Nangila ndi ne mukawu. Bushuwa, ndi Mvidi Mukulu wenu nkayanyi.

¹⁵Kanuena mua kutua ndondu ne bena ditunga dinudi nusomba to. Bualu palambabu biakudia biabu bia kuelela mvidie yabu, nebanubikile bua kudia nabu.

¹⁶Bana benu ba balume kabena mua kusela nsongakaji ya mu ditunga adi to. Bualu badi mua kulonda bibidilu bibi bia nsongakaji idi inemeka mvidie ya ditunga diabu.

¹⁷“Kanuenji mvidie ya tshiamu[202] bua kuyitendelela.

¹⁸“Mu ngondu wa Abibe[203] unuvua bapatuke mu Ejipitu, nuikale nuenza tshibilu tshia dipatuka dienu. Matuku malondangane muanda mutekete, nudie mampa kaayi mela buanga, bu mumvua mumane kunuambila.

¹⁹“Bamuanabute mbanyi meme. Nanku, muanabute mulume wa ngombe, wa mukoku nansha wa mbuji, numundambule meme.[204]

²⁰Nupikule muanabute mulume wa mpunde ku mukoku. Panuabenga kupikula muanabute awu, numutshibule nshingu. Kadi, nupikule bamuanabute benu balume.[205] “Kanufiki mu nzubu wanyi bianza bitupu to.

²¹“Nuenze mudimu anu matuku asambombu. Nuikishe dituku dia muanda mutekete, nansha mu tshikondu tshia kudima, nansha tshia kunowa biakudia.[206]

²²“Nuenze tshibilu tshia kunowa bintu bia mu madimi, panudi nunowa biakudia bia tshianyi bia mu madimi enu. Nuenze kabidi tshibilu ku ndekelu wa tshidimu, panudi nunowa biakudia bikuabu bia mu madimi enu.[207]

²³“Bantu balume bonsu ba mu ditunga dienu, bikale badisangisha kumpala kuanyi meme Maweja-Nangila Mvidi Mukulu wa Izrayele, misangu isatu ku tshidimu tshionsu bua kuntendelela.

²⁴Pangipata bisamba bikuabu bionsu binudi nabi pabuipi, nendiundishe mikalu ya ditunga dienu, bua panudi numuka bua kumonanganna nanyi misangu eyi isatu, bantu bakuabu kabena mua kuikala ne lukuka lua ditunga dienu to.

²⁵“Kanuena mua kundambula mulambu wa mashi a nyama pamue ne mampa adi mela buanga. Kabidi munyinyi wa nyama wa dituku dia Dipita dia Maweja-Nangila, nuudie ujike dituku adi.[208]

²⁶Bintu bia tshianyi binudi nunowa mu madimi enu, nubilambule mu nzubu wa Maweja-Nangila Mvidi Mukulu wenu. Kadi, panudi nulamba munyinyi wa muana wa mukoku nansha wa muana wa mbuji, kanuedimu mabele a mamuende to.[209]”

²⁷Maweja-Nangila kuambila Moshe ne: — Ufunde bionsu bindi mukuambile ebi, bualu ke bidi bijadika ndondu undi mutue nebe ne bena Izrayele bonsu.

²⁸Moshe kushala muaba uvua Maweja-Nangila matuku makumi anayi a munya ne a butuku, kayi udia, kayi unua, ufunda anu mikenji dikumi ivua ijadika ndondu wa diulu vuangana diabu.

²⁹Moshe kutuluka ku mukuna wa Sinayi ne mabue abidi a ndondu makuate ku bianza. Kadi kavua mumanye ne: pavuaye utuluka apu, mpala wende uvua ukenka, bualu uvua muyukile ne Maweja-Nangila.

³⁰Diba divua Arone ne bena Izrayele bamone muvua mpala wa Moshe ukenka bikole, kutshinabu bua kufika muaba uvuaye.

³¹Moshe kubikila Arone ne balombodi ba bena Izrayele bonsu. Kusemenabu kudiye. Kubambilaye malu.

³²Ke bena Izrayele bakuabu bonsu kushisha kusemena kudi Moshe. Kubamanyishaye mikenji ivua Maweja-Nangila mumupeshe ku mukuna wa Sinayi.

³³Moshe ujikija kuakula, kudisuikaye tshilamba pa mpala.

³⁴Nenku misangu yonsu ivua Moshe ubuela mu ntenta wa kusambakena bua kuyukila ne Maweja-Nangila, uvua usulula tshilamba tshivua pa mpala atshi too ne papinganaye kudi bena Izrayele bua kubambila bivuabu bayukile ne Maweja-Nangila.

³⁵Kadi pavua bena Izrayele balengame batangile mpala wa Moshe bu muvuaye ukenka, Moshe uvua ubuikila tshilamba pa mpala too ne papinganaye kabidi kudi Mvidi Mukulu.[210]