Read Tshiluba Tshimuangi 36 Bible Online

Tshimuangi 36 - Tshiluba bible

Tshimuangi 36

¹Beshalele ne Okoliyabe ne bantu bakuabu bavua Maweja-Nangila mupeshe tshipedi tshia kuenza midimu ya muaba wa tshijila, nebenze bintu bia kuenza nabi mudimu mu nzubu wa Mvidi Mukulu bu muvua dijinga dia Maweja-Nangila.

²Moshe kubikila Beshalele, Okoliyabe ne bantu bakuabu bavua Maweja-Nangila mupeshe tshipedi tshia kuenza midimu ayi kuyikumbaja.

³Kusangishabu bintu bionsu bivua bena Izrayele bafile kudi Moshe bua midimu ya mu muaba wa tshijila. Bena mudimu bonsu bamane kusangisha bintu bikumbane, bena Izrayele bavua anu bafika ne dinda dionsu bua kufila bintu bikuabu bu muvuabu basue.

⁴Nanku bena meji bavua benza midimu mishilangane muaba wa tshijila, kuanjibu kulekela midimu, kuyabu

⁵kuambila Moshe ne: “Bantu mbafile bintu bipitshidile bungi butudi nabu dijinga bua kujikija midimu yonsu ivua Maweja-Nangila mutufundile bua kuenza.”

⁶Nanku diakamue Moshe kutuma diyi bua kukandika bantu bonsu balume ne bakaji, bua kabafidi kabidi bintu bia kuenza nabi mudimu to. Nanku bantu kulekela kufila,

⁷bualu bintu bivuabu bafile bivua bikumbane bua kujikija mudimu, bipite ne kupita kuine.

⁸Bena mudimu[216] bavua bapite bakuabu ku lungenyi kutuadija kuasa nzubu wa tshijila. Kuangatabu bilamba dikumi bia buanda bua ndanda busambakaja ne bua miosa ya nyama bufikuluke, bukunzubile ne bukunze kunzuu. Ku bilamba abi, bavua bazolaku Bakerubine.

⁹Bilamba bionsu bivua ne metre dikumi ne inayi mu bule, metre ibidi mu butshiama.

¹⁰Bilamba abi, bivua bilamakaja bitanu luseke bitanu luseke lukuabu.

¹¹Kuenzabu makopa ku tshilamba tshia ndekelu tshia tshisumbu tshia kumpala tshia bilamba. Kuenzabu makopa makuabu ku mibangu ya tshilamba tshia kumpala tshia tshisumbu tshibidi.

¹²Makopa awu, avua makumi atanu ku ndekelu kua tshisumbu tshionsu tshia bilamba. Avua kabidi makanangane.

¹³Pashishe kuenzabu nkanu makumi atanu ya tshiamu tshia mpawungi, bua kulamakaja bilamba abi bionsu, bua ntenta awu amueneke muenza bu wa tshilamba tshimue.

¹⁴Kutelabu bilamba bikuabu dikumi ne tshimue bia boya bua mbuji, bia kuenza nabi ntenta muibidi, bua kubuikila bimpe nzubu wa tshijila.

¹⁵Bilamba bionsu bivua anu momumue: mu bule metre dikumi ne atanu, mu butshiama metre abidi.

¹⁶Kulamakajabu bilamba abi, eku bitanu eku bisambombu.

¹⁷Kuenzabu makopa makumi atanu ku mibangu ya tshilamba tshia ndekelu tshia ku bilamba bitanu. Kuenzabu makopa makuabu makumi atanu, ku mibangu ya tshilamba tshia kumpala tshia tshisumbu tshibidi.

¹⁸Pashishe kuenzabu nkanu makumi atanu ya tshiamu tshikunze, bua kulamakaja bilamba abi, bua ntenta awu amueneke bu muenza ne tshilamba tshimue.

¹⁹Nanku bua kulama ntenta muibidi bimpe, kutentakajabu ntenta ibidi: ewu wa tshiseba tshia mukoku wa tshimpanga tshimane kulaba kakula, mukuabu wa tshiseba tshia nyama wa nkonga.

²⁰Kupandabu mabaya a mitshi ya ndunga, kuimanyikabu nawu nzubu wa tshijila.

²¹Kadi dibaya dionsu divua ne metre atanu mu bule, ne santimetre makumi muanda mutekete ne itanu mu butshiama.

²²Dibaya dionsu divua ne mpoku ibidi mitangilangane.

²³Kuenzabu mabaya makumi abidi bua ku luseke lua kuinshi kua nzubu wa tshijila.

²⁴Mabaya avua ne bitaku makumi anayi bia tshiamu tshitoke tshia mushinga mukole. Dibaya dionsu divua ne bitaku bibidi, biakanangane ne mpoku ibidi.

²⁵Kuenzabu kabidi mabaya makumi abidi bua ku luseke lua ku mutu kua nzubu wa tshijila.

²⁶Mabaya aa avua kabidi ne bitaku makumi anayi bia tshiamu tshitoke tshia mushinga mukole. Dibaya dionsu divua ne bitaku bibidi.

²⁷Kuenzabu kabidi mabaya asambombu bua ku luseke lua kudi diba dibuelela lua nzubu wa tshijila.

²⁸Pashishe kuenzabu mabaya makuabu abidi a pa buawu bua mu matumba adi ku mfundu kua nzubu wa tshijila.

²⁹Mabaya abidi awu, avua mapanduluke kuinshi, masuikakaja ku mutu ne lukanu. Mabaya onsu abidi, bavua baenza mushindu umue bua kuenzawu matumba.

³⁰Nanku ku mfundu kua nzubu wa tshijila kuvua mabaya muanda mukulu, menza ne bitaku dikumi ne bisambombu bia tshiamu tshitoke tshia mushinga mukole. Dibaya dionsu divua ne bitaku bibidi.

³¹Kuenzabu kabidi mitshi ya ndunga dikumi ne itanu, ya kutshiamakaja pa mabaya avua ku nzubu wa tshijila.

³²Kutshiamakajabu mitshi itanu ku luseke lua balume, itanu ku luseke lua bakaji, ne mikuabu itanu ku mfundu kua nzubu wa tshijila luseke ludi diba dibuelela.

³³Kadi mutshi uvua pankatshi pa mitshi mikuabu uvua mutshiamakane mutue eku ne eku mu nzubu mujima wa tshijila.

³⁴Pashishe kulamikabu tshiamu tshia mpawungi ku mabaya onsu, ne ku mitshi yonsu. Kuenzabu nkanu ya bijengu ya tshiamu tshia mpawungi bua kubuejamu mitshi ayi.

³⁵Kutelabu tshilamba tshia mushiku wa mbelu ne buanda bukole bua ndanda busambakaja ne bua miosa ya nyama bufikuluke, bukunzubile ne bukunze kunzuu. Ku tshilamba atshi bavua bazola Bakerubine.

³⁶Kuenzabu makunji anayi a mitshi ya ndunga. Kulamikabu tshiamu tshia mpawungi ku makunji aku. Kulembelejabu tshilamba tshia mu mushiku wa mbelu ku makunji aku ne misonsu ya tshiamu tshia mpawungi. Kuenzabu kabidi bitaku bia makunji binayi, bia tshiamu tshitoke tshia mushinga mukole.

³⁷Nanku batedi kutela tshilamba tshia mu mushiku wa mbelu wa nzubu wa tshijila ne buanda bukole bua ndanda busambakaja ne bua miosa ya nyama bufikuluke, bukunzubile ne bukunze kunzuu.

³⁸Pashishe kuenzabu makunji atanu bua kusuikabu tshilamba atshi. Kuasabu misonsu bua kulembelejaku tshilamba atshi. Kuenzabu mutu wa dikunji dionsu ne milonda ya tshiamu tshia mpawungi ne bitaku bitanu bia tshiamu tshikunze.